رۆلێ ئافره‌تێ دپێگه‌هێ سیاسى دا
هه‌یفا عه‌لى دۆسكى
ل چه‌رخێ دوماهیێ یێ كو جیهان تێدا دژیت و ده‌رباز دبیت، هه‌كه ئه‌م به‌رێ خوه بده‌ینێ كو رۆلێ ژنێ د پێگه‌هێ سیاسى دا پتر به‌ره‌ڤ پێش چوویه، ئه‌ڤه ژى خاله‌كا ئه‌رێنى یه و شیانێن ژنێ زێده‌تر یێن به‌ره‌ڤ ئارسته‌كێ باش دده‌نه رێ، بۆ ئه‌ڤێ چه‌ندێ ژى هه‌كه به‌رێ خوه بده‌ینه ڤێ و قۆناغا دوماهیێ؛ دێ بینین كو تێگه‌هشتنه‌كا سه‌رتاسه‌رى د یه‌كسانیا جڤاكى دا په‌یدابوویه، نه‌خاسمه خوه جیها دیموكراتى زێده‌تر گه‌شه كریه، ئه‌ڤه تایبه‌ت د هنده‌ك وه‌لاتان دا، ئانكو پشتى چالاكیێن وه‌لاتێن زلهێز زێده‌تر كار ل سه‌ر مافێن مرۆڤى دكه‌ن، ئه‌ڤ خاله ژى كه‌فتیه د قرناغا گه‌شه‌كرنێ دا، ئه‌ڤه ب تایبه‌ت ئافره‌تێ ژى ڤه‌دگرن و تازه دكه‌ڤیته د كارى دا و به‌ره‌ڤ پێش ڤه دچیت، ئانكو هنده‌ك رێكخراو و جهێن تایبه‌ت یێن ب كاروبارێن نشتیمانى ڤه پالپشتیا ژنێ دكه‌ن كو ژن د كارێن مه‌ده‌نى و سیاسى دا پشكدار ببیت.
به‌لكو گه‌له‌ك ئاریشه و گرفت و خالێن تێكگه‌هشتنێ په‌یدا دبن كو ژن زوى به‌ره‌ڤ پێشڤه نه‌چیت هه‌تا ئه‌گه‌ر هه‌نه كو تووشى هه‌ڤڕكیێن (جڤاكى، سیاسى، ئابۆرى، رێكارێن یاسایى) ببیت و نه‌گه‌هیته ئارمانجێن خوه.
زێده‌بارى هه‌تا كو ژن بشێت و بڤێت پشكداریێ د گۆره‌پانا سیاسى دا بكه‌ت ئه‌و پێدڤى چالاكیێن مه‌یدانى و جڤاكینه هه‌ول بده‌ت هنده‌ك ژ رازیبوونا جه‌ماوه‌رى و سه‌ر و سیمایه‌كێ ب هێز و پێگه‌هه‌كێ په‌یت یێ ئاڤاكرى ب ده‌ستخوه‌ڤه بینیت دا بشێت بگه‌هیته ئارمانجێن خوه و به‌رانبه‌ر هه‌ر هه‌ڤركیه‌كا په‌یدابوو رابوه‌ستیت، هه‌تا ل سه‌ر ئاستێ خێزانى ئه‌و پێدڤى ب پشته‌ڤانیا ره‌گه‌زێ به‌رانبه‌ره وه‌كو هه‌ڤژین و مال بابا و برا و زارۆك، چونكى ل ده‌مێ ژنێ زێده‌تر باوه‌رى ب ده‌ستخوه‌ڤه ئینا، چونكى د ڤێ ئاوایى دا ئه‌و دشێت ژ چارچووڤێ ئه‌و تێدا یێ گرتى به‌ره‌ڤ جهه‌كێ گشتى وه‌كو گرێدایى سیاسى و پێگه‌هه‌كێ ڤه‌كرى كو سه‌ر ب حوكمه‌تێ و سیاسه‌تێ ڤه بیت، جاران ژى هه‌یه ده‌مێ ژن هاته د ناڤ پێگه‌هێ سیاسى دا وه‌لات