دەستكاریكرن د فولكلۆری دا
حەجی جەعفەر
سالا 1983 بوو, د رۆژنامەیا هاوكاری دا, ژمارە (716), رۆژا (15/12/1983), من گۆتارەك رەخنەیی ب ناڤونیشانێت (دەستكاریكرن د فولكلۆرێ كوردی دا گونەهەك مەزنە) بەلاڤكربوو.
گوتارا ناڤبری بەرسڤەك بوو, بۆ وێ دەستكاریا دكتۆر (محمد سعید رەمەزان بوتانی) د چیرۆكا (خەج و سیابەندی) دا كری.
ئەوی د پەرتووكا خوە دا ئەوا بناڤونیشانێت (من الفكر والقلب) یاكو سالا 1972 بەلاڤكری, گەلەك دەستكاری د ڤێ چیرۆكێ دا كربوو, ژ وان دەستكاریا: 1 ـ ناڤێ چیرۆكێ كربوو (الوعل) ئانكو نێریێ كیڤی, 2 ـ ناڤێ سیابەندی كربوو (عصام), 3 ـ ناڤێ خەجۆكێ كربوو (وفا‌و) و گەلەك دەستكارێت دی.
ئەڤ گۆتنا من كری, بۆ وێ سەرهاتی یێ بوو, یاكو د كۆڤارا (سڤۆرە) دا ژمارە (283), سالا 2023 ب ناڤونیشانێت (پارێن ئاڤێ و پارێن شیری), لبن ناڤێ (هێژا وەیسی) هاتیە خوار.
دیتنێت من لسەر ڤێ سەرهاتیا ب هزرا چیرۆكا زارۆكان هاتیە خوار ئەڤەنە:
1 ـ جارا ئێكێ؛ ئەڤە چیرۆكەكا زارۆكان نینە هەتا د كۆڤارەكا زارۆكان دا بێتە خوار, بەلكو ئەڤە سەرهاتیەكا فولكلۆری یە, یا د پەرتووكا (خوناسین و كۆچەك زان)دا هاتی یا نڤیسەرێ خودێ ژێ رازی (تارق شوكری خەمۆ), هەروەسا یا د پەرتووكا (گلاڤێژ, كۆمەكا چیرۆك و سەرهاتیێت فولكلۆری ل دەڤەرا بادینان) دا هاتی یا نڤیسەر حەجی جەعفەر.
2 ـ خالا دوویێ ناڤێ سەرهاتیی یێ (پارێن ئاڤێ و پارێن شیری) نینە, د پەرتووكا تارق دا یا هاتی (مالێ ب ئاڤێ هاتی دێ ب ئاڤێ چیت), هەروەسا د پەرتووكا (گلاڤێژ) دا هاتیە (حەقێ مایی چوو ب مایی). ئەو ناڤێ د كۆڤارا سڤۆرەدا هاتی (پارێن ئاڤێ و پارێن شیری) نڤیسەری یا ژ نك خوە چێكری!
3 ـ جارا سێیێ, مەیمینكێ چ پەیوەندی ب ڤێ سەرهاتیێ ڤە نینە, نڤیسەری ژ نك خوە یا چێكری, ئانكو دەستكاریا د فولكلۆری دا كری, ئەڤە ژی ب چ رەنگان نابیت.
4 ـ نڤیسەری ئاماژە چ ژێدەران نەكریە, هەروەكو دبێژیت, ئەڤ كارێ ئەدەبی ژ هزرا منە!
5 ـ فولكلۆرێ بەهدینان ب چ رەنگان نابیت ب (ێن) كۆمكەین, وەكو وی گۆتی (پارێن) ئاڤێ!
هەر ب ڤێ هەلكەڤتێ دەلیڤەیە بێژم, ئەو سەرهاتیا بناڤێ (دهێتە سۆتن و ناهێتە گۆتن) كو سەرهاتیەكا فولكلۆرێ باینانە و د كۆڤارا (سڤۆرە) دا, ژمارە (282) دا, 2023, ل بن ناڤێ سەیدا رێكێش ئامێدی, نابیتە چیرۆكا زارۆكان, هەروەسا ئەوی ژی وەكو هێژا وەیسی؛ پەیڤا (زارۆك) یا ب (ێن) كۆمكری, یا نڤیسی (زارۆكێن) هەروەكو مە گۆتی, نابیت فولكلۆرێ بەهدینان ب (ێن) كۆمكەین، چونكی دەڤەرا بەهدینان ب (ێت) كۆمدكەن.
ل داویێ هیڤی ژ دام و دەزگەهێت رەوشەنبیری دكەم ڤێ خالێ بەرچاڤ وەرگرن.
