عەشقا تە دلێ من یێ كوزراندی

ناجح بێجانی

‎رۆندكێن چاڤێن تە، یێن بووینە دەریایەكا بێ بن و گەلەك جۆرێن گیانەوەران تێدا خوە فێری مەلەڤانیا دكن، سینگێ تە یێ بوویە ئەرد و هەمی كەس دشێن پەیاسا دناڤدا بكن، گەهێن لەشێ من هەمی تە یێن دبن مژیلانكێن خوە دا ڤەشارتین، بەژنا تە یا ڕند و شەپال ، لەوما ئالا ئازادیێ و وەكهەڤیێ پێڤە دچكلینن ، پرچا تە و هەر دوازدە كەزییێن تە، ڕامانا سالەكا دلخۆشكەرن، دێ ڤیجا وەرە دعەشقا خوەدا نەسۆژین، بكەینە هێڤینێ دەستپێكەك و ژیانەكا بەختەوەرتر، ئەڤ چەند ڕوژێن ژ ژیێ مە مایین ، بكن دەرفەت و سۆزا خوە دوبارە بكن و ژبۆ نفشەكێ نوی و پاشە رۆژەكا خۆشتر و ب رەونەقتر، بەری ئەز دلێ تە ب خوینم ، من باوەر ژ پەیڤێن تە دكر چما؟ ل سەر زمانێ تە و دناڤ بەرا هەردو لێڤێن تە دا سۆز و پەیمان ب من هاتن دان، ئەز ئەو نە بووم ب ساناهی ب كەڤم د ناڤ تۆرێن داڤێن تە دا، لێ قەدەرێ ئەز ملكەچ كرم و بارێ ژیانێ ژی هندە دخواست ، ئەڤرۆكە ژی هەر ئەز ئەوم یێ ل سەر سۆزا خوە لێڤەنابم ، لێ بەروڤاژی د هزرا مندا یا بوویە كەسەكا دیتر، رەفتار و كریارێن تە هەمی بەروڤاژی دبن، تو ئەو نەبووی بەری ستێرا گلاڤێژێ دەركەڤیتن، تە دگۆتە من مرن و ژین پێكڤە بن، ئەگەر باهۆز و بابەلیسكەك ژی بن مە راپێچن، بەرەڤ ئاسمانی و د رێیا كادزان ژی ڕا بن، هەر ئەم دێ بن ئێك نابینەڤە دو، یانژی دەما خاترا مرنێ ژێك دخوازین ، دیسان بلا گوڕا مە هەر ئێك بت نابینە دو، لێ ئەڤرۆ تەنها هەمی یێن بووینە بیرەوەری ونازڤرنەڤە.

کۆمێنتا تە