ئه‌ز و خه‌ون
عارف حیتۆ
خه‌ونه‌كێ پاوان كرم و خه‌ونه‌كا دی
ئه‌ز ژ ڕێڤه‌چوونا ل سه‌ر په‌لان كرم
هه‌كو د قازانا خه‌ونان دا كه‌لاندیم و ڤه‌وژارتیم
من خوه دیت یێ بوویمه كرم، كرمێ ئاخه‌ك رپساندی
جۆبڕكان ژ باخچه‌ی ره‌ڤاندی و ب مه‌ركا ره‌زڤانی چغاندی
سالێن هشك و بێ بارانیێ، قه‌یدكا ئه‌نیا من چرمساند
دێمێ من یێ حولی حولی، كره لات لات، پیری لێ چاند..
بایه‌ك چریێ، هه‌می خه‌ون ل بن په‌ڕێ خوه نخافتن و
سه‌ربۆرا كه‌ل، ب خه‌تێن روویێ من ڤه ته‌زاند
ئه‌زێ وه‌ستیایی و ته‌نگه‌زار
ل سێڕییانێ، مامه ل به‌ندا ڕێیا چوارێ
پیره‌مێری ده‌ستێ خوه یێ وه‌ك سه‌به‌تكێ،
ل پشتا من دا و كۆمه‌ك مشكان
ژ گه‌وری یا من ڤه‌په‌شین، ب وارا وه‌ر بوون
وه‌كو سترانه‌ك لۆریكان، خوینا من ل به‌ر پیا رژیا
مشكان به‌ندكێ خه‌ونێ قه‌تاند
ئه‌زه‌ك بێ خه‌ون، دێ چه‌وا رووكه‌م وه‌غه‌ران؟
خه‌ونه‌ك پرت پرت، دێ چه‌وا ڤێده‌ت كه‌سه‌ران؟
په‌یڤێن من بوونه دیكل و ژ ئه‌زمانێ من غه‌ییدین
ده‌ستێن من مانه ب خه‌ونێ ڤه -ئه‌و خه‌ونا ئه‌ز پاوان كریم-
ل هنداڤی من، بۆمه‌كی دخواند
كالێ سێڕییانێ ڕك و ڕك، د من دفوكری و
ره‌فتارێن من ب دلی نه‌بوون
ئه‌و ره‌فتارێن بنگه‌هین بۆ هه‌موو ڕێباز و مه‌سه‌بان
د هه‌ڤسۆزییا چاڤێن وه‌ستایی دا نه‌بوون
ئه‌ڤجا هۆسا ب خه‌ونۆكیێ هاتمه نیاسین!
خه‌ونه‌كێ پاوان كرم و خه‌ونه‌كا دی
ئه‌ز ژ رێڤه‌چوونا ل سه‌ر په‌لان كرم
هه‌كو د قازانا خه‌ونان دا كه‌لاندیم و ڤه‌وژارتیم
من خوه دیت یێ بوویمه كرم
كرمه‌كێ خه‌ونۆكیێ خه‌ونان دبینیت و راڤه دكه‌ت
ب خه‌ونه‌كێ دبیت و ب ئێكێ ڤه‌دژیت و ب ئێكا دی،
ب دێمێ هه‌یڤێ ڤه دبژكیت!
*
