ب خاترا ته كه‌ڤۆكا من
ئه‌ڤه ناما من یا دوماهییێ یه بۆ ته، ده‌مێ تو ڤا رێزكان دخوینی ره‌نگه ئه‌ز گه‌هشتبمه سه‌رێ چیایێن بلند، من تو د ناڤ كۆمكوژیه‌كێ دا دیتی و ل به‌ربانگێ شه‌ره‌كی من حه‌ز ژ ته كر، من ب هه‌موو هێزا خوه و ب هه‌موو باوه‌ریا خوه بزاڤ كرن لێ نه‌شیام ته رازی بكه‌م، من ئه‌ڤینا خوه یا چیایان د مه‌ژیێ ته‌دا نه‌چاند، دبیت من ئه‌و كه‌لهێن ترسێ یێن د هناڤێن ته دا هاتینه ئاڤاكرن نه‌هرفاندن، ده‌مێن درێژ ئه‌ز د ناڤبه‌را ئه‌ڤینا ته و ئه‌ڤینا چیایان دا هاتم و چووم، پاشی من هزر كر مانا د ناڤبه‌را وان ناكۆكیان دا شاشییه، داكو بگه‌همه ئه‌ڤینا ته من بریار دا چیایان بۆ خوه بكه‌مه وارگه‌ه، ژبه‌ركو ئه‌ز فێر بووم داكو د ئه‌ڤینا خوه‌دا بژین پێدڤیه ئه‌م ئاسته‌نگان نه‌هێلین، من دیت ئاسته‌نگێن همبه‌ری ئه‌ڤینا مه ژ یێن مه‌م و زین، فه‌رهاد و شرینێ پترن، ئه‌م هه‌ردو دئازاد نینین، ئه‌م ل وه‌لاته‌كی دژین سه‌ر و مالێ مه تێدا یێ پاراستی نینه، سه‌ربڕێن مه گاڤ ب گاڤ ب دووڤ مه‌ڤه‌نه، رۆژانه ب ده‌هان (به‌كۆ عه‌وان) سیخۆریێ ل سه‌ر مه دكه‌ن، مه هندی چیایێ ئاگری ترس د دلێ خوه دا هه‌لگرتیه، ترس ژه‌هرا ئه‌ڤینێ یه كه‌ڤۆكا من، نه ب تنێ ژه‌هرا ئه‌ڤینێ به‌لكو ژه‌هرا هه‌موو هه‌ستێن مرۆڤانه! مه ژه‌هرا كوژه‌ك د هناڤێن خوه‌دا هلگرتیه، ما ئه‌م دشێین ب دلێن ژه‌هركری و ب تلێن ل سه‌ر جه‌له‌بكا تڤه‌نگێ د ئه‌ڤینێ دا بژین؟ باژارێ تو لێ دژی و باژارێ ئه‌ز لێ دژیم بووینه بازارێ مان و نه‌مانێ، ئه‌م دزانین سه‌ربڕێن مه ژ ڤایرۆسێن ڤه‌گر پتر كار دكه‌ن، ژبه‌ر وێ یه‌كێ ژی ئه‌ز دێ وه‌كو (مجنون)ی ب چیا كه‌ڤم و هه‌كه پێدڤی بوو دێ وه‌كو فه‌رهادی چیایان كۆلم، وه‌كو كه‌ریمی دێ ب هه‌دار بم، ئه‌و ترسا د دلێ من دا دێ ئێخمه دلێ دوژمنی و دێ چم، دێ وێره‌كییا چیایان تژی دلێ خوه كه‌م، ئه‌ز دێ بمه رۆناهی دا تاریێ بشووم، ئه‌ز دێ ل سه‌رێ چیایێن جودی و ئاراراتی وه‌كو رۆژێ ده‌ركه‌ڤم، قه‌ره‌قۆلێن ترسێ یێن د دلی دا ئاڤا بووین دێ هه‌رفینم، دێ بمه باغچه‌ڤان و وێره‌كیێ د دلان دا چینم، ئه‌ز دێ د ناڤا باغچێ خوه‌دا ئه‌ڤینێ، حه‌زكرنێ، هیڤیان، شادیێ، باوه‌ریێ، برایه‌تییێ، دۆستایه‌تییێ، ئاشتییێ، باشییێ و خۆشیییێ مه‌زن كه‌م، ئه‌ز نابێژم ئه‌ڤ باغچه یێ من ب تنێ یه، ئه‌ز دێ خوازم بوسرمان، كرستیان، عه‌له‌وی، سوننه، ئێزدی، شافعی، رافزی، قادری، یێن باوه‌ردار و نه‌باوه‌ردار و هه‌موو كه‌سێن باوه‌ریێن وان جودا پێكڤه