دەما ژیانا تە ئێش بە هەلبەست ژی دێ ژ وەلاتێ ئێشێ بە
هەڤپەیڤین: دەمهات دێركی
دەما دەرباسی جیهانا هەلبەستڤانیێ هەلبەستڤان جان وەلات بووم، كەسەكی ژ تنەبوونێ خوە ئاڤاكری ل بەر چاڤێ من سەكنی. د پرانیا هەلبەستێن وی دە ئەڤینەكە كەدێ، هەزكرنەكە ئافراندنێ تێ دیتن. جان وەلات كو ل باژارێ قامشلۆیێ رۆژئاڤایێ كوردستانێ ژ داییك بوویە، هەتا دبستانا سەرەتایی دخوینێ. هێژ د تەمەنەك بچووك دە بەرێ خوە ددێ شامێ، ل ور د گەلەك كاران دە كار دكە و د ناڤا كارێن خوە دە گەلەك ئێشان دژی. پاشێ، جان وەلات بەرێ خوە ددە وەلاتێ دانیمارك. ل خوربەتێ دا ئێش، برین و ئەڤینێن خوە بێژە، بەرێ خوە ددە جیهانا هەلبەستێ، خوە پێش دخێ و ب تایبەت هونەرا ژبەركرنا هەلبەستێ. گەلەك ل سەر خوە دخەبتێ، ئێدی ب ریا هەلبەستێ جیهانا خوەیا هوندرین ڤەدكە. هەتا ئیرۆ گەلەك هونەرمەندان هەلبەستێن وی كرنە ستران، هەلبەستێن وی د گەلەك كۆڤار و مالپەران دە هاتنە بەلاڤ كرن. جان وەلات ژ تنەبوونێ خوە ئاڤادكە و ڤێ پەیامێ ددە كو تشتەك نە هێسانە دەما كو كەس ب هەزكرن و ئەڤین نێزیكی ئارمانجێن خوە ببە.
ئەڤرۆ: برێز جان وەلات، قۆناخا تەیا دەستپێكێ د وارێ نڤیساندنا هەلبەستێ دە چاوا دەستپێكر، ل سەر كو تە هەتا دبستانا سەرەتای خوەندیە، لێ ئیرۆ گەلەك هونەرمەند هەلبەستێن تە كرنە ستران و ب تایبەت هونەرەكە بالكێشیا ژبەركرنا هەلبەستێ ل جەم تە هەیە؟
بەرسڤ: د سەری دە دخوازم بێژم، ئەز پۆشمانم كو من خوەندنا خوە بەردەوام نەكر، ژبەر كو خوەندن رۆناهیا چاڤ و مەژییە. لێ، ئەڤ نایێ وێ واتەیێ كو دەما ئارمانجەك تە هەبە، هەزكرن و ئەڤینا تە ژ ڤی ئارمانجی رە هەبە تو نەگەهی ئارمانجا خوە. راستە، من تەنێ دبستانا سەرەتای خوەند، لێ ژیانا ئەز تێ رە دەرباس بووم، ئێش و زەهمەتیێن ڤێ ژیانێ ب تایبەت دەما هاتم دانیمارك هێلان ئەز ل چارەیەكێ بگەرم، ل ریەكێ بگەرم ڤێ جیهانا خوەیا هوندرین دەرخم. لەوما، من دیت هەلبەست هەری نێزیكی منە، گاڤ ب گاڤ و ب دەمێ رە من دیت ئەز د ناڤا ڤێ جیهانا نوو دە مە ژ من رە، من ژێ هەزكر وێ ژ من هەزكر. هێدی هێدی من هونەرا ژبەركرنا هەلبەستێن خوە پێشخست، ئێدی چ ل سەر ئەكرانێن تەلەڤزیۆنێ یان ل شاهیان پێدڤیا من ب كاخەزان نەبوو، چ هەلبەستا من دخوەست بێژم، د هشێ من دە ئامادە بوو. هونەرمەند ژی تێكلی ب من رە دانین و هەلبەست خوەستن، كرن ستران. لێ، ب راستی كەدەك بالكێش و وەستەبوونەك بالكێش ژ ڤێ هونەرێ رە دڤێ.
