ئه‌ڤرۆ .. دێ ئێك هێته قوتان.
كورته چیرۆك
ئه‌ڤرۆ .. دێ ئێك هێته قوتان.
د. ئه‌مجه‌د عوبه‌ید
سمبێل و رهێن وی، بندفن و ئه‌رزنكا وی ره‌شكرن. ئێدی جار جار دایبابێن وی ل سه‌ر تێشت و فراڤینا به‌حسا ژنئینانێ بۆ دكر، لێ هێشتا ئه‌و ژ فوبیا شه‌ركرنێ ئه‌وا ژ بچویكاتی دلێ وی داگیركری قورتال نه‌بویه.
دلێ وی وه‌كی له‌ڤه‌نێ د ئاڤێ دا دله‌رزی، ده‌مێ ددیت كو دو زارویێن ب شه‌ر چووین.. پا هه‌ما تا مرنێ دهاتێ، ده‌ما ددیت زه‌لام یێ ل سه‌را سا یان نوباڤێ ب شه‌ر دچن و دربێن مرنێ و ب كێتا ل سه‌ر و ته‌نشتێن ئێك دده‌ن.
وێ شه‌ڤێ تا سپێدی چاڤێن وی مێڤانداریا خه‌وێ نه‌كر، ژبه‌ر هزر و ته‌خمینا، ڤه‌رێژا وان ژی بریاره‌ك بوو، كو بچیت مێرانیا خوه ل خوه‌لیعه‌یشترین كه‌سێ گوندی ب جه‌ربینیت.
وێ ئێڤارێ، تاڤێ هێدی هێدی گولیێن خوه ژناڤا گوندی ڤه‌دكێشان.. ده‌مێ چوویه په‌رێ گوندی ل به‌راهیكا گارانێ داكو ده‌حۆیێ گاڤان ب قوتیت.
ده‌حۆ زه‌لامه‌كێ هه‌ژار و ژئالیێ جه‌سته‌ی ڤه هندی چركونه‌كی بوو.
ژ دویرڤه گازی كرێ و چ ئاخفتنه‌كا نه‌خوه‌شه گوتێ، هه‌تا نیزیك بووی، ئێدی قه‌سێن پیس و ب ژن و ماك ژی گوتنێ و ده‌ست حه‌فكا وی دانا.
ده‌حۆ ب چ ره‌نگا نه‌شیا خوه ژ به‌لا سمۆی قورتال كه‌ت..
گوپالێ خوه دو تا كر و داوه‌شانده ناڤ چاڤێن وی، ڤزكا خوینێ ژ ئه‌نیا وی دو گه‌زا بلند بوو.
سمو پشتی ده‌مه‌كێ هشیار بوو، دیت كو ده‌حۆیێ ل هنداڤێ گه‌له‌خێ وی و كولم ل دویڤ كولمێ ل ده‌ڤ و لێڤێن وی دده‌ت!
