عەبۆیێ خاتینێ
د. ئەمجەد عوبەید
دگەل تێشتەگەهێ، پشتا خوە دا گوندی و بەرێ خوە دا باژێری ژبو ب دوماهی ئینانا موعامەلەكێ..
وێ رۆژی هەمیێ ل ڤێ رێڤەبەریێ بۆ یا دی، لدەف ڤی عەریزچی بۆ یێ هەنێ، هەمی هەول دان كو وێ موعاملێ ب دویماهی بینیت دا دگەل هەمان ترومبێل ئەوا پێ هاتی ب زڤریتەڤە گوندی، لێ وێڤە ژكیڤە، چارێكا كارێ وی ژی ب رێڤە نە چوو، ژ بەر كو نیڤا رێڤەبەران ل جهێ خوە نەبوون، نیڤا دیژی د كۆمبونان دا بوون.
یێ پیێن خوە ب زوری بدویڤ خورا رادكێشیت و لسەر نێزیكترین كورسیك ل چایخانێ خوە پەحن كر.
ب رێڤە نە چوونا كارێ وی و هورنێن ترومبێلان و دویكێلا موەلیدان و قەرەبالغا مروڤان، سەوداسەر كربوو.
هەڤالەكێ وی ل گوندی گۆت بوویێ خارنێ ل خارنگەهان بخوە، لێ چایێ لێ ڤەنە خوە، ئەو گەلەك نەخوەش چێ دكەن.. لەورا چایخانەك نیشا دا بوو و گوت بوویێ ناڤێ خودانێ وێ ( عەبۆیێ خاتینێ) یە و ژییێ خوە هەمی یێ ب ڤی كاری ڤە بری و چایەكا عەجێب چێ دكەت.
پشتی ل سەر كورسیكێ خوە تەرحان كری، زەلامەكێ پتر ژ نیڤا ژییێ خوە بۆراندی كو نێزیكی ژییێ وی ژی بوو، ب خێر هاتن لێ كر وگۆتێ:
مام بۆ تە چایەكا چەوا بینم؟
سەرێ خو بلند كر و د بەرسڤێ دا گۆتێ:
توی عەبۆیێ خاتینێ؟
– بەلێ عەین ئەز ئەوم.
– مامو: هەما ئێكا ل دویڤ زەوقێ خوە بینە، كەس وەكی تە لاو شولێ خوە نوزانیت.
فڕا ئێكێ ل چایێ دا، دل نەدا زوی ب داعوریت هندی یا خوش بوو، لەورا بێهنەكا خووش د دەڤێ خوەدا ئینا و بر و ل هەمی قولاچكێن دەڤێ خو گێراند.
پشتی بنك ل پەیالا چایێ دای، عەبۆی گۆتێ: مام ئێكا دیژی بۆ تە بینم؟
گوتێ: مام جۆتەكی بینە.
دەمێ ئەو هەردو ژی ڤەخوارین، جارەكا دی عەبۆی ژێ پرسی كا چایەكا دی ژی د خوازیت؟
سەر ژێهەل سەح كرە عەبۆی و دگەل سەربادانێ گۆتێ:
مام فایدە ناكەت، ڤیابا تو ژنا مروڤی بای و چادانكێ تە ل سەر كوچكی با و هەر بێهنەكێ تە چایەك دابا مروڤی.
