كورته چیرۆك
چوون
محسن عه‌بدلڕه‌حمان
ب هنده‌ك سالۆخه‌تێن جه‌سته‌ی و گیانی مرۆڤ وه‌كهه‌ڤن، لێ وه‌كو په‌نچه‌مورێ ژ ئالیێ دی ژێكجودانه، هه‌روه‌سا د ئاستێ دیتن و تێگه‌هشتن و هزركرنێ دا مرۆڤ جیاوازن، وه‌كو كرمی ژیێ خوه هه‌می خوه دخشینیت، لێ كرمۆك خوه دخشینیت و ل دوماهیێ دبیته په‌لاتینكه‌كا جوان و بلند دفریت! ئه‌ڤه من ژ مام نادرێ گه‌هوه‌ری زانی، ئه‌و ده‌ستپێكا سالا من یا ئێكێ و یا وی یا داویێ بوو، یێ چاڤه‌ڕێی بڕیارا خانه‌نشینكرنێ بوو، وێ شه‌ڤا زڤستانییا سڕێ دنیا كرییه به‌ستیگره‌كا گه‌ردوونی، د ده‌رگه‌هی دا راوه‌ستیا هه‌چكو تشته‌كی بێهن دكه‌ت یان ده‌نگه‌ك دوور دبهیسیت، به‌ری هه‌ڤال گازیكه‌نێ مام نادر(ده‌رگه‌هی بگره)، ل ته‌نیشت راوه‌ستیام، به‌رێ وی ل چیایێ ژ به‌فرێ هوونی، بێی ل من بزڤڕیت، چه‌ند لبێن مێویژان كرنه د په‌حنكا ده‌ستێ من دا و گۆت: ئه‌ز ل ژیێ ته و نها بووم د شه‌ڤه‌كا ژ ڤێ سارتر دا، د نۆبه‌یا زێره‌ڤانیێ دا هه‌چكو ئه‌ز د بورجه‌كا كه‌لا دمدم دا، ژ شانازیێ هه‌موو هه‌ستێن من دگه‌ل تڤه‌نگێ د ئێكگرتی بوون، لبه‌كا مێویژێ د ناڤ تبلێن خوه دا بادا (و ب تبلێن به‌ران، شه‌هدێ و ناڤیچێ من په‌رچقاند، دۆپا وێ من د سمبێلێن خوه دا و ئه‌ڤراز بادان)!
– چ.. ته مویوێژ د سمبێلێن خوه دا!؟
– ئه‌ز نادرێ گه‌هوه‌رێ یێ ئێكانه‌بووم، ژ زیره‌كیێ دگۆتنه من ئێكانه، ئانكو نێرێ به‌رازی، سێڤێ خویشكا هه‌شت برا و له‌شكره‌كێ پسمامان، نه دانه من، ئێڤارییه‌كێ ل رێیا ئاقاری پارزینێ وێ ل سه‌ر كه‌ڤری و ئه‌و ل سه‌ر ملێ خوه من دانا..
– ئانكو ته ره‌ڤاند؟
هۆسا ژ رێنچبه‌ری بۆ مه زڕته‌كێ ئاغایی ب رۆژ و ب شه‌ڤ زێره‌ڤانێ مالا وی، سال د بۆرین و ئه‌ز رژدتر دبووم، تاكو ژ زیره‌كی و هه‌م ژ دلسۆزی بوومه جهێ باوه‌ری و متمانه‌یا ئاغای.
– مام نادر.. ب راست تو ره‌شه‌كێ ئاغای بووی، پا چاوا بوویه پاسه‌وانێ فه‌رمانبه‌ریێ!؟
– د شه‌ڤه‌كا ساهییا ژ ڤێ سارتر دا وه‌كو گۆرگی یێ هشیاربووم، شه‌ڤ یا درێژ و هه‌ر تشتێ بێده‌نگ بوو، من مێویژه‌ك په‌رچقاند و د سمبێلێن خوه ددا، ده‌نگێ ئاغای هات ئه‌وێ دگۆته كۆڕێن خوه: بابو گوهێ هه‌وه ل ده‌نگێ سا بیت، هه‌كه ژ دوور هات، بكه‌ڤنه پێشییا زه‌لاما و هه‌ره‌ن نه‌ترسن، لێ هه‌كه ده‌نگێ سا ژ نێزیك هات ناڤ د ره‌شه‌ك و خۆلامان بده‌ن؛ و بده‌ن پێشییا خوه!
گۆهشیم و د ناخێ خوه دا من گۆتێ: هه‌ی سه‌یێ گۆڕێ وی سه‌ی، ژنا من ره‌ڤاندی و زارۆكان بهێلمه د كۆلكی ڤه و زێره‌ڤانیێ ل ته و ژنا ته بگرم، هه‌ی قه‌دا ب من بكه‌ڤن، من ده‌ستا به‌فرێ و د سمبێلێن خوه هۆسی تاكو چڕاتییا مێویژێ به‌ردای، سپێدێ من تڤه‌نگ دانا و گۆته ئاغای، ئه‌ڤه ئه‌ز چووم و هێش ئه‌زێ دچم!
