خۆشاڤا خەونان
خالد عەلی سلێڤانەیی
دیاری بۆ “مرۆڤێ بەلەچەك”*
هارە هزرێ
تو ڤێ شەڤێ ل سەر كەلەخێ هێخوازیێ
ل چ دگەڕی؟ بۆچی دوەستی؟
نێ خوەلی نابنە پەل ڤە
سرە لێ ب سەقایێ كەل ڤە
كنین و تا بوونە كۆتال
ل بازارێ ئازارێ ئۆنلاین و دلیڤەری
ب ڕەنگێ ڤەژینێ دگەهن بەر دەری!
ب برسقین و جوان هەستی.
مارە هزرێ
نیاز پاكێ ڤەرێژ ژەهرێ
هیڤی هێڕ وەك هەولدانا
و هەنگاڤ بێ هان و هەودانە
تژی باخلا تە بهارە
لێ دل و دوروونێ شكەستی!
بمرە بەلكو هزەركا دی
بهێت سەری
وشوونا لەیلانێ بفرۆشیت
و چاوا كانی بزێت ژ كەڤری
نیشا من بدت
رێكا خوەشی وەرگرتنێ
ژ ئەڤرۆیا ل بەر دەستی.
* ناڤونیشانێن رۆمانەكا كوری یا زانستی و پاشەرۆژێ یە، یا نڤیسەر “فازل عومەر” یە. فەلسەفە وپرسگێركا رۆمانێ ل دۆر لێگەریانا دەرمانێ نەمریێ یە، كو چیرۆكا وێ چەندین پەند و وانەیان نیشاددت.
