هەلبەستا كوردی ل گۆر بندەستیا مللەتێ كورد نە كێمی هەلبەستا جیهانێ یە
هەڤپەیڤین:
دەمهات دێركی
ئەڤرۆ: برێز شیلان دۆسكی، گەر ژبۆ تە نە گرانبە، ب چەند هەڤۆكێن كورت شیلان دۆسكی ب خوەندەڤانێن رۆژنامەیا ئەڤرۆ بدە ناسكرن، شیلان دۆسكی كییە و هەتا ئیرۆ د وارێ وێژەگەریێ دە چەند بەرهەم وەك پرتووك نڤیساندنە؟
بەرسڤ: ناڤێ من شیلان دۆسكی یە. ژ خەلكێ باژارێ دهۆكێ مە. دو بەرهەمێن من هاتنە چاپكرن. بەرهەمەك ب ناڤێ “گولفەرهەنگ“ ب زمانێ كوردی-ئەلمانی یە، بەشێ یەكەم ژ ١١٠٠ گول، كولیلك و روەكان پێك تێ، هەموو وێنە ژی من ب خوە گرتنە، پەرتووك ٥٥٠ لاپەرە، شەش سالان من ل سەر كار كریە و د ئادارا ٢٠٢٠ان دە ل وەشانخانەیا هۆدگە ل ئەلمانیایێ هاتیە چاپكرن. دویەمین بەرهەما من دیوانا هەلبەستان ب ناڤێ(هەلارا ئەڤینێ)یە، كو ل وەشانخانەیا ئامەدێ پایتەختا باكورێ كوردستانێ هاتیە چاپكرن. پەرتووك ژ ١٠٧ لاپەران پێك تێ و كەڤالێ پەرتووكێ ژ ئالیێ شێوەكارا هێژا سروە بەرزەنجی ڤە هاتیە ئامادەكرن.
ئەڤرۆ: تە كەنگی دەست ب نڤیساندنا هەلبەستێ كر، دەما تە دەریێ ڤێ جیهانا هەستان كو دبن پەیڤێن ژ نیشانان و خوەشكبوونێ و ئێشێ..د ناڤا چ مەرجان دە دژیایی و ئەگەر چ بوون تو دەرباسی ڤێ جیهانێ بوویی؟
بەرسڤ: دەما من چاڤێن خوە ل ئەڤێ دونیایێ ڤەكرن، بەرمێژەك د همێزا وارێ خوە دە پەنابەر بووم، برینەكا دامایی قولنگێن گرنژینێ ل سەر لێڤێن من فراندن! ل رێكەكێ دگەریام دا تۆزا ژانێن ب سالان ل سەر كەڤالێ بێریێن هزرێن خوە داوەشینم، تلیێن من ب لەوەندیێن بەهیێ پێنووس هەمبێزكر. من كۆنەك ژ بۆ هەستێن تەنێبوونا خوە ڤەدا و ب ئەڤی ئاوایی د تەمەنێ جوانیێ دا من دەست ب نڤیساندنا هەلبەستێ كر.
ئەڤرۆ: ئەز نە شاش بم، دەستپێكا نڤیساندنا وە د وارێ وێژەگەریێ دە ب زمانێ فارسی بوو، گەلۆ چ جوداهی د ناڤبەرا زمانێ داییكێ و زمانێ بیانی دە هەیە، و سەدەم چ بوون تە ب زمانێ فارسی دەست ب نڤیساندنێ كر و وەكە هەست و روه جوداهیا زمانێ داییكێ ژ زمانێ بیانی چیە؟
بەرسڤ: زمانێ یەكەم كو ئەز پێ فێری ئاخفتنێ بووم زمانێ دایكێ یێ كوردی بوو. ئەز ل دوەمین باژارێ هەری مەزن ل رۆژهەلاتێ كوردستانێ دژیام. د دەستپێكا سەردەما دەستهەلاتداریا ئیسلامی، نشتەجهێن هەرێما ئوورمیێ ژ كورد و خرستیانان پێك دهات، لێ رۆژ ب رۆژ ب دەمێ رە ترك ژی ل سەر نفووسا ئوورمیێ زێدە بوون و د سەردەما تركێن خەزنەوی دە، پشترە تركێن سەلچووقی، ئوورمیێ خوەدی نفووسا مەزنیا تركان بوو. لەوما ژی خوەندنا من ب فارسی بوو، لێ د دبستانێ دە زێدە ب تركیا ئازەری ئەم دپەیڤین و كۆمێن هەڤالێن كو خرستیانێن ئاشووری و ئەرمەنی بوون ئەم دكێشانە دۆرا خوە…
باندۆرا رەوشا فێربوونا وێ سەردەمێ ب نڤیسكی ئەز فێری فارسی بووم و د بەڕا ژی فێری ئازەری و هندەك ئەرمەنی بووم. پشتی ب داویبوونا دبستانا سەرەتایی، یەكەم كەسێ كو تێكەلیێن نڤیساندنێ ب زمانێ كوردی د ناڤبەرا مە دە چێ بوو مامێ من یێ پاكرەوان بوو، كو هەتا ئانا ژی نامەیێن دەستخەتێ وی ب زمانێ كوردی من ل دەڤ خوە پاراستنە. ژ بەر كو دەستپێكا فێربوونا خوەندنێ ب زمانێ بیانی بوو و تەمەنێ جوانیا من بوو، من بێتر دكاری هەستێن خوە ب ئەڤی زمانی بینم زمان. لێ ڤیان و ئەڤینا كو من بۆ وەلات و زمانێ خوە هەبوو ل گۆر شیانێن خوە ئەز فێری نڤیساندنا كوردی ب تیپێن ئارامی بووم. ژ ٢٠٠٥ێ هەتا نها ئەز ب تیپێن لاتینی دنڤسینم. جوداهیا د ناڤبەرا زمانێ كوردی و فارسی دە بۆ من وەك تو ژ زارۆكتی ڤە زارۆكەكی بینی و خوەدان بكی لێ نە ژ خوین و جانێ تە بە هەستێن زمانێ دایكێ ژیانەكا دن د دلێ مرۆڤ دە دڤەژین…
ئەڤرۆ: ب چاڤێ هەلبەستێ، شیلان دۆسكی هەلبەستا كوردی و ب تایبەتیا هەرێما كوردستانێ د ئاستێ دە دبینە، گەلۆ ئەم دكارن بێژن هەلبەستا كوردی نە كێمییا جیهانێ یە؟
بەرسڤ: نابە ئەم هەلبەستا كوردی گرێدایی هەرێمەكا تایبەت بكن. ژ هێلا ئافرێنەری و داهێنانیێ ڤە هەلبەستا كوردی ل گۆر بندەستیا مللەتێ كورد نە كێمی هەلبەستا جیهانی یە، لێ ژ هێلا بەلاڤبوونێ ڤە و كێمبوونا وەرگێرانێ ئەو هەلبەست ل پەرتووكخانەیا جیهانی بەلاڤ نەبوویە.
