تربا ڤالا
باڤێ نازێ
ژمێژەیە تێتە گۆتن كو دەم، دسرۆشتی دە، دیاردەیا هەری ستەمكارە، نۆكا ژی، وەكو دزەكی یاسایی لێ دنەرن، ب ڤێ ژی ستەمكاریا دەمێ، شێوەیێ خوە یێ فەرمی دستینە. ژبەر ڤێ چەندێ، رێ ل بەر ڤەدبە و بێی راوەستاندن، دچە ودچە و تو رەحمێ ل كەسی ناكە.
ب خوە، دەم ب ستەمكاریا خۆ گەنجایەتیێ و جوانیێ ژ مەرۆڤی ددزە وندا دكە، لێ جارەكێ دەم، ل گوندێ كوچوكا راوەستیا.ل ڤی گوندی، دەما مەتكا حەلیمێ مر، تربەك ژێرە كۆلان، لێ ئەڤ گۆڕ هەر ڤالا ما.
و ب ڤالابوونا تربێ ل گوندی، ناڤەك ل پەی كەت و بۆ گوندێ تربا ڤالا، ب ڤێ ژی بوو خوەدی چیرۆك.
چیرۆكا تربا ڤالا، ل گوندی هەر كەس دزانە و دەما مێڤانەك تێت پرسا دیرۆكا تربا ڤالا دكە، ب ڤی شێوەیی چیرۆك تێتە گۆتن: « رۆژەكێ ژ رۆژان، ل ڤی گوندی، ئەفرەتا ب ناڤێ مەتكا حەلیمێ چوو بەردەستێ خوەدایی. تربەك ژێرە كۆلان و كەنگی تەرمێ وێ شووشتن، بنەمالا وێ كەلخێ وێ دانین سەر داربەستێ و بەرێ خوە دانە گۆڕستانێ. و پرانیا گوندیان ب بنەمالێ رە كەتن پەی داربەستێ. وهەلبەت ب وان رە ژی مەلایێ گوند بوو. ب گەهشتنا گۆڕستانێ و دانان داربەستێ ل بەر تربا كۆلایی. مەلا دەست ب خوەندنا تەرقینێ كر. كەسێ ل هاویردۆرێ هەمو بێ دەنگ بوون و گوهداریا مەلایی دكرن. مەلە ژی هین نەگەهەشت بوو نیڤ تەرقینێ بخوینە، ژ نشكاڤە كەلەخ لڤیا وپشتی بهنەكێ، مەتكا حەلیمێ ل سەر داربەتسێ روونشت، ب روونشتا وێ هندەك كەس رەڤیان وهندەك دن ب ئەندامێن بنەمالێ ب مەندەهوشی تەماشەكرن.
ل ڤێرێ مەلە خوەندنا تەرقینێ راوەستاند و ب دەنگەكی بلند گۆت:»ب قورئانا من خوەندی! شەیتان كەتیە لاشێ وێ و وێ بكوژن!».
هندەك ژ مریدان بەرێ خوە دانە داربەستێ وخوەستن فەرمانا مەلایی ب جی بینن و ئەرێ ژ ستەمكاریا خوە داكەت وڤێ جارێ بەرەڤاژی بوو یاریێن خوە، مەرۆڤەك ژ مرنێ ئانی ژیانێ. وبنەمالی وێ ژی كەتن بەرهمبەری كەسێن كو خوەستن وێ ڤەگەرینن مرنێ و ژیانا وێ پاراستن، و ل سەر ملێ یەكی ئانین مالێ. لێ خەلكێ دناڤ خوە دە دگۆتن: در ما دبە شەیتان ل مالێ بێتە حەواندن؟ و رێ ل بەر ئەندامێن بنەمالا مەتكا حەلیمێ تەنگ كرن و نە هشتن ئەو دان وستەندێ ب كەسێ رە بكن.
ژبەر ڤێ چەندێ، پشتی دەمەكێ، ڤێ بنەمالێ ژ گوند باركر و هەتا نۆكە كەس نزانە وارێ وان ل كویە.
درە، ب سالان چاوا گۆڕا مەتكا حەلیمێ ڤالا ما، وەها ژی خانیێ بنەمالێ. وخەلكێ نەخوەست ئەو جیێ كو رۆژەكێ ژ رۆژان شەیتان تێدە بوو، بكەڤنێ.
