دو یانێن به‌غدا دخوازن نێچیرا خوه ب رێكا دهۆكێ و زاخۆ بكه‌ن
ئه‌ڤرۆ نیوز، هه‌ژار مه‌عروف:
چاڤه‌رێ دهێته‌كرن سوباهى ل باژێرێ به‌غدا هه‌ردو نوونه‌رێن پارێزگه‌هێ دخۆلا پلا نایاب یا عیراقێ دا یاریێن خوه ژ ده‌رڤه‌ى یاریگه‌هێن خوه بكه‌ن ژ چارچوڤێ یاریێن گه‌را چارێ ژ قوناغا دوێ كو تیما ته‌پا پێى یا دهۆك ئه‌ركێ وێ دێ یێ ب زه‌حمه‌ت بیت ده‌مێ هه‌مبه‌رى یانه‌یا به‌غدا بیت، تیما به‌غدا ل چار یاریێن بورى نه‌شیا سه‌ركه‌فتنێ توماربكه‌ت و هاریكارێ راهێنه‌رێ تیما به‌غدا ئه‌حمه‌د خه‌له‌ف دیاركرى یه ئه‌و ئه‌و دخوازن ب رێكا ڤێ یاریێ ده‌ستپێكه‌كا نووى توماربكه‌ن و سه‌ركه‌فتنا وان لسه‌ر دهۆك دێ بیته پێنگاڤه‌كا باش بۆ یاریێن بهێت.
به‌رامبه‌ر راهێنه‌رێ یانه‌یا دهۆك حازم سالح دیاركریه یاریا وان یا سوباهى دێ گه‌له‌ك یا ب زه‌حمه‌ت بیت ژبه‌ركو ئه‌و دێ یاریێ به‌رامبه‌ر ئێك ب هێزترین یانه‌یێ كه‌ن دخۆلا عیراقێ دا و زێده‌بارى یاریكه‌رێن تیمێ گه‌له‌ك ماندى نه چونكو به‌رى چار رۆژا یاریه‌كا ب زه‌حمه‌ت دخۆلا كوردستانێ دا كرى نه.
ژلایه‌كێ دى ڤه نوونه‌را دوێ یا پارێزگه‌هێ تیما زاخۆ دێ هه‌مبه‌رى یانه‌یا جه‌ویه بیت ل یاریگه‌ها جه‌ویه كو دڤێ یاریێ دا تیما زاخۆ دێ بزاڤێن مه‌زن كه‌ت پاراستنا ئه‌و ئه‌نجامێن خوه یێن قوناغا دوێ كه‌ت كو ل سێ یاریێن بورى دا شیایه حه‌فت خالان كومبكه‌ت، به‌رامبه‌ر تیما جه‌ویه دێ بزاڤێ كه‌ت ئێكه‌م سه‌ركه‌فتن ب سه‌رپه‌رشتیا راهێنه‌رێ خوه یێ نووى عه‌باس عه‌ته‌یه ب ده‌ستخوڤه بینت.