ئەڤرۆ: د وارێ وێژەگەریێ دە، سالێن خەریبیێ چ دا و چ بر؟ باندۆرەك چاوا ل شیلان دۆسكی كر؟
بەرسڤ: رەوشا پەنابەریێ، شەرێن دەولەتێن داگیركەر ل دژی كوردان و شەرێن براكوژیێ ژی، گەلەك دەرفەتێن زێرین ژ دەستێ من رەڤاندن و ئەو دەرفەت بۆ من چێنەكر كو بشێم نڤیسێن خوە بگەهینم دەستێ خوەندەڤانان، لێ دیسا ژی كۆچبەریا من بۆ وەلاتەكێ ئەورۆپی دەلیڤەیەكە دن دا من و بێتر دەرگەه ل بەر من ڤەكر، كو بكارم ڤێ جارێ بەرهەمێن خوە بپارێزم و بگەهینم دەستێ خوەندەڤانان و فێربوونا زمانێ ئەلمانی و بەرێ ژی زانینا من ب گەلەك زمانێن دن، بوارێن كار ل بەر من بێتر كر، نە تەنێ مام ب وێژەیێ ڤە، لێ من ئێدی بەرێ خوە دا سروشتی و پێزانینێن ل سەر گول و كولیلكان و ب تایبەتییێن ب ئاخا كوردستانێ ڤە گرێدایی..
ئەڤرۆ: ئەڤ دەمەكە شیلان دۆسكی خەبات یان نڤیساندنا هەلبەستێ كێم كری یە، چما، گەلۆ هەلبەست نەما بەرسڤا جیهانا تە ددە یان تو ژێ تێر بوویی، یان ژی تە خەباتەك دن دایە پێشیا خوە؟
بەرسڤ: من نە تەنێ نڤیساندنا هەلبەستێ كێم كری یە، لێ بەشێ دویەمیێ ژ پەرتووكا خوە گولفەرهەنگ ژی، من ئەڤێ دەمێ راوەستاندیە، كو ب هەزاران وێنە د گەشتێن خوەیێن باكور، باشوور و رۆژهەلاتێ كوردستانێ گرتنە د نیڤی دە و هەروەسا پەرتووكا خوەیا جیهانا كڤاركان ژی پێ رە دا راوەستاندن. چونكی ژ سالا ٢٠١١ان دە من پرۆژەیەكی گرنگ دایە بەر خوە، ئێدی ئەز ل سەر پەرتووكەكێ ب ناڤێ كوردجا/كوردیكا(لیستەیا ناڤێن زانستییێن كوردجا، جاردوچۆروم) كار دكم. من ئەڤ پر گرنگ دیت كو ئەز بكاربم كارەكی هێژا ژ مللەتێ خوە رە بكم،(كوردجا،كوردیكا) خوەندنەكە پر ژێ رە گەرەكە و ڤەكۆلینەكا ب هووربینی، چونكی ئەڤ ب دیرۆكا وەلات و مللەتێ مە ڤە گرێدایی یە. چ شیانێن من هەبن دێ ژ بۆ مللەتێ خوە ب گۆری بكم.
بابێ منی پاكرەوان، ب تفەنگا خوە پێشمەرگایەتی دكر، ئەڤرۆ ئەز رێكا وی ب پێنووسا خوە بەردەوام دكم.هەر گولەك، دارەك، كەسكاتیەك د گرتیگەهێن فلۆراداگیركەران دە دیل و گرتی بە، پەنابەرەك د فلۆرا جیهانی دە بوویە، كو ب هەموو شیان و لێكۆلینێن خوە ئەز دخوازم وان رزگار بكم و ل هەمبێزا پیرۆزا فلۆرا كوردستانێ ڤەگەرینم، دخوازم ئیسال د چلسالیا سالڤەگەرا شەهیدبوونا بابێ خوە دە دیاریی رەوانێ وی و تەڤایا شەهیدێن كوردستانێ بكم كو بەرەڤانی ژ ئاخا مە كرن و ئیرۆ ئەم د بن سیبەرا خەباتا وان ب سەربلندی دژین.
ئەڤرۆ: گۆتنا تەیا داوی؟
بەرسڤ: سوپاسیا رۆژنامەیا ئەڤرۆ و تەیێ رێزدار دەمهات دێركی دكم. كو د رێیا وە دە پەیاما خوە بگەهینمە خوەندەڤانێن زمانێ كوردی. سەركەفتی بن.
