ئازراندنا پرسیاران
شیان كانیساركی
هەردەم ئەو پەرتووكا پرسیارێن گرنگ و كویر و دویر د ئازرینیت، دبیتە جهێ سەرنجا كێم كەسان یان خوندەڤانان، چونكی ڕاستی ژی مە دڤێت یان نەڤێت باهرا پترا خواندەڤانان» ب تایبەت ل دەڤەرا مە» خواندەڤانێن سەرڤەسەرڤەنە، ئەگەر نە وەسا بیت، بلا ئەم پێكڤە تەماشە بكەین ئەرێ كیژ جۆرێ پەرتووكان ل بازاری پتر بازارێ وان یێ گەرمە؟ ئەگەر مە هند خواندەڤان هەبن كۆ بشێن لسەر تێكستەكی ڕاوەستن و ڕەخنەبكەن داكۆ نڤیسەر»وەرگێڕ» ژی ئێدی پێداچوونەكێ ب بەرهەمێن خۆ دا بكەن. ژبلی وێ هەمیێ خالا من دڤێت باس بكەم و لسەر ب ڕاوەستم( بەرهەمە)و جۆرێ وی و كا چ دناڤ ناڤەڕۆكێ دا هەیە، ئەرێ دێ چ ل خواندەڤانی زێدەكەت یان كێم كەت؟ ئەرێ دێ پرسیارەكێ د سەرێ وی دا ئازرینیت كو پەرتووكێ بگریت و بچیت ب دەهان ژیدەران ب خوینیت داكو بەرسڤەكێ بۆ وێ پرسیارێ ببینیت، ڕاستی ژی كێم پەرتووك د وەسانە، ئەگەر هەبن ژی كەس نا خوینیت. ڕاستی ژی مرۆڤ دشێت بێژیت جاران ئەڤ چەندە ل دویڤ جۆرێ كەسی»خواندەڤانی» دمینیت كا خواندەڤانەكێ سادەیە یان بیركویرە! بۆ نموونە؛ ئەڤ پەرتووكا نوكە لبەر دەستێ مە « ب تنێ ئەڤرۆ دێ ژیم» یا نڤیسكار « بەدەل گابێركی» پەرتووكەكا گەشەپێدانێ یە، لێ هندەك پرسیارێن گەلەك جوان و جهێ ڕاوەستیانێ ب خۆ ڤە د گریت( بۆ من ئەڤ پرسیارە گەلەك د گرنگن پتر ژ بابەتێن دی یێن پەرتووكێ) ژبلی بابەتێن پێشنیارێن جوان و سەربورێن كەسێن سەركەفتی د ژیانا خۆ دا ل جیهانا مە یا دوهی و ئەڤرۆ. وەكی دبێژن( گوهداریا هەمیان بكە، لێ وەكی وان نەكە).
كۆمەكا وان پرسیارێن نڤیسەری ژ خواندەڤانی كرین، دێ دیاركەم و هندەك ژی دێ مینن كو هوین ب چن و ب خوینن دا پتر لسەر ڕاوەستن، نڤیسەر ل جهەكی د پرسیت « ئەرێ ترس ژ هەر تشتەكی یا دروستە؟» « ئەو چ تشتە مرۆڤی ژ سروشتێ وی دویر دكەت؟» كی دشێت مرۆڤی ژ نەزانین و نەفامیێ ڕزگار بكەت؟» ئەرێ ڕاستە ئەو پارەیە هەمی تشت ژ مرۆڤی ستاندین؟» چ بكەم بۆ هندێ ژیانا خۆ بەرەف باشتر ب گوهۆڕم؟» بۆچی خەیالێن مە ژ ژیانا مە جوانترن؟» مایتێكرنێ د ژیانا مرۆڤان دا بكەین؟» كی مرۆڤەكێ زانایە؟» ئەرێ ئەڤیندارێن كێ بین؟ « كریارێن تە چ پەیوەندی ب ناڤخۆیا تەڤە هەیە؟»….هتد
ئەز ل ڤێرێ بەرسڤا چ پرسیاران ژ ڤان نادەم، چونكی پتر پرسیار یێ لبەر دەستێ من و نوكە ئەز یێ دویڤچوون و لێگەریانێ بۆ دیتنا بەرسڤا هندەك ژوانا دكەم، ب تنێ یا من ژ خواندەڤانێ مە دڤێت ماندیبوونا نڤیسەرێن مە بەرچاڤ وەرگرن» ئەز نا بێژم ب تنێ ب خوینن» نەخێر بەلكی بینن و ڕەخنە بكەن و بەرسڤا وان پرسیاران بدەن و لگەل ناخێ خۆ بكەڤە گەنگەشێ داكو تو و ئەو پێكڤە ب گەهنە بەرسڤا ڕاست.
ژێدەر:پەرتووكا: ب تنێ ئەڤرۆ دێ ژیم. نڤیسین: بەدەل گابێركی.ژ.لاپەڕان: 178
