سـاخلەمیا لـەشی گـرێدان ب ساخلەمیا دەروونی ڤە هەیە
بەرپەرێ ساخلەمیێ:
د. نوزاد سامی، تایبەتمەندێ نەخۆشیێن دەروونی دیاركر كو گەلەك جاران پرسیار دهێتە كرن، ئەرێ دكتور ئەز ژلایێ ساخلەمیا دەروونی یێ دروستم؟ یان دێ چاوا زانم من نەخۆشیەكا دەروونی یا هەی؟ و گۆت: هەكە ئەم بابەتێ ساخلەمیا دەروونی وەرگرین، گەلەك پێناسە یێن بۆ هاتینەكرن، ل دووڤ پێناسا رێكخراوا ساخلەمیا جیهانی بۆ ساخلەمیا دەروونی ئەوە كو هەر كەسێ ساخلەمیا وی یا دروست بیت، رامان ژێ ئەو نینە كو وی نەخۆشیەكا دەروونی نەبیت، بەلكو پێدڤیە ئەو كەس یێ چالاك بیت د جڤاكی دا و بشێت خۆ بگونجینیت دگەل گڤاشتنێن رۆژانە بۆ نموونە، یێن كاری و جڤاكی و مالێ، و بشێت كارەكی بۆ خۆ و جڤاكێ خۆ ب سەركەفتیانە بكەت و د هەمان دەمدا چ نەخۆشیێن دەروونی ل دەڤ نەبن.
سەبارەت وێ چەندێ كو چاوا كەسەك دێ شێت زانیت كو نەخۆشیەكا دەروونی یا هەی؟ د.نەوزاد سامی دیاركر، هەكە كارتێكرن ل هزرا كەسەكی هاتبیتەكرن، ل رەفتارێن وی هاتبیتەكرن، یان ل هەستێن وی، بۆ نموونە ئێك بێژیت هزرێن من گەلەك دوبارە دبن، ئەم دێ بێژین رەنگی وی نەخۆشیا وەسواسێ هەبیت، یان ئێك بێژیت هەلسوكەوتێ وی یێ تێك چووی، بهێت بێژیت دكتور بەری نوكە، یێ ئارام بووم و نوكە گەلەك تورە دبم، یان بێژیت هەستێن من یێن تێكچووین بۆ نموونە هەر یێ بێ زەوقە، یان زەوقێ وی گەلەك یێ زێدەبووی، هەر ئێك ژوان تێك بچیت و كارتێكرنێ ل مرۆڤی بكەت ئەم دبێژین وی نەخۆشیەكا دەروونی یا هەی.
هەروەسا دیاركر كو بۆ نەخۆشێن دەروونی هەر كەسەك ژ كەسەكێ دی جودایە و دڤێت بەرگریا كەسەكی یا دەروونی یا جودا بیت ژ یا كەسەكێ دیتر، رەنگە یا ئێكی یا لاواز بیت و ئێك یێ بهێز بیت، لەورا ژی گڤاشتنێن دەروونی ژی ژ كەسەكی بۆ ئێكێ دیتر د جودانە، بۆ نموونە رەنگە دو كەس تووشی روودانەكێ ببن، ئێك ژوان گەلەك كارتێكرن لێ ببیت و یێ دیتر لێ نەبیت، ئەڤەژی ڤەدگەریت بۆ چەند فاكتەران، وەكو یێن زكماكی و دەوروبەر و دەروونێ وی كەسی.
كەسێن ئاڤێ كێم ڤەدخۆن د مەترسیەكا مەزن دانە
رەنگە گەلەك كەس رۆژانە ل ئاڤ ڤەخوارنێ كێمتەرخەم بن یان ل هزرا وان بچیت، ئەڤەژی ژ مفایێن ئاڤێ بێ بەهر دكەت و رووبەڕووی چەندین زیانان دبن، لەشێ مرۆڤی پێدڤی ب ئاڤێ هەیە بۆ وێ چەندێ ئەندامێن لەشێ وی وەك پێدڤێ ئەركێ خۆ بجهبینن.
ماڵپەڕێ “WebTeb” د بابەتەكیدا ئاماژە ب زیانێن نەڤەخوارنا ئاڤێ كریە، پێكهاتینە ژ :
١. ئەو كەسێن وەك پێدڤی ئاڤێ نەڤەخۆن تووشی پیربوونا پێشوەخت دبن.
٢. ئەگەرێ توشبوونا وان ب نەخۆشیێن مەترسیدار زێدەتر بەراورد ب كەسێن ئاڤێ ڤەدخۆن.
٣. كێمڤەخوارنا ئاڤێ یان نەڤەخوارنا وێ ئەگەرێ تووشبوونێ ب نەخۆشیێن دلی، لەرزینا دلی، نەخۆشیا شەكرێ و جەلتا مەژی زێدە دكەت.
٤. نەڤەخوارنا ئاڤا پێدڤی وە دكەت پیست تووشی قورمچینێ و ئاریشێن دیترێن پیستی ببیت.
٥. كێمیا ئاڤ ڤەخوارنێ دبیتە ئەگەرێ قەبزی و زێدەبوونا ترشاتیێ مەعیدێ، كو رەنگە ببیتە ئەگەرێ بەرسۆژێ و برینا شانەیان.
