ئەورێن ئەسمانەکێ ڤاژی
نایف مەحمود
شەڤ زڤستانە و تاریاتیێ پێلێن خوە
شوڕکرینە سەر تیروژکێن روژێ،
ڕوناهی یا بویە
ئێخسیرا لەپێن ڕەشەکێن
شەڤێ و ئەژدەهایێن دارستانا
ژ ترسا دێوێن ڕوژا دەڤ بەش دڕەڤن…
ستێر و هەیڤ یێن کەفتینە بەر
دوزەخا مژو دومانێ،
چرایەک نینە ببیتە
خەونا ڤێ تاریستانێ و
پەنجەشێرا ئەزوکیێ
بن ئاخ بکەت…
ئەوران گڤالێن خوە یێن پێچاین و کرینە گلواز ل هنداڤی
پەراڤێن ئاڤێ تاڤیێن زیان بەخش دبارینن…
چیا ل هەمبەری
بیابان و دەشت و نەوالان
سەرێ خو بو هەناسەیەکا ئارامیێ دچەمینن، ژ بلنداهیێ دکەڤن
کەڤران دخون، ئاخێ دادعویرن…
ڕوندک ژ بارانا بێ وەفایێ
دهەڕکن،
ئەلهو ل ئەسمانێ ڤاژی
بێ چەنگ و پەڕ ڤاژی دفڕن
دکەزەبا خوەدا دشەوتن…
د دەهمانا ئەردیدا
خەونەکا نەزوک ژدایک دبیت
دبیتە ئاگرو ئاتەش
ب دەلنگێن ئاخێ ڤە و
قازو قولنگ ژ کوچکرنێ یاخی دبن…
پاهیزەک
دبیتە تابلۆیێ ژورا مە
سیبەرا بەلگێن بوهارێ
دڕەنگێ خوەدە بەرزە دکەت
ژبونا ئافراندنا وێرەکیێ
پەلێن داران مینا ڕەشەبایێ مرنێ
د گەردەنا پەیکەرێن
بێ گیان وەردبن..
حەزکرنەک مینا پێتا ئاگری بو
عەرشێ فریشتان بلندبیت چیروکا خوەزایی
ژکەتوارێ فێلبازیێ ب حەسرەت و نالین ڤەدگوهێزیت و
ڤێ چیروکێ
دکەتە راستیا نهێنیەکا نەپەنی
ژ ترس و لەرزینا هەمبەری
پەیڤا دادیێ…نالێنێن پەراسیێن شکەستی ژ دەنگێ (دەهولا) مە دهێن!
کریسک یێن کەتینە چاڤێن
کولیلکان ژ سەمایێن بەلاتینکان
دبێ بارن، سردوێن سەکەراتێ دبێن…
خەملا گولێن رەزو باغان زەراتیێ یێن کفن کرین
زاڕوک ژ بهەشتا یاریان بازددەن
دچن خو لبەر کەلەکێن بەران، ژ هێرشا تیران
ژگەفێن پیران ڤەدشێرن…
ئەڤە چەندین سالە پرا مرازان د ژانێن خوەدا دغولغلیت،
لسەر پێن خوە یێن پوسیدە ژ وەستیانێ
بوکاروانێ هەڤرکیێ ها نێزیکە ب سەتمیت،
پاپورا مە د ئاڤا گەنیدا سەرنشیڤ و ژێر ئاڤ ببیت!
نەخێر، ببورە دەم، ئەسمان، تاری،
ترس و لەرز
بەریک و ئەز
دێ بو سەربەرزیێ مرین
