پێنووسێ من بۆ تەیە ئەی دوژمن
رێژین حكمەت
پێنوسێ من
هندابوویەك ژ ئەنفالێییە
چپكەك ژ كیمیا بارانێییە
نەڤێت شعرەكێ ب دوژمنێ كوردان ڤەهینیت..
دا زارۆكێن شەهیدان
شەهیدێن ئەنفال و كیمیا بارانان نەترسن
چیرۆكێن خوینمێژییا وان نەبینن
دبێژن دیرۆكێ نڤیسی
دیرۆك دوبارەیە
تو ژی برینان ساخ نەكەڤە..
دڤێ شعرێ دا دوژمن بوونە ئاخ و خوەلی
گازیێن مە گەهشتن ئەسمانێ هەڤتێ
دبێژن هین كینە؟
ژ كیژ نڤشی نە؟
ئارمانجا هەوە چییە؟
كوردان بن پێ بكەن؟!
ئەڤە چیرۆكەك درێژە درێژ..
هندی من ل بیرە دوبارە و سێ بارەیە
تو هەر ڕۆژ هەر سال بۆ خۆ دبێژی،
د ڤەهینی و دلۆرینی
بەلێ بزانە!
خەونە، خەیال، چیرۆكەك كورتە، ڤالایە!
خۆ ژێ بدە پاش..
ڤێ شعرێ یا خۆ ژ درێژاهیان دایە پاش!
ئەم ژی دبێژن:
مە بنیاسە؟
نێ ئەم شێرێن وەلاتی نە
نەڤیێن قازی و پیرانی نە
پێشمەرگێن ئەیلول و گولانێ نە
جەگەرا دایكێن دلسوتینە..
هین چ دبێژن؟
هین نزانن دێ چكەن؟!
یێ دهێتن
ب تنێ ناڤێ ئیسلامێ پیس دكەت
ئەڤە ئەو نەبوو
یا بۆ مە هاتییە گۆتن
ئەڤە ئەو نەبوو یا پێغەمبەڕان بۆ مە گۆتی
باب و باپیران نیشا مەدای
بۆ مە هۆسا هات بوو گۆتن
خوین نەهێتە ڕشتن!
خوین نەهێتە ڕشتن!
دوژمنێن كوردان
ڕاكرن ناڤێ ئیسلامێ
ئالا خۆ بلندكرن
ل ژێر دروشمێ
ئافرەت ل بازاران بازرگانی پێ كرن
زارۆك ژبرسان كوشتن
زاڤایێ ل گوڤەندێ سەر ژێكرن
بۆك ل خۆ مەهركرن
دایك و باب ب ساخی بن ئاخكرن
هین چ دبێژن ئەڤە ئیسلامە؟!
بەلێ ئەڤە هەمی بۆ مە حەرامە
هەر دوژمنێ هاتی
دڤێت نیشا مە بدەت، كا سەركردە كینە؟!
دێ سەرۆك و پارێزڤانێن وەلاتێ من ژی ببینە
هەر پێشمەرگەكێ ل دژی تە
تڤەنگ هەلگرتی
هەر شەهیدەكی خۆ گۆری وەلاتی من كری
ئەڤ ئاخە ژ پیسێن وەكی تە ڕزگار كری
ئەڤە بۆ تە ناسناما وانە
ژبیرنەكە
ناڤێ وان پێشمەرگەنە پێشمەرگە
ناڤێ بابێ وان
ڕێبازا باب باپیرانە
ناڤێ دەیكا وان
دەولەتا كوردییە
جۆرێ خوینا وان
ئاشتی و ئازادییە
جهێ ئاكنجیبوونێ
دلێ هەر كوردەكێیە
كارێ وان ژی پێشمەرگەنە ل مەیدانێ
سەرشۆرێن وەكی تە
ژ كوردستانێ دویر بكەن
هەرە دیروكێ ڤەكە بخوینە
پاشی وەرە
پێنوسێ من ژی ببینە
دا بزانی
كورد ئازانە
ئاشتی خوازن
شۆرشڤان و خۆشمێرن
دێ تە ژی ژ ناڤبەن.
