پشتی كوشتنا زه‌واهیری ئه‌مریكا هۆشداریێ دده‌ته تالیبانێ
ئه‌ڤرۆ:
سه‌رۆكێ ئه‌مریكا راگه‌هاند كو هێزێن وان شیاینه ل ئه‌فغانستانێ ئه‌یمه‌ن زه‌واهیری سه‌ركردێ رێكخستنا تیرۆرستی یا قاعیده بكوژن و وه‌زیرێ ده‌رڤه یێ ئه‌مریكا ژی راگه‌هاند كو تالیبانێ رێككه‌فتنا دۆحه بنپێ كریه و ئه‌و یه‌ك ژی ناهێته قه‌بوول كرن.
جۆ بایدن سه‌رۆكێ ئه‌مریكا راگه‌هاند كو هێزێن وان شیان ل ئه‌فغانستانێ سه‌ركردێ رێكخستنا تیرۆرست یا قاعیده ئه‌یمه‌ن زه‌واهیری ژناڤ ببه‌ن كو ئه‌و یه‌ك بۆ ئاشتی و ئارامیا ده‌ڤه‌رێ و جیهانێ پێنگاڤه‌ك گه‌له‌ك گرنگه، ئه‌مریكا دێ به‌رده‌وام بیت د شه‌رێ ژناڤبرنا تیرۆرێ دا و كوشتنا زه‌واهیری ژی سه‌ركه‌فتنه‌كا گه‌له‌ك مه‌زنه بۆ ئه‌مریكا و هه‌موو جیهانێ.
ل ئالیێ دی ئانتۆنی بلینكن وه‌زیرێ ده‌رڤه یێ ئه‌مریكا ژی راگه‌هاند كو كوشتنا سه‌ركردێ رێكخستنا تیرۆرستی یا قاعیده د ناڤ ئاخا ئه‌فغانستانێ دا نیشا دده‌ت كو تالیبانێ رێككه‌فتنا دۆحه بنپێكریه، چونكی به‌ری نها وان رێككه‌فتنه‌ك ل گه‌ل تالیبانێ ئیمزا كربوو كو ل گۆر رێككه‌فتنێ پێدڤیه تالیبان ب چو ره‌نگه‌كێ رێ نه‌ده‌ت كو رێكخستن و چه‌كدارێن تیرۆرست ئاخا ئه‌فغانستانێ ل دژی ئه‌مریكا و هه‌ڤپه‌یمانێن وێ بكار بینن، لێ مخابن كوشتنا زه‌واهیری ل پایته‌ختێ ئه‌فغانستانێ نیشا دده‌ت كو تالیبان پێگیری ب سۆزێن خوه و رێككه‌فتنا دۆحه نه‌كریه و ئه‌و یه‌ك ژی دێ ئه‌نجامێن خوه یێن گه‌له‌ك خراب هه‌بن، چونكی ئه‌مریكا ب چو ره‌نگه‌كێ رێ ناده‌ت ئه‌فغانستان ببیته جهێ تیرۆرستان و شه‌رێ ئه‌مریكا ل هه‌مبه‌ر قاعیده و رێكخستنێن دی یێن تیرۆرستی دێ ب هه‌موو ره‌نگه‌كێ به‌رده‌وام بیت.
وه‌زیرێ ده‌رڤه یێ ئه‌مریكا ئه‌و یه‌ك ژی دیار كر كو ٢١ سالن هێزێن ئه‌مریكا دووڤچوونا ئه‌یمه‌ن زه‌واهیری دكه‌ن، هێزێن تایبه‌ت یێن ئه‌مریكا ب سالانه چاڤدێریا زه‌واهیری و چالاكیێن وی دكه‌ن و د ئه‌نجام دا ئه‌مریكا شیا ب رێیا فرۆكه‌یێن بێ فرۆكه‌ڤان ئه‌یمه‌ن زه‌واهیری ل پایته‌ختێ ئه‌فغانستانێ بكوژیت، زه‌واهیری ئێكه ژ وان تیرۆرستێن مه‌زن كو هه‌تا نها زیانێن گه‌له‌ك مه‌زن گه‌هاندینه ئه‌مریكا و هه‌ڤپه‌یمانێن وێ و بێگومان شه‌رێ ل دژی قاعیده و رێكخستنێن دی یێن تیرۆرستی دێ د به‌رده‌وام بیت.
وه‌زیرێ ده‌رڤه یێ ئه‌مریكا د دووماهیا ئاخڤتنا خوه دا ب ره‌نگه‌كێ ئاشكرا هۆشداری دا تالیبانێ كو دڤێت ئه‌و رێ نه‌ده‌ن ئاخا ئه‌فغانستانێ ژ ئالیێ قاعیده و گرۆپێن دی یێن تیرۆرستی ڤه ل دژی ئه‌مریكا و هه‌ڤپه‌یمانێن وێ بهێته بكارئینان، چونكی ل گۆر رێككه‌فتنا دۆحه تالیبان به‌رپرسه ژ ئاشتی و ئارامیێ ل ئه‌فغانستانێ و دڤێت رێ نه‌ده‌ت چو رێكخستنێن تیرۆرستی ئاخا ئه‌فغانستانێ بۆ كریارێن تیرۆرستی بكار بینن، لێ مخابن ب كوشتنا زه‌واهیری ل پایته‌ختێ ئه‌فغانستانێ دیار بوو كو تالیبانێ پێگیری ب رێككه‌فتنا دۆحه نه‌كریه و بێگومان ئه‌و یه‌ك ب چو ره‌نگه‌كێ ژ ئالیێ ئه‌مریكا ڤه ناهێته قه‌بوولكرن و دێ ئه‌نجامێن خوه یێن خراب ژی هه‌بن.
