شاهێ د ئاشۆپێن من دا
رێژین حكمه‌ت
ئه‌ز ل كیرا ڤێ چیرۆكێ مه،
ل كیژ لاپه‌رێ په‌رتووكێ مه؟!
ما ئه‌ز ئه‌و شاهژنم
یا ژنوی ژ خه‌وێ هشیاربوویم و
ل شاهه‌كێ بگه‌رم؟
یان ئه‌ز چیرۆكه‌كا نه نڤیسی مه و
هێشتا من پێنوس بۆ هل نه‌گرتی و
هه‌می داڤێن چیرۆكێ ل به‌ر چاڤێن من و
ل كیژ خالێ ده‌ستپێكا وێ بنڤیسم و
ل كیژ خالێ ب دووماهی بینم!؟
پێدڤی په‌رتووكه‌كێ مه،
لاپه‌رێن وێ ناخێ من ڤاله بكه‌ن و
پێدڤی بهاره‌كێ مه، هه‌می گولێن وێ
خوه ل به‌ر به‌ژنا من ب نه‌خشینن
پێدڤی ب گرنژینه‌كێ مه
بێ ده‌نگیێ بشكێنیت
چیرۆكێن مه یێن زارۆكینیێ
هه‌ر دوباره و سێ باره‌نه
ترسا ژ پاشه‌رۆژێ
خوه ژ ده‌هه‌مه‌نێن مه نا به‌رده‌ت!
ئه‌و چیرۆكا درێژا بێ دووماهی
و هه‌ر شه‌ڤ ئه‌ز دگه‌ل شاهێ خه‌ونان و
مه هه‌می تشتێن دناڤا چیرۆكێ دا
ب رح د ئێخستن
یا بوویه ڕاستی
چیرۆكێن هه‌میان دووماهیه‌ك یا بۆ هه‌یی و
ئه‌ز شنی یا ل گه‌ل چیرۆكا ته دژیم و چ ل چاڤێن خوه بكم
ئه‌گه‌ر ل هه‌می قولاچكان ..
ل دره‌نگی شه‌ڤان، ل ناڤا په‌رتووكان
ل پشت شاشێ هه‌می كومبیوته‌ری ب تنێ ل ته بگه‌ریێن؟!
چاڤێن ته ژی چیرۆكه‌كا دی بێژن
چ ل دلێ خوه بكم!
هێشتا فێرنه‌بوویه سه‌مایا دووری ته و
هێشتا ل گه‌ل ریتما لێدانێن دلێ ته شه‌ڤێن خوه دكه‌ته سپێده و
ئه‌ز چبكم
ئه‌گه‌ر تو ل بێ ده‌نگییا ژی، د من بگه‌هی؟
ل خه‌ریبیا ژی ل من بگه‌ری!
ژ وێ هه‌مبێزێ خه‌ریب دبی یاته چ جار هه‌مبێز نه‌كری!
د ڤێ چیرۆكێ دا
ب پێكۆلێن ته بۆ ژ بیركرنا من
ته خوه ژ بیركر.
