تو هه‌می تشته‌كی ژمن
رێژین حكمه‌ت
ته ئه‌ز كێشامه نڤیسینێ و
من بۆ ته ل هه‌ر په‌یڤا جوان دگه‌رییا
تو ئه‌و كه‌س بووی
د شه‌ڤ و ڕۆژه‌كان دا
د ئه‌شقا خوه دا مه‌ستكریم!
و هه‌می تشتێن من و هه‌ر تشتێ ب من ڤه گرێدایی
كریه خواسته‌كا حه‌زێن خوه و
ته ئه‌ز راكێشی ژیانێ كرم.
ژیان ل گه‌ل ب تامه
بێ ته هه‌ر تشته‌ك تارییه
نه‌خوه‌شییه
دنیا زیندانه…
مرنا ب ساخییه!
ما ته دگوهێ من دا نه‌دكره گازی
ته دگۆت:
گڕنژینا ته دنیایێ ئاڤا دكه‌ت
دێ بگڕنژه!
ئه‌و گڕنژین ژی بوویه خه‌ون خیال
دنیا وێران بوو
دبیت د ڤه‌هاندنێ دا شاره‌زا نه‌بم
د گۆتنێ دا ده‌نگبێژ نه‌بم
به‌لێ ئه‌ز به‌هره‌مه‌ند بووم
د دورستكرنا بیرهاتنان دا
ل گه‌ل ته
ئه‌و ڕۆژێن ده‌ستێ مه تێكدا
كه‌نیا مه باژێر داگیركربوو
كه‌یف كه‌یفا مه
عه‌ور و ستێرا
سه‌ما ل گه‌ل مه دكر!
ژبه‌ر خوه‌شیا ئه‌م كه‌تین تێدا
هه‌یڤ ڕۆژ ل گه‌ل ئێك ده‌ركه‌ڤتن
گوڤه‌ند ل گه‌ل مه گرێدان!
چاڤ ژ ڕۆناهی یێ ڕاوه‌ستییان
هندی من به‌رێ خوه دا جوانییا ته
ده‌ستێن من پێتی بوون
هندی ئه‌ز بۆ ته دنڤێسم
بۆ ته د ڤه‌هینم، ڕۆژه‌كێ زارۆكێن مه دێ خوینن
بۆ جیهانێ دێ كنه داستان
دێ ڤه‌هینن
دا ئه‌شڤا مه وه‌ك مه‌م و زینا
فه‌رهاد و شرینا،خه‌ج و سیامه‌ندا
پشتی مرنێ ژی ل دیوانا ڤه‌گێرن
چیرۆكا سه‌ر ده‌ڤ بیت
گه‌نج و پیر و كال
بێژن مرنێ ژی ئه‌و ژ ئێك دوور نه‌كرن.
