پێنج گول
بەیارێ زاویتەیی
دیاری بو هەرپینج پێنج كچێن من
لەیلا، گولێ، زەری، پەری و پێرۆ
پێنج گولن پێنج كولیلك
دیارینە ژ خودایێ بێ شریك
ئێك لەیلایە ئێك گول
ئێك شەمالكە
یا دی چرایێ هل
هندی لەیلایە
مینا كەعێلایە
لێ نەیا دەقدایە
كەزییێن وێ وەكو یێن دەیكا من
شاهمارن خوە ب بەژنێ دا بەردایە
هێش دایكا من یا ساخ ناڤێ خوە ل سەر دانایە
چاڤێن وێ
ئێك كانیا دیجلەیە و
ئێك یا فوراتە و
قڕكا وێ ئاراراتە
ملێن وێ
ئێك رۆژئاڤایە و
ئێك رۆژهەلاتە
باكوری د گەل باشووری
دكەتە ئێك دەشت
ئێك چیا و
ئێك لاتە
هندی گولە
وەكو ناڤێ خوەیە
یا گەشە و یا ب خەملە
هەمی دەمان یا ب گرنژینە و
ب ترانە ڤە دبێژیتە من
تە كچكێن جوان نەدیتینە؟
دبێژمێ
بەلێ كچا من
تژی مالا منن و
هەمی وەكو تە بیبیكا چاڤی نە
یێن دی ئێك زەری یە و
ئێك پەری یە
نزانم زەری ژ بەهشتێ هاتیە
یان ژ نك خودێ دیارییە
نزانم پەری ژ دەریایێ دەركەفتییە
یان خودای دگەل زەرییێ ژ بەهشتێ هنارتییە
یا دوماهییێ ناڤێ وێ پێرۆ یە و
یا دوماهییێ یە
لێ ژ نوو ئەو بۆ دلخۆشییێ دەستپێكە
پارچەیەكە ژ بەهشتێ و
بەرملەكێ هیڤیانە
هێشتا ژ دایك نەبووی من حەز ژێ دكر
لەورا خەون و ژیانێن مە بوونە ئێك
دەمێ ژ دایك بووی
خەون و هیڤی ل گەل خۆ ئینان
دەمێ د هەمبێزا من دا درازێت
ئەز هێمن دبم و
هەر دەمێ ل چاڤێن وێ دنێرم بەهشتێ دبینم
گیانەكە خۆ ڤەدزییە ناڤا گیانێ من و
لێدانەكا دی ل لێدانێن دلێ من زێدە كریە
گرنژینا وێ رۆندكان ژ چاڤان ڤەدمالیت و
خەما سڤك دكەت
هندی بێژم تێرا وێ ناكەت
ژبەركو د جوانییێ دا
هەیڤا دو حەفتییە و
وەكو پامبی یا نەرمە و
شەرم دكەم بێژم
وەكو بابێ خۆ یا شرینە
لەورا ئەز هزر دكەم
هاتنا وێ بۆ ڤێ دونیایێ
ب تنێ نیشانا رازیبوونا خودێ یە ژ من.
