خسرۆ گوران: زه‌حمه‌ته دئه‌ڤ ساله دا هه‌لبژارتن بهێنه ئه‌نجامدان
هه‌ولێر، سولین سلێمان
خسرۆ گۆران به‌رپرسێ ده‌زگه‌هێ هه‌لبژارتنێن پارتی دیموكراتی كوردستان د دیداره‌كێدا ل گه‌ل رۆژناما (ئه‌ڤرۆ) راگه‌هاند، وه‌كو یا دیار پێدڤی بوو ل ئێكێ ی هه‌یڤا چریا ئێكێ هه‌لبژارتنێن په‌رله‌مانێ كوردستانێ بهێنه ئه‌نجامدان لێ زه‌حمه‌ته هه‌لبژارتن ل وی ژڤانی بهێنه ئه‌نجامدان وئه‌گه‌رێ سه‌ره‌كی یێ پاشخستنا وان هه‌لبژارتنان ئێكه‌تی نیشتیمانی كوردستانه چونكی سه‌رۆكا په‌رله‌مانێ یا تێدا نینه هیچ روونشتنه‌كێ لسه‌ر پرسا كۆمسیۆنا هه‌لبژارتنان و درێژكرنا ژیێ كۆمسیۆنێ ب رێڤه‌ببه‌ت، هه‌رچه‌نده ئه‌م وه‌كو پارتی دیموكراتی كوردستان دخوازین د ده‌مێ خودا هه‌لبژارتن بهێنه ئه‌نجامدان.
خسرۆ گۆران خویاكر “كۆمبونێن ئالیێن سیاسی یێن هه‌رێمێ ب چاڤدێریا نه‌ته‌وێن ئێكگرتی ل سه‌روكایه‌تیا هه‌رێما كوردستانێ ل سه‌ر پرسا هه‌لبژارتنان تنێ بۆ وێ چه‌ندێ بوو بۆچۆنێن ئالیێن سیاسی لێك نێزیك بكه‌ن داكو ب زووترین ده‌م هه‌لبژارتنێن په‌رله‌مانێ كوردستانێ بهێنه ئه‌نجامدان ، د هنده‌ك خالان دا د لێك نێزیكن و د هنده‌ك خالان دا ژی بۆچۆنێن جودا هه‌نه”.
ناڤهاتی گۆت ژی”هه‌تا نۆكه هیچ رێككه‌فتنه‌ك د ناڤبه‌را پارتی و ئێكه‌تیێ دا نینه، وه‌كو یا دیار هه‌لبژارتن دێ هێنه پاشخستن وده‌مێ ڤێ پاشخستنێ ژی نه‌یا دیاره وئه‌ڤ چه‌نده ڤه‌دگه‌ریته سه‌ر ئالیێن سیاسیێن دناڤا په‌رله‌مانی و ده‌سهه‌لاتا ناڤ په‌رله‌مانی دا كو ب زووترین ده‌م بشێن ده‌مه‌كی بۆ ئه‌نجامدانا هه‌لبژارتنان دیار بكه‌ن”.
ئاشكراژی كر”ئه‌م وه‌كو پارتی درژدین لسه‌ر ئه‌نجامدانا هه‌لبژارتنان د ده‌مێ خودا چونكی ئه‌ڤه فه‌رمانا سه‌رۆكێ هه‌رێما كوردستانێ یه د هه‌مان ده‌مدا جێگرێ سه‌رۆكێ پارتییه و مه پێ باشه هیچ هێجه‌ته‌ك بۆ پاشخستنا هه‌لبژارتنان نه‌هێته گرتن”.
ئاماژه كر”سه‌رۆكێ هه‌رێمێ فه‌رمان دایه كو ل هه‌یڤا 10 هه‌لبژارتن بهێنه ئه‌نجامدان لێ كۆمسیۆن دبینیت كو ده‌مێ وه‌كو كۆمسیۆن بهێته درێژكرن هه‌رچه‌نده شه‌ش هه‌یڤ بسه‌ردا یێن بۆرین و سه‌رۆكێ هه‌رێمێ بریار لسه‌ر دایه ژی و نه‌ته‌ویچن ئێكگرتی ژی ل سه‌ر هێلێ یه كو هه‌ڤپه‌یڤین دگه‌ل ئالیێن سیاسی و په‌رله‌مانی و كومسیۆنێ كرینه لێ هێشتا هیچ ئه‌نجامه‌ك نینه”.
گۆت ژی”د نوكه‌دا بریار ل په‌رله‌مانی دایه، په‌رله‌مان و فراكسیۆن دشێن ئێكلا بكه‌ن چونكی ئه‌و بێی حزبان نه‌شێن بریارێ بده‌ن ژ به‌ر وێ ئێكێ دڤێت هه‌موو ئالی ئێك ده‌نگ بن، جهێ داخێ یه ل هه‌رێما كوردستانێ ده‌ستووره‌ك نینه كو ده‌مێ هه‌لبژارتنان دیاركه‌ن، تنێ پارتی كاری بۆ ئه‌نجامدانا هه‌لبژارتنان د ده‌مێ خودا دكه‌ت ودخوازیت مافێ خه‌لكی نه‌هێته خوارن، هنده‌ك ژ ئالیێن سیاسی ترس ژ هه‌لبژارتنان هه‌نه و پرسا فره‌بازنیێ ژی دكه‌ن كو تنێ هێجه‌ته، ب شێوازه‌كێ ئاشكرا ژ به‌ر ره‌وشا سیاسی یا خوه هنده‌ك ئالی دخوازن هه‌لبژارتن بهێنه پاشخستن”.
