سۆز و پەیمان
ناجح بێجانی
ژ زاڕۆكینییێ وەرە هەتا ئەڤرۆ، ئەو سۆز و پەیمانا د ناڤبەرا من و تەدا، ل سەر چ كاغەز و نڤشتان نە هاتبوو نڤێسین، بەلكو بەروڤاژی د ناڤبەرا دو دلاندا وەكو هەمی جاران چاڤەڕێ بووین، ل بهارەكا زوی، هێشتا گەلەك بشكۆژ ما بوون، دا ژ نوی ڤەبن، ل ژێر عەردی خوە ڤەشارتبوون، لێ ئەو د خەوەكا كویردا ما بوون.
دێ ڤێجا وەرە دا پێكڤە ڕێ بكەڤین بەرەف باغەكێ ژ باغێن كوردستانا من یا شرین، وەك دو هەڤال هەڤدو هەمبێز بكین. ل سەر وێ ئاڤا زەلال لاڤا ژ خودایێ مەزن بكین، ژبۆ وان كەسێن هێشتا دژییێ سنێلەییێدا، هیڤی و ئومێدێن وان بەرەف ئاشۆپ و لاوازییێ د چوون، یان ژی د ناڤ وێ مێرگێدا، ئەوا دویر ژ چاڤان، من و تە خوە تێكئالاندی، وەكو دارئالینكێ ژ سەرێ تبلێن پییا تاكو كلوڤانكا سەری، دا بێژی ئێك وێنەیە، چ قاس باهۆزەكا دژوار و بهێز بەرەف مەڤە د هات ئەز و تو پتر نێزیكی ئێك دكرین. ئەو شەرما ل سەر سیمایێن مە دیار دبوو، شەوق ڤەددا وان شەڤێن ڕەش و تاری یێن مە دبوراندن، ژبەركو گەلەك بەكو ب چاڤێن حەسودییێ تەماشە دكرن. دێ ڤێجا وەرە دا ئێم پێكڤە ب ڕێ بكەڤین بەرەف وێ شكەفتێ یا لبەر چرا و شەڤێن تلچاڤ ئەم تێدا فێری خواندنێ بووین، یان ژی بچین ل بن داربەڕییەكێ، ئەوا ئەز و تو ل بەر سیبەرا وێ ژ دایك بووین.
هەر ژ زاڕوكینییا مە و هەتا ئەڤرۆ، چركە چركە د هزر و بیرێن تەدا ماییە، دەمێ مە ( دارتڕانێ، حەبێ لەبێ، تیڤتیڤانكانێ، پێنج بەركانێ، تیسانێ) دكرن ل ڕاستگەها گوندێ مە، ب حەنەك و پەیڤێن جوان، ب ڕەنگەكێ شەرمییانە، ل بن چاڤانڕا و ل سەر لێڤان پست پست دكر. یان ژی بچین ئەوی جهێ چاخێ ئەز لێ شڤان، تو ژی بێری، سۆزا خوە دوبارە بكین، هەتا مرنێ پێكڤە بژین، پێكڤە بژین.
