مشەختبوون
سالح حەكیم
گڕگڕا عەورێن كۆچبەریێ
تو نە بارانەكی
دا ل عەرشێ
ڤێ هەسارێ بباری
توفانا نۆحی قەدەرەكە
تۆخیبا ناكەتە دەشت و مەودا
دەنگێ دەفێ
ژ دوورێ خوەشە
ل برینێن كویر نە پەژرینن
ستران و هەلبەستا خەیبیێ
ژ دلێن دلدارا ناهێت
دەمژمێرا تەمەنێ رۆژێ
تو چەند ب چك چكا میلێن
خوە یا ب لەزی
بۆچی نابیە ژڤانەك
د راوەستیانێن خوەدا
نە ژی ب خاترخواستنا
پشت خوە دزڤری
ئێدی شەڤا مە ژی خوە
دهنگلێ تاریێ ناگریت
شەرمێ ژ رۆناهیا رۆژێ ناكەت
لێهمشتا وەغەرێ
شەمەندەفرا مشەختیا
چوونەكا بێ ڤەگەرە
ل چولستانێن بیانیان
ب هەناسەكا مری دخاپینن!
بزڤرن ئەڤینا خوە یا خوەزا
عەشقا خەچ و سیامەندی
كی دێ ژمرنێ ڤەگەرینیت؟
پێلێن داستانا وان
ل كانیكێن
زوها جارەكا دی
ئۆمێدان ناڤەژینیت
بلا هەیڤا گەش
ژعەسمانێ ستێرا سل نەبیت
شەڤ ب ڕەنگگوهۆرینا خوە
دێمێ هەیڤێ دا بۆیاغ نەكەت!!
گاڤا ل بەزێ نەهاڤێژن
ماكێ گۆتیە مە كەرب
ژ رۆناهیا رۆژێ ڤەدبن
شەڤ هەڤالبەندا
قەدەرا مە یا ئێش و ژانایە.
