به‌رسڤه‌ك بۆ (دلدار)ێ نانێ سۆتی ب وه‌فا دانای
قه‌هره‌مان عه‌گید سه‌رگه‌لی
من ملێن خوه ب جاده‌یێ ڤه‌نان
و بیسته‌كێ من پیاسه دگه‌ل
ئاڤابوونا ڕۆژێ كر
به‌رویكێن خوه دا چوومه خار
جگاره‌یه‌ك من پێشكێشی گریانێ كر
ده‌م ل من زڤری
په‌ركێ گوهێ من وه‌ربادا
بره ل بن پێن ددانێن خوه
ل بن لێڤێن خوه‌ڕا گۆته من
ئه‌و ئاخینكێن تو رادهێلی
سه‌فه‌ره‌كه
د چانته‌یێ ته دا
پڤ دكه‌ته بای
گوها هی دكه‌ت
دا گوهـ لێ بن
وانه‌یه‌كه تو ده‌یه بای!
ته‌نا ب مه‌شه
خامه‌یێ خوه
بۆ سوباهی ئالیك نه‌ده
فێری سه‌ر سنوورا نه‌كه
ل به‌ر پێن شه‌ڤێ نه روینه خار
دا سۆزێن ته
زێل نه بنه وان سترانێن ساڤاتیا ته،
كا ل خوه بزڤره
خودان خامه‌یێ هه تو دبینی
تو دزانی ئه‌و ژی توی
به‌س ئه‌و دلدارێ خه‌مایه
و گه‌له‌ك جاران د خه‌ونێن خوه دا
خامه‌یێ خوه یێ كڕاندی
تۆ دزانی به‌رپه‌ڕ نینه
وی چیرۆكێن ڤی باژێری بۆ نه‌گۆتین
كۆلان نینه
وی كۆڤانه‌ك لێ نه‌چاندی
ل جاده‌یێن ڤی باژێری
خازۆك ل گرا د هه‌لنگڤن
ل پاخلا سویار دبن
هه‌ر ڕۆژ ب به‌ژنا ده‌می دبێژن
خوه هی دكه‌نه دالینكا صه‌ی
دا نه مرن
هه‌می ده‌مێ ته ژ ته دگرن
ب تنێ ئه‌و نانا تۆ ژێ دبێی
وه‌فایه‌كه به‌س ئه‌و نه‌شێن وێ ژ ته ب دزن.