ئەڤرۆ: گەلۆ، چ ئاستەنگ ل پێشییا تە دەركەتن د وارێ نڤیساندنێ دە؟
بەرسڤ: بەلێ، ب تایبەت د نڤیساندنا ب پیتێن لاتینی دە، ژ خوە من ب كوردی دەست ب نڤیساندنا هەلبەستێ كر. لێ، دەستپێكێ و هەرۆژ ب دەمژمێران ل سەر فێركرنا خوەندن و نڤیساندنا كوردی سەكنیم، تا كو گەهامە ئاستەك وەها كو ئێدی كاربم بنڤیسیم. ئاستەنگیا هەری مەزن و وەكە چیایێ ئاگری بلند خوەندن و نڤیساندن بوو، لێ ئەز رادەست نەبووم تا كو ب ڤی چیایی ڤە هلكشیام سەری.
ئەڤرۆ: جان وەلات، هەلبەستێن تە مرۆڤی دبن وەلاتێ ئێشێ، چما؟
بەرسڤ: دەما كو ژیانا تە ژ كانیا ئێشێ بە، ژیانا تە ژ كانیا برینێ بە، ژیانا تە دەربەدەری بە، ژیانا تە هێڤی بن و ئەو هێڤی بشكێن، ژیانا تە بندەستی بە، ژیانا تە ل كۆلانێن خەلكێ بە، ژیانا تە كوشتن بە، ژیانا تە گری و هێسر بن، بێ گۆمان دێ هەلبەست ژی ژ وەلاتێ ئێشێ بن.
ئەڤرۆ: ژ كەرەما خوە رە تو دكاری بەهسا نڤیساندنا هەلبەستا ل خەریبیێ بكە؟
بەرسڤ: هەلبەستا خەریبیێ هەستێن خەریبیێ نە، بێریكرنا خاكێیە، هەسرەتا وەلاتەكییە كو هەتا نها د بن پێلاڤێن خەریب دە دنالە. هەلبەستەكە جارنە تو ستوو خواری، دل شكەستیی دەما تو ئاورێن خوەدیێن ڤی وەلاتی دبینە و وەكە بێژن تە تو ل وەلاتێ مە چ دكە، ژ ور هەرە. ژ دلێ راستیێ، هەلبەستا خەریبیێ ئەڤە.
ئەڤرۆ: تو وەك هەلبەستڤانەكی جوان هەلبەستا كوردی چاوا دبینی؟
بەرسڤ: ل سەر هەموو كێماسی و بێ دەولەتبوونێ و نە زمانەك یەكگرتی، هەلبەستا كوردی گەلەكی ل پێشە، ئیرۆ ب دەهان هەلبەستڤانێ مە هەنە گەر هەلبەستێن وان بێنە وەرگێران نە كێمی هەلبەستڤانێن جیهانێ نە. لێ، د وارێ وەرگێرانێ دە كێماسی پرن، د وارێ چاپكرنێ دە كێماسی پرن، راستە چاپخانە پر بوونە، لێ نە هەر كەس دكارێ بەرهەمێن خوە رێكێ ڤان چاپخانەیان.
ئەڤرۆ: گەر زەهمەت نەبە تو دكارە بەهسا خەباتێن خوەیێن داوی بكە كا ڤان دەمان ب چ ڤە مژوولی؟ ئەم دكارن بێژن كو ل دەمەكە نێزیك بەرهەمێن تە دێ بگەهن خوەندەڤانانی؟
بەرسڤ: ژبلی هەلبەستێن من یێن بوونە ستران، ب سەدان هەلبەست ل بەر دەستێن منن، ئامادەنە ژبۆ چاپكرنێ و ئەز ب گرنگی ل سەر دسەكنم وان چاپ بكم، لێ هەر تشت، هەر پێنگاڤ د دەما خوە دە خوەشە، چێژ شرینە.
ئەڤرۆ: گۆتنا داوی؟
بەرسڤ: گەلەك سپاسدارێ رۆژنامە ئەڤرۆ و خەباتكارێن وێ مە كو ئەڤ دەرفەت دانە من. سپاسدارێ كەك دەمهات دێركی مە ئەڤ هەڤپەیڤین لگەل من كر.
