پتریا چارەسەریێن پەنجەشێرێ‌ دڤێت ل نەخۆشخانێ‌ بهێنەدان

بێوار شوكری:

د.رەزڤان فیصل، تایبەتمەندێ‌‌ نەخۆشیێن پەنجەشێریێ‌ دیاركر گەلەك جورێن چارەسەریا كیمیاوی هەنە كو نەخۆشێن پەنجەشێرێ‌‌ پێ‌‌ دهێنە چارەسەركرن و ب گەلەك رێكا بۆ نەخۆشی دهێنە دان، ب رێكا دەمارێن خوینێ‌‌ یان ب رێكا دەڤی وەكو حەبكا یانژی ب رێیا دەرزیك دانانێ‌‌ ل بن پیستی و ڕانی.
دەربارەی چارەسەریا كیمیاوی دیاركر كو پتریا چارەسەریا كیمیاوی پێدڤیە ل نەخۆشخانێ‌‌ بهێنەدان و ناهێنە برن بۆ مال، ب تنێ‌‌ د هندەك حالەتان دا نەبیت، بەلێ‌‌ هەكە ئەو چارەسەری حەب بن و بۆ دەمەكێ‌‌ درێژ بهێنە ب كارئینان بۆ نموونە سپێدێ‌‌ و ئێڤاری، ئەو دشێت ببەتە مال، بەلێ‌ چارەسەریا د سێلانیێ‌ دا دهێنە دان و ب رێیا دەماران پێدڤیە ل نەخۆشخانیێ‌ بهێنە دانان.
د.رەزڤان فیصل، دیاركر گەلەك چارەسەری دناڤ سێلانێ‌‌ دا دهێنە دانان وەكو نورمال سێلان یان گلوكوز سێلان، سێلانێن سەد یان پێنجسەد سیسی كو ددەستێ‌‌ نەخۆشی را دهێنە دانان، ئەڤە هەكە كێماسیەك یان خەلەتیەك چێبوو، ژبەر كانیولێ‌‌ كو نەخۆش هندەك جارا لڤینان دكەت، رەنگە كانیولە ژ جهێ‌‌ خوە ب دەركەڤیت یان كون ببیت و دەرمان بچیتە د ناڤ پیستی دا و ل وی دەمی رەنگە پیستێ‌‌ وی پیچ كەت، لەورا پێدڤیە ل نەخۆشخانێ‌‌ بیت دا راستەوخو بهێتە چارەسەركرن.
هندەك جارا ب رێیا خوینهنێرێ‌‌ سەرەكی چارەسەریا كیمیاوی دهێتە دان، یان هندەك نەخۆشان دبیت ئاریشێن گولچیسكان هەبن و ئەم دەرمانی دئێخینە وێ‌‌ كانیولێ‌‌ هێشتا یا ژدەرڤە، دووماهیا وێ‌‌ یا د خوینهنێریێ‌ سەرەكی دا، پتریا جاران چ ئاریشە ژیێ‌ پەیدانابن و ل وی دەمی نەخۆش دشێت چارەسەریا كیمیاوی ببەتە مال، هەر چەندە ئەو چارەسەری گەلەك جارا راستەوخو ناهێتەدان برێیا كانیولێ‌‌ راستەوخو، بەلكو ب رێیا پەمپەكێ‌‌ دهێتەدان و ژبەركو دناڤبەرا 24-72 سعەتا و هەتا بۆ چەند رۆژا دمینیتە ب نەخۆشیڤە، لەورا پتریا جاران نەخۆش دچیتەمال، بەلیێ‌ ب مەرجەكی كو ل دەستی نەبیت.
د.رەزڤان فیصل دیاركر كو هندەك جارا حەساسی ژ چارەسەریا كیمیاوی پەیدادبیت، لەورا یا باشتر ئەوە نەخۆش ل دەستپێكێ‌‌ ل نەخۆشخانیێ‌ وەربگریت، دا بزانین كا حەساسی بۆ ژێ‌‌ پەیدابوو یان نە و هەكە مە زانی چ ئاریشە نینن د دەرمانی و كانیولێ‌‌ دا، نەخۆش دشێت دەرمانێن خۆ ببەتە مال.
دیاركر ژی كو هندەك دەرمان ب ئێكجار نابیت بچن مال بۆ نموونە ئەوێن دژەتەن كو پروتیناتێن درێژن و حەساسیەكا دژوار هندەك جارا ژێ‌‌ پەیدادبیت و هەكە پەیدابوو پێدڤیە ستاف و نوشدار ئێكسەر بگەهنە نەخۆشی بۆ قورتاكرنا وی.

کۆمێنتا تە