ئه‌و كه‌رێ ب تنێ د خه‌وێ دا دزڕت
كورته چیرۆك
ته‌حسین ناڤشكی
بیرا من وه‌ك خه‌ونێن شه‌ڤان دهێت و ناهێت، ده‌مێ خودانێ ته یێ ناسیار ب تێجۆیێ چاڤعه‌وركی، ده‌یكا ته لۆلێ ژ رۆژهه‌لاتێ رووبارێ دیجله‌ی، پێش ده‌ینێ خوه‌ڤه ژ كابرایه‌كی ستاندی و ل پشتا ده‌وارێ خوه كری و هینایه گوندی. … راسته تێجۆی هه‌ر زوو ناڤێ ده‌یكا ته ژ لۆلێ گوهۆڕی و كره پزێ، لێ هه‌ر نه‌شیا ناڤێ لۆلێ ب ئێك جاری نه‌هێلت… ل وی ده‌می خه‌لكێ گوندی گه‌له‌ك لۆمه‌ی خودانێ دایكا ته دكر كو ئێكه‌مین ماكه‌ره د ئینته گونده‌كێ خودان تیتال و ره‌وشتێن ره‌سه‌ن و پاقژ و ژ وی خواست كو نه‌هێلته ل گوندی و ماكه‌را گه‌ور بزڤڕینته وی جهێ ژێ ئینای. لێ تێجۆیێ چاڤعه‌وركی ب خوه یێ مه‌ژی هشك، سه‌رێ وی بوو كه‌ڤر و ركمانیا هه‌موو گوندیان كر و كه‌سێ د خوه ڕا نه‌دیت خوه د وی هه‌لكه‌ت.
&&&
ئاریشه‌یا مه‌زن ئه‌و بوو كو ماكا ته پزێ یا ب تنێ بوو و گوهدرێژێن گوندی نه ئێك و دو بوون، هندی گوهدرێژ ب دووڤ دكه‌تن، تێجو نه‌چار كر كو پزێ كره د گۆڤێ ڤه و ئێدی نه‌هێلا گوهدرێژان ببینت… ده‌مه‌كی تێجۆی دیت زكێ ماكا ته ته‌مه‌ت تانكه‌كێ مه‌زن بوو و گوهاندینا وێ شۆڕ بوو. ئێدی ما ل هیڤیێ هه‌تا ده‌مێ وێ هاتی و زای و تو وه‌ك جه‌حشه‌كێ حه‌ساوی ئینایه هه‌بوونێ و گۆڤا گیانه‌وه‌ران ته كره مه‌یدانا له‌یزۆكه‌ك هزر نه‌كری و چو گیانه‌ران خوه ل به‌ر زیچك و له‌قێن ته نه‌دگرت.
&&&
هێشتا تو ب دروستی فرشك نه‌بووی، تێجۆی ژ شه‌مبۆزیا ته دزانی كو تو دی بی گوهدرێژه‌ك ركبه‌راز و داگێڕانێ بۆ چو گوهدرێژان ناكه‌ی.. رۆژ هاتن و مه‌هـ بۆرین و تو بوویه جه‌حشكه‌ك لیتكا د كه‌رمۆزان وه‌ردكی. ئێدی ته منه‌ت ب شیرێ دایكێ نه‌ما. تیجۆی ژی ب ده‌لیڤه دیت، ل بن گڤاشتنا گازنده‌یێن گوندیان ژ ئالیه‌كی، ژ ئالیه‌كێ دێ ژ به‌ر گوهدرێژێن گوندی چاڤه‌رێی ده‌ركه‌تنا ماكا ته، دوماهیێ ب لاندكه‌كێ بفرۆشته هۆستایێن لاندككه‌ر و ته بێ خودان بهێلت.
&&&
تێجۆی تێ دهینا ده‌ر، ژبلی حێچ بوونێ، ساخله‌ته‌ك بالكێشتر ل دڤ ته هه‌یه ئه‌و ژی ئه‌و بوو كو تو چو جاران دگه‌ل كه‌رێن گوندی نه‌دزڕی. ده‌مێ جاره‌كێ تو زڕیبایه ژی گوهدرێژێن گوندی د دووڤ ته را دزڕین، لێ ئاڕیشه ئه‌و بوو چو گوهدرێژان ژ وان نه‌دزانی زاریته‌ڤه بكن. تو ژی ب چارگاڤ د چوویه سه‌ر گووفكێ سۆتی و ته خوه دگه‌ڤازت و تو ب وان دكه‌نی و وان جووتك دهه‌ڤدو وه‌ردكرن.
&&&
ده‌مێ ئه‌ژده‌هایێ نیڤه‌كا وی مرۆڤ و نیڤا دی مارێ حه‌فت سه‌ر خویكا ره‌فتارێن خوه دای و بوویه نێچیرا هلما گاماسیێ پشتا حه‌فت ده‌ریان، هینگێ دگه‌ل شه‌ڕه‌نیخا وان ته پاسپۆرتا كۆچه‌ریێ وه‌رگرت.
ده‌مێ تو دزڕی خه‌لكێ باژێڕی هه‌موو دگه‌ل زڕینا ته دچوو به‌هه‌شتا خڕنیك و چیچه‌لۆكان. لێ ده‌مێ ته دیتی بێی خوارنا هرموون و پرۆتینێن فڕه‌نگی بوونه‌وه‌رێ ژ سه‌ری ڤه كۆتر و ژ نیڤێ پێدا شێرێ ب زه‌نگل یێ دبته بوونه‌وه‌ره‌كێ ناڤته‌نگ حه‌فتیار و سه‌ر داینه‌سۆر، هینگێ ته ئێكسه‌ر ده‌ست ژ كاركێشانا زڕینا سه‌رپشك به‌ر دا و ته پێناسه‌ك ب شه‌مبۆزی و حێچ بوونێ چاپ كر و زڕینا ته بوو گویێ كتكێ و ته ل بن ده‌همه‌نێن چیایێ قافێ ڤه‌شارت و ته نفرین ل گوهدرێژێن بۆ پێكه‌كێ ئه‌ره‌قێ دزڕن باراندن. به‌رسڤا وان ئه‌و بوو یاری ب ته دكرن كو تو نزانی د لاندكا راستیێ دا بزڕی، هه‌كه تو دزڕی ژی تنێ د خه‌ونان دا دزڕی و د وێ زڕینێ دا هشیار دبی و جه‌حشكێن خوه وه‌همی دكه‌ی.
