خەیالەك ژ خەونا ئەزەل

نایف مەحمود

سوبەیە و چاڤێ ڕوژێ
بەرەف ڤارێبونێ دچیت
هەر چ سیناهیەكێ ل دورێن خوە دپێچیت و
ل سەر ئاڤ و پەراڤ و چیایان دەربازی وندابوونێ دكەت..
پێلێن تاریاتیێ ب سەر هەمی سپیاتیاندا دهێن و
هەمی دیتنێن زەلال ب پەردا ڕەش دنخێڤیت،
شەڤێ دكەتە مهێڤانا خەونان،
گەردەنا عاشقان ماچی دكەت
رویساتیێ دكەتە كراسێ
شەڤێ و ئەڤینداران
سەرخوەش و مەست دكەت!
كەڤالێن یاد و بیرەوەریان
دبنە گول و یاسەمین،
خەم و ژانان د وەرینن،
بارانا عەشق و ڤیانێ دبارینن..
ئەڤە تابلویەكە ژ سەمایا هیڤیان
بۆ كەڤالێ باوەش و راموسانان
ئەز ژی دبەینا
ستێرێن شەڤێ و ئەلندا سوبەیەكا نویدا
خەونەكا ئەزەل دبینم
دڤێ نیڤ شەڤا خەلوەتگەها
ئەڤینداران، ئەز یێ بویمە
عاشقێ پەیڤان
هەلبەستەكێ ب داڤێن پرچا پەریێ
دڤەهینم…
كانیەكا خەیالان ژبەر خامەیێ من دچیت،
رێز رێز هەر چ پەیڤەكا ئەز درێسم
ژ پەیڤێن گول نێرگزان، سیسنۆك و بەیبین و بیتانۆكان
جار جار ژی دبەر را ناڤێ وێ دئینم…
جارەكێ ژی دبەر ڤان پەیڤان را
هەستێن من دبنە بابەلیسك،
مینا پەلێن پایزان ل باغێ سینەی
وەردبم، شەیدایەكێ سەوداسەرم
پڕ ئەڤینم!
ئەڤە هێشتا خەونە و
هێشتا ئەز یێ پەیڤان ژ سحرا كمێت و جوانیا وێ درێسم!
ئەوا روكێن وێ مینا دندكێن هنارێ
سۆر و سپەهی، هەمی مرازان،
ستران و ئاوازان ب من دبەخشیت..،
ل داویا ڤان پەیڤان
نیگارێ دو چاڤێن وێ،
یەك وەكە ڕەنگێ تاڤێ و
یەك ژ ی وەكە شەوقا هەیڤێ
داوی خیچا خامەیێ خوە ل سەر
دئینم و دبەم
وێنەیەكی ژ جوانیا بەفرێ
ژ دێمێ وێ دنەخشینم،
هەمی شەڤان
ئەزڤێ خەونا ئەزەل دبینم!

کۆمێنتا تە