نامەیەك ژ بنداڤا كەلهێ
شرین دوسكی
سلاڤ بۆ خوینەرێ ڤێ نامێ، دخوازم رەوشا تە گەلەك یا باش بیت وژیان بۆ تە گڕنژی بیت، ئەڤرۆ ئەڤە بوونە ١٥٦هەیڤ و ٣٣٥رۆژ و چەند دەمژمێر و چركەیێن ب دروستاهی نزانم چەندن! ئەز دڤێ بنداڤێ ڤە یا بەرزە كری و ب تنێ یا دگەل من هندەك ژ ڕۆناهییا كێم ئەوا ژ ڤان دەرزێن دیوارێن چ نەمای ب هەرفن، و تارییەكا گەلەك رەش ، دگەل چپ چپا دلۆپێن ئاڤا ژ بانی دهێن خوارێ، و چەند تەلیسین خەونێنن بجهـ نەهاتین، ژ بلی كۆمەكا مەزن یا سۆزێن بێ بنەما، و دا ژبیرا من نەچیت هندەك گڕنژینێن بۆ چەند چركەیێن كێم و پاشی ژ ناڤ چووین، و جویەكا ئاڤا سویر، د گەل هندەك وێنا؛ باوەربكە نزانم ئەو كی نە! لێ دبیت رۆژەك ژ رۆژان كەسێن نێزیك بوون بەلێ نوكە نانیاسم، و ل هەر قولاچەكا ڤێ بنداڤێ كۆمەكا هیڤییان یا هاتی بن ئاخ كرن ئەو هیڤیێن كو پێدڤی بوو ئەڤرۆ ئەز بلند هلدابامە ئاسمانێ بجهـ هاتنا وان هیڤییان، ژ راستی ژی نزانم هندەك تشتێن دیژی یێن لێ هەین، بەلێ نەوێرم نێزیك ببم؛ ژبەركو نە یا ئامادەمە چ تشتێن دی ژی ژدەست بدەم، خەمگین نەبە، خوینەرێ نامێ، ئەز گەلەك یا بهێزم، بەلێ یا پێدڤی بوو ئەز ڤی دیمەنی بۆ جیهانا ژدەرڤە ڤەبگوهێزم، نەهەر ئاڤاهییەكێ دوو سێ قات بیت ئەو كەلهە، بەلكو هندەك جاران زیندانن بشێوێ كەلهان، نەهەر كەسەكێ دێم بگڕنژین دلێ وی ژی دگرنژیت، بلا كەس ب سیمایێ كەسێ نەئێتە خاپاندن ژبەركو ژچركا ئێكێ بۆ گڕنژی بوو، و ل دوماهیێ ئەز یا هەست ب خەوەكا گەلەك گران دكەم، هەست پێ دكەم دەست و پێن من یێن خاڤ دبن و كەلەخێ من ئەڤێ هندە سالە بڤی ئەردی ڤە نویسیای یێ هێدی هێدی قەستا فرینێ دكەت!
