شۆڕشا مەزن
نیهاد سالح
ئەی دیرۆكا كەڤنارە
رودانێن بۆرین بێژە
ژین و ژیندار كینە
جارەكێ گەتنە ؟
ژین ژ مە هەڤچوویە؟
نە نە !
نەبوویە
ئەڤ بویەرا دژوار
چەند عەوان و بەكر
ئبلیس و هزركار
فەساد و چەپەل كار
جاشێن خاین و خار
بو دوژمن دەستەكار
كرن تالان و برن
كاڤل ژی راكرن
ئەی دیروكا كەڤنارە
كابویسێن سەحرایێ
خونمێژێن بەغدایێ
توخم پەرێسێن رەشەبایێ
پێخاسێن دنیایێ
بكۆژێن عەلی و
حەسەن و حسێن
قاتلێن كەربەلایێ
چ هۆڤ و دێون
كەتن وارێ ژیانێ
ئەنفال و تالان كرن
ژ وار و مەكانی راكرن
ژێیا بیابانێ بێكەس كرن
برسی كرن ژن و زارۆك
هەرچی مافە قوتكرن
نە حنێرە كو زارۆ
لبەر چاڤ و دەستێن دایكا
ب ژان و ئێش بمرن
نازكیا زارۆكێ ساڤا
وێران و هشك كرن
سا و كەفتارا گوڤەند لێ كرن
دلێ دایكا پەقین
یەقین دڤێن بمرن
ئەی دیرۆكا ستەمكار
هندەكێ بێژە
زوردار كینە؟
دچینن دار دریا
دا گوشت و گیانێ تفالان
بكێشن ب ئێك جار
نڤشێ رۆژێ راكەن و
نەهێلن توجار
ئەی دیرۆك بو مە ڤەگێرە
كینە ژین كینە ژیندار
ژیندار چوونە چیا
ژینێ سەرێ خۆ هەلدا
هەردو بوون ڤۆلكان
بوونە ئاگر و زێمار
بوونە زلزالێن بهێز
بسەر تاوانباری دا
كەفتن خوار و بوون كریار
نە ژینێ قەبول كر
نەژی ژیاندار
توجاردی بڤی رەنگی
پیر و تفال و ژار
بكەڤن هوڤاتیێن نەیار
ئەی دیرۆك چ دەمە نها
بۆ مە بێژە چ قادە
دیرۆكم تۆمار دكم
شۆرشێن مەزن
ئازایی و داستان
هێز و پێشمەرگەنە
سال و رۆژ و دەمن
تەڤ بووینە ئەیلۆل
بوون كاروان و ئەڤیندار
دگەل بارزانی
دەڤەر راكرن
تەڤ بوون كوردستانی
بیر و باوەربوون نشتیمان
ژ بو ئازادیێ بدەن جان
ئەی دەمێ پیرۆز
چەند غەریبی
جار دكەنی
جار ژی دگری
سەركەفتنێن دیرۆكی
بوونە سومبولا نەتەوەیی
شەهیدێن ئەیلولێ
رەمزا قوربانی
تەڤ بوون هێز و چەك
لگەل بارزانی
چوك بۆ دوژمنی نە دانی
سەر بلندكر و نەدانی
چاردە سالێن ئیرادێ
بوونە بەیان و ئادار
یازدێ كرە ئوتونومی
ئەی دیرۆكا پڕ هێڤێن
تۆماربكە و بۆ مە بێژە
شۆرش مایە یان نە؟
بەلێ شۆرشا مەزن
شێست و ئێكە
سەركێشا شۆرشا هەردەمی
تا كو بگەهن بەرهەمی
دەولەت و ئازادی
هەر بارزانی و ئەیلولن
سەركێشێن زیندی و سەروەری.
