پەرلەمانتارەك: ب ئیمزاكرنا ڕێككەفتنا هەولێرێ و بەغدا دو بڕگێن كارنامەیا كابینەیا نەهێ هاتنە بجهئینان
ئەڤرۆ
عەدنان رێكانی
ئەندامەكا پەرلەمانێ كوردستانێ ژ پێكهاتێ توركمانی ڕاگەهاند: ب ئیمزاكرنا ڕێككەفتنا دناڤبەرا هەرێما كوردستانێ و حوكمەتا ئیراقا فیدرال دا سەبارەت بادەكا پەترۆلی، مەسرور بارزانی دو بڕگەیێن گرنگێن دیتر یێن كارنامەیا كابینەیا نەهێ یا حوكمەتێ بجهئینان.
سارا دلشاد ئەنداما پەرلەمانێ كوردستانێ گوت» ل گەل دەستبكاربوونا كابینەیا نەهێ یا حوكمەتا هەرێما كوردستانێ، كۆمەكا قەیران و ئاستەنگان كەفتنە درێیا و ێ دا، بەلێ سەرۆكێ حوكمەتا هەرێمێ هەموو بزاڤ دكرن بۆ ڕێككەفتنێ و نەهێلانا وان ئاستەنگان، كو دووماهیا وان بزاڤان ئیمزاكرنا رێككەفتنێ بوو ل گەل حوكمەتا بەغدا «.
هەروەسا دیاركر» ئەڤ ڕێككەفتنە پێنگاڤەكا گرنگە و دێ بیتە بنەمایێ ڕێككەفتنێن دیتر سەبارەت پشكا هەرێما كوردستانێ ژ بودجەیا گشتی یا ئیراقێ، كو چەندین سالە سەرەرای ڕێككەفتن و بزاڤێن هەرێما كوردستانێ، بەلێ پشكا هەرێمێ نەهاتیە هنارتن، هەروەسا دبێژیت كو ئەو ڕێككەفتن دێ بیتە دەستپێكەك بۆ دەركرنا قانوونا پەترۆل و غازێ ل ئیراقا فیدرال».
سارا دلشاد دووپاتكر ژی» ئەو ڕێككەفتنە شەرعیەتێ ددەتە كەرتێ وزەیا هەرێما كوردستانێ وئێدی پەترۆلا هەرێما كوردستانێ ل بازارێن جیهانێ ب بهایێن كێم ناهێتە فرۆتن و دهەمان دەمدا دەلیڤەیەكا باشە بۆ پێداچوونا وان گرێبەستێن پەترۆلێ ل گەل كۆمپانیێن بیانی هاتینە ئیمزاكرن، ب ئەگەرێ شەڕێ داعشێ و هاتنا هەژمارەكا مەزن یا ئاوارە و پەنابەران و بڕینا بودجەیا هەرێما كوردستانێ ژ ئالیێ بەغدا ڤە، وێ چەندێ بارەكێ گران ئێخستبوو سەر ملێن خەلك و حوكمەتا هەرێما كوردستانێ«.
دیاركر» هەرێما كوردستانێ چەندین سالە هەموو بزاڤان دكەت كو مووچێ مووچەخوران دابین بكەت، كێمترین گوژم ژ داهاتێ كوردستانێ بۆ بودجێن وەبەرئێنانێ دهاتە تەرخانكرن و داهاتی تنێ تێرا مووچەی دكر و هندەك جاران ژی تێرا نەدكر، بەلێ بڤێ ڕێككەفتنێ ودەربازكرنا پرۆژەیێ قانوونا بودجەیا ئیراقا فیدرال، ئێدی هەرێما كوردستانێ پشتی گرەنتیكرنا مووچێ مووچەخۆران، دێ پیتەدانەكا زێدەتر دەتە ئاڤەدانكرنێ و وەبەرئێنانێ«.
هەروەسا گوت ژی» سوپاسیا بزاڤێن سەرۆكێ حوكمەتا هەرێما كوردستانێ و ڕاستگۆیا وی دكەین، ل گەل وان سۆزێن ب خەلكێ كوردستانێ داین، ددەمێ دەستبكاربوونا كابینەیا نەهێ كو بڤێ ڕێككەفتنێ دو بڕكێن گرنگ یێن كارنامەیا كابینەیا نەهێ هاتنە بجهئینان».
دهیچتە زانین ئەو دو بڕگەیێن كارنامەیا كابینەیا نەهێ یا حوكمەتا هەرێما كوردستانێ كو پەرلەمەنتار سارا دلشاد ئاماژە پێكرین، ل ئاستێ پەیوەندیێن دناڤبەرا هەولێرێ و بەغدایێ دا ژ ڤان هەردوو بڕگان پێكهاتبوون:
بڕگا شەشێ : دێ بزاڤان كەین بزووترین دەم، بادەكا پەترۆل و غازێ ل سەر بنەمایێن مادێ (111 و 112 ) یێ دەستوورێ ئیراقا فیدرال چارەسەر كەین وقانوونا پەترۆل و غازێ ژ ئالیێ جڤاتا نوونەرێن ئیراقێ ڤە بهێتە دەركرن، هەروەسا دێ بزاڤێ كەین دەستەیا گشتی یا چاڤدێریا داهاتێن فێدرالی وەكو مادێ (106) د دەستووری دا هاتی بهێتە دامەزراندن.
بڕگا حەفتێ: دێ داكۆكیێ ل سەر بەرچاڤ وەرگرتنا پشكا هەرێما كوردستانێ د دامودەزگەهێن حوكمەتا ئیراقا فیدرال دا ب گشتی و ل وەزارەتێن دەرڤە و بەرگریێ و پەترۆلێ بتایبەتێ كەین.
