قوربانیا جەژنا قوربانی
د. ئەمجەد عوبەید
بتنێ سێ رۆژ مابوون بۆ جەژنا قوربانی، ئەو رۆژا دووێ بوو پشتی گیروبوونەكا درێژ حوكمەتێ مۆچە دابەش دكرن.. وی و هەڤالێ خو ژڤانبوو كو دەمژمێر شەشێ ئێڤاری، ل وێ گازینویا هەرجار ئێكودو لێ ددیت، پێگڤە قەهوەكێ ڤەخون.
گەلەك رێز ل دەمی دگرت لەورا بەری ژڤانی ب پێنج خۆلەكان ل جهێ دەستنیشان كری یێ ئامادەبوو..
ئاڤەك ژ شاگردێ بخێر هاتن لێكری خواست و جگارەك بەردایێ،
دەمژمێر شەش و دوازدە خۆلەك تێلەفونا هەڤالێ خو كر، و ب رتمەكێ تورەیی پێڤە دیار گوتێ:
– ئەڤە چ ل تەهات، تو ل كیڤەی؟
– برا دونیا خرابینە، ئەزێ دناڤ قەرەبالغا ترومبێلان دا ئاسێ بوویم.
ژ نوی بیرا وی هات كو عەرفاتێن جەژنێ نە وبەرویكا خەلكی یا گەرم بووی، لەورا پیچەك ئارامی ب سەردا هات و خۆ ب موبایلێ ڤە مژویل كر.
ئەوی و هەڤالێ خو بەحسا گێرانا جەژنا و ئەڤ مەزاختنێن هندە زێدە دكر.. دگۆتە هەڤالێ خوۆ هندەك دابونەریتێن نە جوان یێ دناڤ جڤاكێ مەدا خۆزی نەمابان، تو باوەر دكەی بۆ ڤێ جەژنێ مە ئێك مەلیون دینار یا مەزاختی.. باشە پا ئەڤێن مۆچێن وان نیف ملیون و كێمتر دێ چكەن، پا ئەوژی خو نادەنە ب كەسێ..دەمێ هەڤژینا وی تێلەفون بو كری و گۆتیێ ئەز ژ بازاری خلاس، دێ بۆ شیڤێ هێیەڤە یان نە.. و بەردەوامی دا ئاخفتنا خۆ: ئەڤرۆ دلێ من گەلەك ما ب ژنەكێ ڤە.
– خێر بوو؟
وەكی زارۆكان دكرە گری ل نیڤا بازاری و دگۆت:
وەیلە ل منێ شەهمەزارێ، ئەڤرۆ هەڤژینێ من مۆچێ خۆ یێ وەرگرتی ومن هەمی یێ دگەل خۆ ئینای دا كو تشتێت جەژنێ پێ بكرم.. و یا ژ وێ ژی كمباخ تر، دەه وەروقێن دولاری یێن خەسویا من ژی ئیمانەت دگەل بوون ومن هەمی كربوونە د جزدانكا خۆ دا، و جزدانكا من یا هندا بووی، ئەز نوزانم دێ ب چ روی چمە مال..ڤێجا گەلەك یا جان و جحێل ژی بوو.
وێ شەڤێ دادگەها وی ل مالا وان ب توندی و بێ دادپەروەری وبێ دیدڤان وبێ پارێزەر هاتە كرن.
خەسویا وێ، بسكێن خۆ یێن سۆر لێ باددان و دگۆتێ: دەهمەن پیسا سەی، خودێ د زانیت تە ئەو پارە یێ مە ب زكات و سەدەقا خرڤە كری كا تە داینە دایكا خۆ یان برایەكێ خۆ یێ بكێر نەهاتی و فەلیتێ كۆلانا.
دشا وێ یا قەیرە یا كوریا وێ د سەد تەلها را قەتیای لێڤێن خۆ ئەوێن وەكی قوینا كەری دەمێ ل ژێهەلییان تڕا دكەت لێ مووچ كرن و دگۆتێ: كێ نا بێژیت یێت داینە دەزگرێ خۆ؟
تاوان ل دویڤ تاوانێ پێڤە نوساندن..
دلقوتكێ ئەو و هەڤژینێ وێ یێ خۆلی سەر گرتبوون..
هەڤژینێ وێ یێ پەیكەفتی وێ شەڤێ ژبەر پەریشانییا خۆ ژ هەمی جاران بێ دەستهەلاتتر بوو..د دلێ خودا دگۆت ئەڤێ ژنا كورێن ئاغا و بەرپرسا هێڤی ژێدكرن، و ب من و ئەڤ جەهنەما ئەز تێدا رازیبووی، و رۆژەكی هندی سەرێ دەرزیكێ قوسویرییەك لمن نەهێلای.. چما ئەڤ زۆلمە لێ بهێتە كرن.
ئەوی دزانی قوربانێ وی بۆ ڤێ جەژنی گەلەك یێ گرانە.
ئەوێ ئێخسیرێ ژی گەلەك هەول دان بەرگریێ ژ خۆ بكەت، سەد جاران پتر دەستێ خۆ ل قورئانێ دا..یا بێ مفا بوو.
هەر وێ شەفێ تێلەفونا مالباتا وێ كرن و گۆتنێ وەرن گچا خو ببەنە مال، بكێر مەناهێت..
و سێ بشكۆژێن گولا ژ باوەشا دایكێ دوورخستن و هێلان سێوی.
رۆژا پاشتر ئەز و هەڤالێ خۆ ل هەمان گازینویێ بووین دەمێ پەیڤدارێ پولیسێن باژێری لسەر شاشا تیڤیێ، دان و ستاندن دگەل كەسەكی دكرن و پەسنا دەست پاكییا وی دكر و سالوخەتێن جزدانكەكا ل بازاری هاتیە دیتن دیار دكرن، و ژ بینەرا دخواست كو هەر كەسێ خۆ بخودان بزانیت، دشێت سەرەدانا مە بكەت.
