شێخولئیسلام
موحسن قۆچان
ل ڤێ دولێ
ئاخ ب گیانێ حه‌ژێكرنێ یا ئاڤز بوو
خوه روودكره به‌ر پێن كه‌نیێ ب نازداری
میرا په‌ریا
كلدانكا خوه، شمك و كومك
لێ هێلابوون ژ بۆ مالداری
عشق د گه‌ل ئه‌وران كۆمڤه دبوو
ل گه‌لیێ بیێ و سیارا ساركێ(1)
ل حه‌زێن گه‌نجان سڤك دباری
ل كێریێ و مه‌زرێ ده‌ستهه‌لی بوو(2)
هه‌ر كه‌سه‌كێ په‌ڕ ژێ د وه‌ریان
بێزاری دخوار
بێی دودلی دچۆنه هاری
د سه‌رهه‌ڤیركێ خاله‌تێ دا
پێشمه‌رگێ مه ملیۆن جاران
كه‌شكه‌روون و نانێ خواری
ل ڤێ دۆلێ
دێوه‌كێ دینێ هه‌لهه‌له
ژ مه‌مكێ دایكا خوه تۆره‌بوو
جه‌رگێ ئه‌سمانی زقومی گه‌ز ل دووڤ گه‌زێ
ستێرێن زارۆك
د قورا چاڤێن دایكا خوه دا خوه ڤه‌شارتن
هه‌سته‌ك لێكدای
هنده‌ك ژ ترسێ
هنده‌ك ژ له‌زێ
دارستانێن پشتیێن به‌فرێ كال كرین
یێن خه‌وتوبووین
د گوهوشینه
ژ بسكێن رۆندایێن ئه‌وران تاری هه‌لدبیت و ب سه‌هم دنژیێت
خه‌ونان ب به‌فریان ڤه‌دمالن
دسوژن حه‌زێ
ل پشت لێما دارستانێ
هۆڤ ژ په‌نجێن هۆڤان دكه‌ڤن
پێلێن دیوان وه‌ك كڤاركان
ژ كێله‌كێن ئاخێ ده‌ردكه‌ڤن
ئه‌و تووتنا ب خوها پالان به‌تلی
دێوان گورزێ داوه‌شاندیێ
یا مه‌رچقی وه‌كو مرۆڤێن كاغه‌زێ
ئه‌ور، بڤر
دئێو و ئه‌ور
ستێركا خوه یا ل چیچه‌لۆكێن كه‌ڤرا گرتی
ب زه‌لامباشیێ ڤه دپه‌قن
دبنه ئاگر
مرن سیتافكه دڕژیێتن
وه‌ك هه‌رجارا خوین و ئاخێ تێكهه‌ل دكه‌ن
دبیته ته‌قن
ئاسۆیێ دۆر دخوینێ وه‌ردبیت
نافكا وی گور
له‌هی ره‌نگێ ئاشان دبه‌ت
ئو گه‌نگرپه‌ڕ
دمینن بێ سه‌ر
ماچی دكه‌ن بن پێن دێوان
هه‌می كه‌له‌خ دبنه ئه‌كته‌ر
شانۆگه‌ریه‌كا كۆمێدی ژ ناڤ كوزرینێ دهێته ده‌ر
ته‌شیكا كچا كافری(3)
مورا ره‌شه ب ناڤ چاڤێن ده‌جه‌لان ڤه
نه دشێت ئێدی ریسی برێسیت و
نه بزڤڕینیت و بكه‌ته‌ف هری
له‌و په‌نجه‌را دخوینێ ڤه‌بووی
د بن تلخان ڤه ئێوری
هه‌كو كه‌ڤر و شوین دپه‌قن
شێخلئیسلام ژ هشان دكه‌ڤیت(4)
سه‌د ده‌ره‌جێن دێرا بلند دكه‌ته پێنگاڤه‌ك و ب سه‌ر دكه‌ڤیت(5)
دێ كیڤه چی شێخێ شیخا هه‌ی زێڕێ زه‌ر
پرتێن جوبه‌ی ب ته‌راشان ڤه و تزبێ ل سه‌ر
هه‌كو خه‌رزێ جه‌نگی دكه‌ڤیت و دبیته شه‌ر
كه‌س ژ ناڤ كێلبان ناهێته ده‌ر
جوبرك گولچیسكا هه‌یڤێ دخۆن
ترسینۆك دمینن زێندی،
هه‌لپه‌ڕیس، خوه‌فرۆش و مێریێن ب په‌ڕ
مه‌ده‌د شێخێ من مه‌ده‌د
ژ ئه‌گه‌را تڕانه‌یێن گه‌ریلایان و
شه‌رێ میتێ
دا هه‌بوون ئالیسه‌نگ نه بیت
دیموگرافی تێكنه‌چیتن
گوهۆڕین نه‌كه‌ڤن خه‌ریتێ
دێوان كه‌رخێن هه‌رفاندین
هاتنوچۆنا قه‌دخه كری
شێخ ژی ب شیخینیا خوه نه‌شیت
ب چ ته‌رزێ هه‌ی
ژ دێره‌شێ بازده‌ت به‌لیتێ(6)
20/5/2022
1- گه‌لیێ بیێ: گه‌لیه‌كه ل به‌رێگاره‌ی د ناڤبه‌را گیزێ و دێره‌شی دا.
2- كێریێ و مه‌زرێ: دو گوندێن بچوكن ل به‌رێگاره‌ی.
3- ته‌شیكا كچا كافری: كه‌ڤره‌كێ زراڤێ بلنده د گه‌لیێ بیێ دا ، بێژن كچا كافری هری پێ د ڕست.
4- شێخلئیسلام: مناسبێ شێخه‌كێ مه‌زنێ سوفیێن مسلمانایه، سالانه ب سه‌دان خه‌لكی سه‌ردانا وی دكر و داخوازا پێكهاتنا هیڤیان دكر.
5- دێرا بلند: مه‌ره‌م ژێ جهێ چلخانا قه‌شه‌یه. جهه‌كێ بلنده د گه‌لیێ دێره‌شێ دا ب هه‌ژمارا رۆژێن سالێ ده‌رجه یێن هه‌ین پێ بسه‌ردكه‌ڤن.
6- دێره‌ش و به‌لیتێ: دو گوندن ل به‌رێگاره‌ی.
