پرتێن هه‌سته‌كا چیایی- ٢
عارف حیتۆ
ل به‌ر لێڤا ده‌ریایه‌كێ
حۆری یێن ده‌ریایێ كۆم ب كۆم
ل پێشوازی یا بارانێ بوون.
*
ل دارستانێ به‌رزه نابم
چونكو هه‌می دار و گیا
به‌وصه‌له‌یێن عه‌شقا منن.
*
دارباهیڤێن گۆڕستانێ
هه‌رده‌م ڕه‌شپۆش و ب خه‌من
نه‌دزانین بێنه دیلانێ.
*
پێشیه‌كێ خه‌و ژ من ڤه‌دڕه‌ڤاند
نامه‌یه‌كێ ژڤانه‌ك چاند
یا ژ من ڤه سه‌رخوه‌شی یه.
*
نه‌فه‌له‌كا ل سه‌ر ڕێكێ
هه‌موو ڕێبار ناس دكرن و
هه‌ر ل به‌ر پیا دپه‌رچقی!
*
هه‌كو به‌ره‌ف عه‌ڤران ڤه چوویم
چپكێن بارانێ ل هیڤیا من
عه‌شقا من بوون.
*
من گۆته چووچكه‌ك ئێك بالی
ئه‌ڤه بۆچی تو هند خه‌مگین و دنالی
ئه‌ز یێ ل ڤێره..!
*
خۆدیكه‌كا ب دیوارێ ژۆرا من ڤه
هه‌ر ڕۆژ تێڕا ل خوه مێزه دكه‌م
ته دبینم!
*
من هه‌می سه‌لكێن خوه یێن سێڤا
ڤالا كرنه به‌ر ده‌رگه‌هی…
مه‌مك ل مه‌یدانێ گرێل بوون.
*
