بیرهاتنێن نەخۆش دبنە ئەگەرێ خەمۆكیێ
بێوار باجلوری:
بیرهاتنێن نەخۆش هەموو دەما ڤالاتیەكێ د ژیانا مروڤی دا دروست دكەن و گەلەك جاران دبنە ئەگەر كۆ نەخۆشی و تێكچونێن دەروونی ژی لدەڤ مروڤێ پەیدا ببن، دەورنناسەكی ژی گۆت: بیرهاتنا كارتێكرنا خۆ ل سەر هەردو رەگەزان هەیە، بەلێ بەهرا پتر رەگەزێ مێ، چونكی ئەو دلینیترن و پتر دهێنە شكاندن.
شیرەتكارێ دەروونی، نەجمەدین بەدرەدین د دیدەركێ دا بۆ رۆژناما ئەڤرۆ دیار كر كو هەر ژ دەسپێكا چێبونا هەر بیرهاتنەكا نەرێنی و نەخۆش رۆژانە ل گەل مرۆڤی دژیت و بەردەوام دبیت، بتایبەت هەكە ئەو بیرهاتن یا گرێدایی بیت ب حەز و ئارەز و هزر و بیر و خوشیێت مرۆڤی وەكو، ژ دەستدانا حەزژێكرنێ یان خیانەتێ یان ژی ژ دەستدانا كەسەكێ خۆشتڤی، ئەڤە هەموو دبنە بیرهاتنێن نەخۆش بوو مرۆڤی.
نەجمەدین گۆت: (هەر دەمێ مرۆڤ دكەڤیتە د نەخۆشیەكێ دا یان تەنگاڤیەكێ دا بیرهاتن ل گەل مرۆڤی دوبارە دبن و وەدكەن كۆ مروڤ نەشێت پێنگاڤا بەر ب پێش بهاڤێژیت، چونكی مرۆڤ دترسیت ژ شكەستنێ و ژ دەستدانێ).
شیرەتكارێ دەروونی، د بەردەوامیا ئاخفتنا خۆدا دیار كر كو هەبۆنا بیرهاتنێن نەخۆش د ژیانێ دا دبیتە ئەگەرێ سەرهلدانا هندەك نەخۆشی و تێكچونێن دەروونی وەكۆ خەموكی و دوودلیێ، ئەڤە دبنە ئەگەر كو مرۆڤ هەموو دەما ئاستەنگا ل بەراهیكا خۆ ببینیت و گۆت: (ب شێوەیەكێ گشتی بیرهاتنێن نەرێنی كارتێكرنا خۆ ل سەر هەردو رەگەزان هەیە، بەلێ بەهرا پتر ل سەر رەگەزێ مێ، ژبەركۆ رەگەزێ مێ دلینیتر و نازكترە و پتر دهێتە شكاندن ژ رەگەزێ نێر).
نەجمەدین، شیرەتكارێ دەروونی گۆت: (هەر كەسەكێ بیرهاتنێن نەرێنی هەبن گرنگە بزاڤێ بكەت خۆ ژ وان جه و تشتا دویر بێخیت یێن دبنە ئەگەرێ تێكچونا دەروونێ وان، هەتا ب سەرەدان ژی بلا نەچیتە وی جهی و هەكە كەسەك ژی ببیتە ئەگەرێ وێ بیرهاتنێ لدەڤ وی دڤێت خۆ ژێ دویر بكەت).
شیرەتكارێ دەروونی گۆتژی: (پێدڤیە مە پێگهوڕەك هەبیت بۆ بیرهاتنا خۆ بۆ نموونە: هەكە مرۆڤی بیرهاتن ل گەل كەسەكی هەبیت بزاڤێ بكەت كەسەكێ دی بینیتە دناڤ ژیانا خۆ داكو جهێ وی بگریت و هەموو ڤالاتیێن لدەڤ وی تژی بكەت، داكۆ بشێت بشێوەیەكێ سروشتی ژیانا خۆ دەرباز بكەت).
