ئالایێ كوردستانێ
شه‌هره‌زاد نایف
ئالایێ من..
ده‌مێ ئه‌ز ل به‌ر سیبه‌را ته رادوه‌ستم
و سه‌ح دكه‌مه دیمه‌نێ ته
تو هۆیێ به‌رز و بلند
با پێلا ژ ته دبه‌ت
رۆژ داڤێن زێرین د ره‌نگێن ته دا
دبه‌ته خار
په‌یڤ و ئاوازێن ئه‌ی ره‌قیب
ل توخیبێن من و ته ڤه‌دده‌ن
ئها وی ده‌می بوونا منه
جیهان هه‌می بارا منه و
دلێ من به‌ری ده‌ستێ
من سلاڤێ بۆ ته دهنێریت..
ل به‌ر چاڤێ من.. تو ئه‌ڤرۆكه..
ژ گاره‌یی و هه‌وه‌سا ئاراراتی بلندتری
تو ژ سنوورێن ئه‌شقا شه‌هیدی و
ئاخا وه‌لاتی مه‌زنتری
تو ژ هه‌بوونا دیرۆكێ دوورتری
تو ژ كۆمارا میدیا و مهابادێ كه‌ڤنتری
تو ژ هه‌می پیرۆزیێن وه‌لاتێ من پیرۆزتری
بهایێ به‌رزبوونا ته بلندبوونا ته
گران گران من دابوو
شه‌هیدبوونا برایێ من بوو
سێداره‌دانا پیره بابێ من بوو
رۆندكێن چاڤێن دایكا من بوون
هه‌ی هۆ ئالایێ من
مه چه‌ند رۆژێن ره‌ش بۆراندن
دا ل بن سیبه‌را ته
ل واره‌كێ ئارام
ده‌ڤێ تێهنی ب قورچه‌كا ئازادیێ شل كه‌م.
