ل گەل پێلێن دەریایێ
سەعید شەریف
دەریایێ، ئەزێ ل وەلاتەكێ بێ دەریا و دەولەت هاتیم
لەو تێربوویێ خەما مە
برسییێ خۆشیا مە
ما نابیت
بەرێ پێلێن خۆ وەرگێری
خەما ل گەل خۆ ببەی
خۆشیان بۆ من بهێلی؟
دەریایێ، سینگێ تە یێ بەر بەرینە
تو دكاری هەمی خەمێن جیهانێ
دناڤ خۆ دا بخەندقینی
نەك مینا سینگێ من
رەنگە ب خەمەكا بچویك
ب ئازریێت و ..
ژین و ژیانێ ژمن بستینیت
دەریایێ گەر ب ڤێ هێزا خۆڤە
ب نەرمە تاڤەكا بارانێ
لێڤێن تە شێلی ببن
لومەیێ ژ رەشە لێڤێن من نەكە
ئەڤە سەرێ دەهان سالانە
تاڤە بارانێن نەڤیان و ژەهرێ ژێ دبارن
دەریایێ دوبارە
ئەزێ ل وولاتەكێ بێ دەریا و دەولەت هاتیم
ماقاتی دێ دل هێلی
مێڤانێ چەند رۆژان
بێ ماف و ڤیان بهێلی
تونس / سوسە / 25 – 9– 2016
