پرتێن هه‌سته‌كا چیایی- ١
پرتێن هه‌سته‌كا چیایی- ١
عارف حیتۆ
مناره‌یا مزگه‌فته‌كێ
سینگێ ئاسمانی دڕاند و
پێكۆلا وێ داگیركرنا ئاسمانی بوو.
*
ئاسمان ب وێ فره‌هییا خوه یا پان ڤه
چاڤلێكه‌را ده‌ریایێ یه
ئه‌وا مرۆڤ پێ لێ دكه‌ن و لێ سوار دبن.
*
ئه‌م شه‌ڕی دكه‌ین..
داكو هه‌ستان سار بكه‌ین و
خوینێ ببینین.
*
ئه‌ز ب هه‌مبێزان چوومه شه‌ڕی
سینگێن نه‌رم، تبلا جه‌له‌پكێ خاڤ كر و
پلانا من نه‌چوو سه‌ری.
*
خه‌مێن كورك بووی ئێك و ئێكو
ل به‌یارێ دل دامه‌زران و
ژێ زا هه‌بوون.
*
من هه‌سته‌ك دانا بن پیێ هه‌سته‌كێ
و خوه گێل كر ل به‌ر په‌سته‌كێ
شعر ژێ بوون.
*
په‌یڤ كت كته چوون سه‌مایێ
دناڤ شعرێ دا
هه‌ر یه‌ك ژ خوه ته‌ژیتر بوو.
*
په‌نجه‌شێرێ ستێره‌ك خوار و
ستێره‌كا دی، ما به‌نده‌وار
ئه‌ز د شعره‌كێ دا به‌رزه بووم.
*
هه‌كو خه‌یالێ چه‌ك داناین
جه‌لته‌یه‌كا مه‌ژی ل من دا و
هه‌ر چوار له‌پێن من فالنج بوون.