بژین. چه‌ند زمان و چاندێن جودا هه‌بن دێ هه‌موویان پێكڤه و ب هه‌مان ئاست وه‌كو زارۆیێن خوه مه‌زن كه‌م. هه‌كه ئه‌ز سه‌ركه‌فتم ئه‌ز دێ زمانێن ئێلامی، ئه‌كادی، هووری، هیتیتی، بابلی، سومه‌ری، ئاشووری ڤه‌ژینم. ئه‌ز دێ سۆرانی، زازاكی، گۆرانی، كرمانجیێ ژ زیندانێ ده‌رئێخم، هه‌كه بشێم دێ ئه‌و گوندێ جارا ئێكێ نۆح لێ بنه‌جه بووی دێ ژ نوی ئاڤاكه‌مه‌ڤه، دێ په‌یكه‌رێ گلگامشی چێكه‌م، ئه‌ز دێ بۆ وان هنێرم یێن په‌رستگه‌ها خوداوه‌ندێ ماردۆخ ل بابلێ چێكری، بورجا بابل یا ب حه‌فتێ زمانان دئاخڤیت، دێ دوباره وێ بورجێ ئاڤا كه‌م لێ ئه‌ڤ جاره ب ده‌ستێن كه‌سێن ئازاد، ئه‌ز دێ شكه‌فتا زه‌رده‌شتی نووژه‌ن بكه‌م، ب پیتێن زێرین زه‌ند ئاڤێستایێ ل سه‌ر دیواران نه‌خشینم، عه‌ره‌بانا ئێكێ ـ ترۆمبێلا ئێكێ یا شه‌ری دێ ئینم، دێ په‌رستگه‌هێن ده‌ستپێكێ د جهێ وان دا ب هه‌مان پلانا ده‌ستپێكێ ئاڤا كه‌م، دێ په‌یكه‌رێن كاهنان یێن جارا ئێكێ ئه‌م فێری نڤیسینێ كرین ل به‌رده‌رگه‌هێن وان په‌رستگه‌هان دانم، د ناڤ باغچه‌یێ خوه‌دا دێ باغچه‌یه‌كێ بابلی یێ هه‌لاویستی هه‌لاویسم و دێ كه‌مه ئه‌مانه‌تێ په‌یكه‌رێ سه‌میرئه‌میسا نازه‌نین یا كچا كیاكسیری، ئه‌ز دێ په‌یكه‌رێ نۆشیره‌وان چێكه‌م یا دوازده هزار مریدێن مازده‌كی سه‌ر و سه‌ر كرینه د دوازده هزار بیران دا یێن وی كۆلاین و مازده‌ك همبه‌ری وان هه‌تا حه‌فكێ د ئاخێ را كری و سه‌رێ وی هێلایه ژده‌رڤه و به‌رێخوه‌ددا مرنا مریدێن خوه، دا مرۆڤاتی به‌رێخوه بده‌ته په‌یكه‌ری و شه‌رم بكه‌ت.
كه‌ڤۆكا من داكو ئه‌ز بگه‌همه ته ئه‌ز ژ ته دوور دكه‌ڤم و پێدڤییه تو ژی ڤێ باوه‌ر بكه‌ی، من ئه‌ڤینا ته د دلێ خوه‌دا هه‌لگرتیه، د چلێ زڤستانێ دا، د برسیبوونێ دا، د شه‌ڤره‌شا تاری دا، د ده‌ریا نه‌چاریێ دا ئه‌ز دێ ئه‌ڤینا ته د دلێ خوه‌دا پارێزم، ئه‌ز دێ كه‌لهێن زولمێ ب چاندنا گولان ل ده‌شت و چیا هه‌رفینم، دێ هه‌موو تێله و سنگ و سیمێن هاتینه دانان راكه‌م، به‌ر ب مرۆڤاتیێ، به‌ر ب ئه‌ڤین و هیڤییان، دێ هه‌موو تێگه‌هێن دژومنێن مرۆڤاتییێ ژناڤ به‌م و دێ هێم، ب هاتنا من تو ب تنێ شاد نابی! دێ لڤینا رووبارێ دیجله‌ی هێته گوهۆرین، دێ سترانا فوراتی جودا بیت، رووبارێ مونزورێ دێ ئاخڤیت و كا چ د دیرۆكێ دا دیتیه دێ بۆ مرۆڤاتیێ بێژیت، هه‌مبێزكرنا رووبارێ مونزورێ دگه‌ل رووبارێ موراد دێ جودا بیت، سه‌رۆكانیا رووبارێ زێ دێ كه‌ته كه‌نی، ده‌ردێن فوراتی و خه‌مێن دیجله‌ی دێ ب دوماهی هێن، چیایێ بلندێ ئاگری ئێدی خوین ناگریت، دێ قۆنتارا خوه بۆ شڤان و بێریڤانان، بۆ هه‌سپێن سپی و هه‌سپێن ره‌وان و هه‌سپێن ره‌ش و كه‌رێن په‌زی و ئه‌ڤیندارێن بلوورێ دژه‌نن ڤه‌كه‌ت، ل گوبیتكا چیایێ سیپانێ خه‌ج و سیابه‌ند دێ په‌زكووڤیان خودان كه‌ن و د ئه‌ڤینا خوه‌دا بێ ئاسته‌نگ ژین، ل سه‌رێ چیایێ جودی ب هزاران گه‌شتیار دێ بنه مێهڤان، گۆلا وانێ دێ ب هزاران ئه‌ڤینداران هه‌مبێز كه‌ت، زارۆكێن تاخێ خانچه‌په‌كا ئامه‌دێ دێ چنه خواندنگه‌هان، كۆچبه‌ری دێ به‌رۆڤاژی بیت، ئاخ و ئه‌ردێن مه دێ ب به‌ره‌كه‌ت كه‌ڤن، وی ده‌می چ ئاغا ژی نابن. مین و ته‌قه‌مه‌نیێن ل سه‌ر سنۆران دێ هێنه پاقژكرن، دێ گۆتنێن خۆش ل سه‌ر ڤێ ئاخێ هێنه گۆتن، هۆزانڤانێن ب رۆمه‌ت دێ هه‌لبه‌ستان نڤیسن، ئه‌ندازیارێن گۆتنان و ئه‌ندازیارێن رستان دێ ل ڤی وه‌لاتی مه‌زن بن، گۆتن دێ ژ زێران بهاتر بن، زنجیرێن ل سه‌ر خه‌ون و هیڤی و هزران دێ هێنه شكاندن و هاڤێتن، كه‌سێن هزرێن جودا دكه‌ن ئێدی ناكه‌ڤن زیندانان، به‌لكو دێ دیاریان پێشكێشی وان كه‌ین، ئه‌وێن ژ هزرێن جودا ژی دترسن دێ ل بنگه‌هێن ده‌روونی هێنه چاره‌كرن، زیندان هه‌موو دێ بنه مۆزه‌خانه و كارگه‌ه و دگه‌ل رووباران دێ ل ده‌شتان گه‌هنه ئێك، دێ رێز ل كه‌دكاران هێته گرتن و بتنێ دێ ل پێشوازیا داهێنه‌ران رابینه سه‌رپێیان، ئێدی مه پێدڤی ب قه‌هره‌مانان نامینیت، ئه‌و كه‌سێن ژ ئالییێ دۆزگه‌ران ڤه وه‌كو خائین هاتینه ب ناڤكرن دێ بها و رۆمه‌تا وان ڤه‌گه‌ریت، دارستانێن مه دێ ژ نوو شین بنه‌ڤه، مێش، كێز، كولی و چووچك دێ دیسا زێده بن، ئها وی ده‌می و د ره‌وشه‌كا وه‌سا دا دێ ئه‌ڤینا مه پێكهێت كه‌ڤۆكا من، وی ده‌می ئه‌م دێ دگه‌ل كه‌ڤۆكان شاد بین، سترانان ل سه‌ر وان بێژین، وی ده‌می دێ ل ته‌نشتا ئێك و دو روونین و گوهداریا موزیكا رووبارێ مونزورێ كه‌ین.
ل به‌ندا من به كه‌ڤۆكا من، ل به‌ندا من به! ئه‌ز دێ سپێده‌هیه‌ك دگه‌ل ئه‌لندا رۆژێ ل سه‌رێ كۆمتێن چیایێ ئاگری ده‌ركه‌ڤم و هێم، ب خاترا ته ئه‌ڤینا من.
ئه‌ز ب خه‌ریبی چاڤێن ته‌یێن ره‌ش كۆمری ماچی دكه‌م.
ئه‌ڤ پارچه‌یه‌ك بوو ژ رۆمانا (ب خاترا ته كه‌ڤۆكا من) یا نڤیسه‌ر محه‌مه‌د سه‌لیم چوروككایا و و وه‌رگێرانا به‌یارێ زاویته‌یی، ئه‌ڤ پرتووكه ژ چاپێ ده‌ركه‌فتییه و نها ل به‌ر ده‌ستێ خوانده‌ڤانانه، رۆمانه‌كا سیاسی و جڤاكی یه و به‌حس ل قۆناغه‌كا گرنگ یا دیرۆكا سه‌رده‌م یا كوردستانێ دكه‌ت، خواندنا وێ ژ بلی مفای خۆشییه‌كا مه‌زن ژی تێدایه.
