دەزگەهێ خێرخوازیێ بارزانی هاریکاری گەهاندینە پتر ژ سەد هزار خێزانان
ئەڤرۆ
ژ بەر بیڤەلەرزا ل باکور و رۆژئاڤایێ کوردستانێ هەتا نها پتر ژ چل هزار کەسان جانێ خوە ژ دەست داینە و هژمارا برینداران ژی ژ 120 هزار کەسان دەرباز دبیت، دەزگەهێ خێرخوازیێ بارزانی وەکو ئێکەم دەزگەهێ خێرخوازی شیا هاریکاریان بگەهینتە باکور و رۆژئاڤایێ کوردستانێ، کو ئەو یەک بوویە جهێ دلخوەشیا هەر کوردەکێ.
عەلی کوتلو چالاکڤانێ کورد ل ئامەدێ بۆ ئەڤرۆ دیار کر کو نها دەزگەهێ خێرخوازیێ بارزانی ل گەلەک باژێرێن باکورێ کوردستانێ هاریکاریا خەلکی دکەت، رۆژانە ل باژێرێن وەکو مەرەش، ئامەد، سەمسور و گەلەک باژێرێن دی خوارنا گەرم بۆ وەلاتیان دهێتە ئامادەکرن و بەردەوام ژی پێدڤیایێن رۆژانە ل سەر خەلکێ لێقەومی دهێنە دابەشکرن، کو ئەو یەک ژی براستی کارەک گەلەک مەزنە.
ناڤهاتی ئەو یەک ژی دیار کر کارمەندێن دەزگەهێ خێرخوازیێ بارزانی وەکو پێشمەرگان ب رەنگەکێ فیداکاری هاریکاریا خەلکێ لێقەومی دکەن، کارێ ئەو دکەن براستی ژی کارەک گەلەک مەزنە و جهێ شانازیێ یە بۆ هەموو کوردان، پشتی هاریکاریێن بەردەوام یێن دەزگەهێ خێرخوازیێ بارزانی بۆ باکور و رۆژئاڤایێ کوردستانێ نها هەلوەستێ گەلەک کەسان ل هەمبەر کوردان هاتیە گوهۆرین، بەری نها گەلەک کەسێن شوفینی بەردەوام دژبەریا بارزانی و هەرێما کوردستانێ دکرن، لێ نها مرۆڤ دبینیت هەلوەستێ وان وەکو بەرێ نەمایە، بێگومان ئەو یەک بۆ مە هەموو کوردان جهێ سەربلندیێ یە.
زەهرا یایلاجی ئەو ژی نها ل مەراشێ هاریکاریا خەلکی دکەت ب رێیا تۆرێن جڤاکی راگەهاند، کو دەزگەهێ خێرخوازیێ بارزانی کارەک گەلەک مەزن دکەت، یا دی سەرۆکێ هەرێما کوردستانێ ب خوە سەرەدانا خەلکی کر و پشتەڤانیا خوە بۆ وان دیار کر، هەڤخەمیا خوە بۆ خەلکێ لێقەومی دیار کر، ئەو یەک کارەک گەلەک مەزنە، ئەز هیڤیدارم پشتی ڤێ کارەساتێ پەیوەندیێن هەرێما کوردستانێ و تورکیا باشتر لێ بهێن، راستە نها ژی پەیوەندی دباشن، لێ مە دڤێت هێشتا باشتر ژی ببن، چونکی هەرێما کوردستانێ د دەمێ هەری تەنگاڤ دا هاریکاریا تورکیا کر و سەلماند باشترین جیرانا تورکیا یە، ژ بەر هندێ ژی دڤێت بەرپرسێن تورکیا هەلوەستێ خوە ب رەنگەکێ گەلەک باش ل هەمبەر هەرێما کوردستانێ بگوهۆرن، چونکی هەر گوهۆرینەکا باش د هەلوەستێ تورکیا دا روو بدەت دێ بیتە ئەگەرێ باشتربوونا پەیوەندیێن هەر دو ئالیان و دەمێ پەیوەندیێن هەر دو ئالیان بهێزتر لێ بهێن، ئەو یەک دێ بۆ وەلاتیان ژی گەلەک باش بیت.
ل گۆر زانیاریێن ئەڤرۆ هاریکاریێن دەزگەهێ خێرخوازیێ بارزانی بۆ خەلکێ لێقەومی ل باکور و رۆژئاڤایێ کوردستانێ ب ڤی رەنگی نە:
– عەنتاب 24 هزار و 285 خێزان.
– سەمسور 6 هزار و 900 خێزان.
– روحا شەش هزار و 980 خێزان.
– ئەدانا 9 هزار خێزان، ئامەد 4 هزار خێزان.
– مەراش 32 هزار و 332 خێزان
– مالاتیا 4 هزار و 580 خێزان.
– عەفرین ژی 10 هزار و 915 خێزان.
