ئەڤرۆ دو فیرقەیێن نوو یێن پێشمەرگەی دێ دەست ب كاربن
هەولێر، قائید میرۆ:
بڕیارە ئەڤرۆ رۆژا سێشەمبی دو فیرقەیێن سەربازی ژ لایێ وەزارەتا پێشمەرگەی ڤە بهێنە راگەهاندن و بەرپرسەكێ وەزارەتا پێشمەرگەی ژی دبێژیت: د قووناغێن داهاتی دا دێ هەژمارەكا فیرقەیێن دی ژی هێنە پێكئینان.
عەمید عوسمان ریشە، رێڤەبەرێ گشتیێ راگەهاندنا وەزارەتا پێشمەرگەی بۆ رۆژناما ئەڤرۆ دیار كر، ئەڤرۆ ژ لایێ وەزارەتا پێشمەرگەیڤە دێ دەست ب كاربوونا دو فیرقەیێن سەربازی هێتە راگەهاندن و گۆت: «ئەو دو فیرقەیێن سەربازی سەر ب وەزارەتا پێشمەرگەیڤەنە و بەری نوكە كار بۆ دامەزراندنا وان دو فیرقەیان هاتیە كرن و د چارچوڤێ ئێكگرتن و رێكخستنا هێزێن پێشمەرگەی دا ئەو دو فیرقە هاتینە دامەزراندن».
عەمید عوسمان ریشە گۆتژی: «ژبلی هەردو فیرقەیێن هاتینە دامەزراندن بڕیارە هێشتا فیرقە و لیوایێن نوو یێن پێشمەرگەی بهێنە پێكئینان و هەموو ژی دێ سەر ب وەزارەتا پێشمەرگەی ڤە بن و چەك و كەلوپەلێن سەربازی دێ بۆ هێنە دابینكرن، هەروەسا ژ لایێ مەشق و راهێنانانڤە دێ هێزێن رێكخستی و موكوم بن و دیسپلین و بڕیارێن سەربازی ژ لایێ هێزێن هاتینە دامەزراندن ڤە دێ هێنە بجهئینان».
