خەفكا هنگڤیندای
خالد علی سلێڤانەیی
كۆژمەك پارا وەسا ب لەز و ژ دزیڤە كرنە د بەرویكا وی دا بێ كو كەسەك پێبەحست یان ببینت و گۆتێ: تە چیرۆكا خوە بۆ من نەگۆت، ئەڤە چاوا تو هۆ لێ هاتی؟
ب چاڤێن تژی رۆندك و پەشێمانی بەرێ خوە دایێ و گۆت:
من بازرگانییا دولاری دكر، حالێ من گەلەك یێ خوەش بوو، خانی و زێر و تورمبێل و.. ژبلی دو پارچەیێن ئەردی، تشتەك ژ من كێم نەبوو، شریكێ من رۆژەكێ ب دێمەك گەلەك كەیفخوەش ب ژۆر كەفت و گۆت من:
وەرە ئەم بازرگانییا زێری بكن، دێ ژ مووسل كرن و ئینن ڤێ دەرێ فرۆشن، من دوستەك عەرب هەیە، دێ زێری بۆ مە ب بهایەك گۆنجای فرێكت و ئەم دێ ل ڤێرێ فرۆشن زێرنگرنا و د دەمەكێ كورت دە دێ باش ب سەركەڤن، مانە چێترە ژ دولاری، دولار رابوو و هاتە خوار، نێ فشارا خوونێ دێ بۆ مە ژ ڤی دولاری پەیدا بت..
من ژی بێ كو گەلەك هزرا خوە بكم رازیبوونا خوە دیاركر سەخمەراتی دراڤەك زەحفتر وب لەزتر، ب تایبەت من باوەریەكا گەلەك موكوم ب شریكێ خوە هەبوو.
بۆ ماوەیێ هەیڤەكێ كابرایێ عەرەب بۆ مە زێر فرێدكر پشتی مە دراڤ بۆ ڤەدگوهاستی، ومە دراڤەكێ باش د ڤی ماوەیی دە كۆمكر.
دەمێ تام ب دەڤێ من كەتی و شریكێ من گۆتی كەمییەك مەزن یا زێری یا هەیی وخودان دێ ل سەر ئێك فرۆشت؛ چونكی یێ تەنگاڤە و پێدڤی دراڤییە و دێ ب نرخەك هەرە ئەرزان دت مە، ئەگەر مە ئەڤ زێرە كری و ل ڤێ رێ فرۆت ئەم دێ چەند جاركی قازانج كن، كەیفا من گەلەك هات، من ژی هەمۆ دراڤێ من هەیی كۆمكر زێدەباری بهایێ هەردو پارچەیێن ئەردی كۆ من ب نرخەك ئازانتر ژ بهایێ وان فرۆتن و من هێشتا دراڤ ژ هەڤالێن خوە یێن پارەگوهۆڕ قەركرن هەتا من و شریكێ خوە شییا بهایێ وێ كەمییا زێری ب سەر ئێك ڤە بینن..
راستە شریكێ‌من ژ من پتر پارە كرن دڤێ شۆلێ دا لێ قازانج ژی ب رێژێ بوو، مەئەو هەمۆ پارە فرێكرن مووسل، قەول بوو زێر پشتی سێ رۆژان بگەهت نك مە، لێ هەر گیرۆ بوو، من ژ شریكێ خوە پسیاركر چونكی وی پەیوەندی د گەل كابرایێ عەرەب هەبوون و كارێ ڤەگوهاستنا زێر و دراڤی برێڤە دبر، لێ وی ژی چو نزانی، هەتا ئەم ل دووڤ چووین مە چو شینوارێن كابرایێ عەرەب نەدیتن، مە ژ مووسل هەتا بەصرا تێكڤەدا، نەهەرێ چو شینوار بۆ نەبوون، نڤیسنگەه و زێرنگرینا وی ل مووسل ژی ڤالانە، ئەو ژی نەمایە، پارە ژی چوون و زێر ژی نە هات، ل دوماهیێ بۆ مە ئاشكرا بوو كو كابرایێ عەرەب تەشقەلچییە و ئەڤ فێلە ل گەلەك كەسێن دی كرینە و چوویە دەرڤەی عیراقێ, هەر جار هندەك دبێژن یێ ل فلان وەلاتی و فلان وەلاتی..ئەم بێهیڤی بوون.. ئەم خشیم دەركەتن ئەم ب حالێ خوە رازی نەبوون و مە هێشتا دڤیا و ب لەز تر زەنگین تر لێ بهێن لەو ئەڤە هات سەرێ مە. ب راستی ژی ل دەستپێكێ مە گەلەك قازانج كر، لێ من نەدزانی كو ئەو هەمۆ تۆڤنۆكەك بۆ دربەك مەزنتر بوو. خەفك بوو، ب راستی ژی.. بەس خەفكەكا هنگڤیندای بوو.
دەمێ ئەداكرنا قەرزێن من یێن من ژ هەڤالێن خوە یێن بازرگان وەرگرتی هات، لێ من چو نە مابوو بدم وان، ئەز تەنگاڤ كرم و ئەز نەچاربووم خانییێ خوە د گەل زێرێن هەڤژینا خوە بفرۆشم هەتا كو قەرزێن خوە ئەداكم و ئەها نوكە تو یێ من دبینی.. كرێدار وبێ مال و حال..ب هیڤیا جامیرێن وەك تە ڤە مە هەتا خێرەكێ دگەل من دكن و پێ ب كوتەكی دژیم.
ـ چ ل شریكێ تە هات؟
ـ شریكێ من سێ جاركی هندی من دراڤێ خوە كربوو د ڤێ شۆلێ دە، وی تەحەممولا نەهامەتا خوە نەكر، تووشی تێكچوونێن دەروونی بوو و چەند جاران ل مووسل سەرێ وی دانانە ل بەر كارەبێ، رەوشا وی خرابتر لێ هات….و نوكە یێ د مال دە مایی و دەرناكەڤت، یا قەنج برایێن وی حال خوەشن، گوهێ خوە ددنێ و دراڤی ل وی و خێزانا وی دمەزێحن.
