سینه‌ما وه‌ك ڕێكه‌ك بۆ به‌لاڤكرنا كه‌لتۆر و مێژوویا نه‌ته‌وه‌یی
عەلی عەبدولخالق عەلی
هه‌ر ملله‌ته‌كی دیرۆك و زمان و جلوبه‌رگ و ره‌وشت و تیتالێت خوه یێت تایبه‌ت هه‌نه، كو وی نه‌ته‌وه‌یی جودا دكه‌ت ژناڤ هه‌می ملله‌تێن دی و هه‌روه‌سا ناسنامه‌كا تایبه‌ت دده‌ته وی ملله‌تی.
ئه‌ڤرۆ ئه‌م وه‌ك ملله‌تێ كورد خودان دیرۆكه‌ك دێرین و پر سه‌روه‌ری نه و خودان كه‌لتۆر و زمانه‌كێ ده‌وله‌مه‌ندین و جل و به‌رگێ مه‌ژی ئێك ژ جوانترین و ب خه‌ملترین و ڕه‌سه‌نترین جل و به‌رگێ نه‌ته‌وه‌یی یه، به‌لێ پا جهێ داخێ یه ژ هوكارێ پارچه‌كرنا وه‌لاتێ مه و داگیركرنا وی ژلایێ دۆژمناڤه و پێكول كرنا وان بۆ به‌رزه‌كرنا كه‌لتۆر و زمانێ مه، تا رادده‌كی بوونه ئەگەر زمان و كه‌لتۆرێ مه گه‌له‌ك به‌ربه‌لاڤ نه‌بیت، ژبه‌ركو ئه‌ڤه ژی به‌شه‌كێ سه‌ره‌كی یێ شه‌ری و داگیركاریێ یه. لێ به‌لێ خوشبه‌ختانه پشتی وه‌رگرتنا ئازادیێ و دامه‌زراندنا هه‌رێما كوردستانێ، ئه‌ڤرو مه ده‌لیڤه‌كا زێرین هه‌یه ئه‌م زمانێ خوه‌یێ شرینێ كوردی و كه‌لتور و ره‌وشه‌نبیریا خوه نیشا خه‌لكی بده‌ین و ئێك ژ باشترین رێیا: سینه‌مایه.
1- دشیاندایه ب رێیا سینه‌مایێ فلم ب دیالێكتێن جودا جودا یێت زمانێ كوردی بهێنه به‌رهه‌مئینان و هه‌ر ئه‌و فلمه بو گه‌له‌ك زمانا بهێنه وه‌رگێران (مه‌ره‌ما من وه‌رگێرانا ب شێوێ نڤیسینێ یه نه‌ك دوبلاج) ژبۆ به‌ربه‌لاڤ بوونا زمانێ كوردی.
2-فلم ده‌رباره‌یی مێژوویا كوردا هه‌ر ژده‌سپێكا هه‌بوونا ڤی ملله‌تێ ڕه‌سه‌ن و دێرین تا نها بهێنه به‌رهه‌مئینان، میرنشینێن كوردی وه‌ك نموونه.
3-پێشاندانا وان هه‌می ئێش و ئازار و ده‌رده‌سه‌ری و ئه‌نفال و زوڵما ل گه‌لێ مه هاتیه كرن ب رێیا سینه‌مایێ.
4-زۆرا گرنگه، ژیانا سه‌ركرده و شوره‌شگێر و توره‌ڤان و هوزانڤان و ره‌وشه‌نبیرێت كورد ب رێیا سینه‌مایێ نیشا جیهانێ بهێته دان و بزانن مه چه‌ند كه‌سێن شوره‌شگێر و ره‌وشه‌نبیر و كوردپه‌روه‌ر هه‌بووینه كو ب به‌رده‌وامی خه‌بات ژبۆ كوردستانه‌كا ئازاد كرینه.
5-دشیاندایه شوره‌شێت كوردی و ده‌ستكه‌فتێت وان یێت زێرین ب رێیا سینه‌مایێ نیشا جیهانێ بده‌ین.
6-هه‌روه‌سا پێشاندانا جل و به‌رگێ كوردی یێ هه‌می ده‌ڤه‌را و خوارنێت كوردی و و ره‌وشت و تیتالێت كوردی بو نموونه: داواتێت كوردی، تازی، هاریكاریا هه‌ڤدوو و زباره و هتد…
ڕۆلێ سینه‌مایێ زورێ گرنگه و ئه‌م وه‌ك ملله‌تێ كورد دڤێت مفای ژ ڤێ ده‌لیڤێ ببینین وه‌ك ڕێكه‌ك ژبۆ به‌ربه‌لاڤكرنا مێژوو و كه‌لتور و زمانێ خوه.
