شۆكا دەروونی ژ ئەگەرێ ئەزموونەكا ب ئێش پەیدا دبیت
بێوار حەمدی:
جاران شوك كارتێكرنێ ل سەر بارێ مرۆڤی یێ دەروونی دكەت و چێدبیت ببیتە ئەگەرێ سەرهلدانا تێكچونێن دەروونی وەكی فوبیایێ، ڤەكولەرەكێ دەروونی ژی گۆت: پتریا جاران شوكا دەروونی ژ ئەگەرێ روودان یان ئەزمونەكا ب ئێش یا جهێ شوكێ بیت پەیدا دبیت.
ڤەكولەرێ دەروونی، یاسر سەعید د دیدارەكێ دا بۆ رۆژناما ئەڤرۆ دیار كر كو شوكا دەروونی بەرسڤدانەكا سوزداری یا بهێزە دهێتە روودان ژ ئەگەرێ كاودانەكێ بوری یێ ب ئێش و ئازار یان كاودانەكێ ژ نیشكەكێ ڤە و گوت: (شوكا دەروونی دهێتە روودان ژ ئەگەرێ ئەزمونەكا ب ئێش یا جهێ شوكێ بیت وەكی: روودانێن هاتن و چونێ، ژ دەست دانا خوشتڤیا، ئەزمونێن جەنگی، روودانێن سروشتی و لدووڤ وێ ئەزمۆنا مروڤ تێدا دبوریت دمینیت).
یاسری دیار كر ژی، ماوێ كارتێكرنا شوكا دەروونی ژ كەسەكی بۆ ئێكێ دی جودایە ژ بەرچەندین ئەگەران، ئەو ژی جورێ وێ روودانا بۆیە جهێ شوكێ، پاڵپشتیا بەردەست یا بو كەسێ توو شبویی هاتیە كرن، هێزا دەروونی یا كەسێ تووش بویی و گۆت: (هندەك كەس پشتی ماوەیەكێ كورت چارەسەر دبن و هندەك پێدڤی ب ماوەیەكێ درێژ دبن و هندەك ژی پێدڤی ب چارەسەریێن دەروونی دبن ).
ڤەكولەرێ دەروونی د بەردەوامیا ئاخفتنێن خودا گۆت: (جاران شوك كارتێكرنێ ل سەر بارێ مروڤی یێ دەروونی دكەت و چێدبیت ببیتە ئەگەرێ سەرهلدانا تێكچۆنێن دەروونی وەكی (فوبیایێ) و گوت: (لێ مەترسیا هندەك تەخێن مرۆڤا ب شوكێ پترە، وەكی كەسێن ئێكسەر دناڤ كارەساتێن سروشتی و جەنگی دا، كەسێن تووشی تاوانا و هێرشا دبن، كەسێن د بۆارێ پزیشكیدا كار دكەن، پۆلیس و لەشكەر..).
یاسری ئەوچەندە ژی دا زانین، ئەو كەسێن تووشی شوكەكا دەروونی دبن یا باش ئەوە لدووڤ ڤان پێنگاڤان بچن داكو چارەسەریا خۆ بكەن و گۆت: (دڤێت پاڵپشتیا جڤاكی بدەست خوڤە بینن و پەیوەندیێن جڤاكێ بهێز بێخن، دگەل تایبەتمەندەكێ دەروونی باخڤن، ساخلەمیا لەشێ خۆ ب پارێزن، خۆ ژ بتنێ بونێ بدەنە پاش، بەلێ ئەگەر هات و نیشانێن شوكا دەروونی د بەردەوام بون پێدڤیە سەرەدانا نوژدارێ دەروونی بكەن).