ژ وه‌لاتى جودایه و ل كوردستانێ دا ژى تا نوكه جاران ب سیسته‌مێ (كۆتا) ده‌ردچیت و ئه‌ڤه هه‌كه پشكدارى خوه به‌ربژاركرنێ كر د هه‌ر جهه‌كێ دا بیت تایبه‌ت ئه‌م یێن به‌حس ل بیاڤێ سیاسى دكه‌ین، ئانكو ملله‌ت و حوكمه‌ت پێدڤى ب هه‌بوون و رۆلێ وێ دبیت د قادا سیاسى دا، ژبه‌ر مه بڤێت و نه‌ڤێت ئه‌ڤرو ژیانا سیاسى خواستیه ژن پشكدارى هه‌مى پێگه‌هان ببیت و ببیته خودانا بریارێ، ئه‌ڤجا دیتنه‌كا جودا هه‌یه جاران ژن روی ب روى گه‌له‌ك هێرشێن جڤاكى دبیت، به‌لێ ئاست و پێگه‌هێ وێ یێ ب هێز دێ بیته په‌رژانه‌ك، ئه‌وێ ژ گه‌له‌ك ئالیان بپارێزیت و رۆلێ خوه وه‌ك ژنه‌كا سه‌ركرده بگێریت و گه‌له‌ك جاران ژى خزمه‌تا ملله‌تى بێ جوداهى بكه‌ن، مه‌رج نینه بتنێ د بیاڤێ سیاسى یێ ژنان دا بتنێ دا بكه‌ت، به‌لكو پشكداریێ د حوكمه‌تێ دا دكه‌ت و ئه‌ڤه باباسالارى پێ نه‌ڤێت، به‌لكو هه‌لسه‌نگاندنا شیانان ره‌گه‌ز ل به‌ر چاڤ ناهێنه وه‌رگرتن ده‌مێ ژن خودان پێگه‌هێ ب هێزێ جه‌ماوه‌رى و سیاسى و ره‌وشه‌نبیرى بیت.
هه‌تا جاران هنده‌ك هزر و ئایدولۆژیێن جودا كارتێكرنێ دكه‌نه سه‌ر كه‌ساتیا ژنێن سیاسى و جڤاكى دابه‌ش دكه‌ن ل سه‌ر هزرێن جودا بۆ پشكداریا ژنێ د سیاسه‌تێ دا و ئه‌ڤه جاران رێگریه‌كێ په‌یدا دكه‌ت و ژن ده‌مێ یا ب هێز نه‌بیت، نه‌شێت ل هه‌مبه‌ر ئه‌ڤان دیتنان رابوه‌ستن، ل ڤێره بابه‌ته‌كێ دى دهێته د گۆرپانێ دا، ئه‌و ژى پێدڤیا جه‌ماوه‌رى و ته‌خێن جودا ل سه‌ر هه‌بوونا ژنێ د وى كارێ سیاسى دا به‌ره‌ڤانیێ ژێ دكه‌ت و ژن ب هێزتر دكه‌ڤیت، لێ تشتێ باش ئه‌وه گه‌له‌ك پێشكه‌فتن د ره‌وشت و تیتالان دا په‌یدا بووینه، جڤاكى و زێده‌تر باوه‌رى ب هێزا ژنان هه‌یه د سیاسه‌تێ دا، هه‌تا د كاروبارێن گشتى یێن حوكمه‌تێ دا.
خالا ل دوماهیێ ئه‌وا گرنگه به‌حس لێ بكه‌ین كو جاران ئه‌ڤ پێگه‌هێ ژنێ ب هێز دبیته هۆكارێ ئاڤاكرنا جڤاكه‌كێ ب هێز یێ هوشیار و دبیته هه‌ڤكار و كه‌سه‌كا هاریكار هه‌تا بۆ ره‌گه‌زێ به‌رانبه‌ر كو دروست رۆلێ خوه بگێرن، به‌س ژبیر نه‌كه‌ین ئه‌و یاسا دو ریسایێن حوكمه‌تێ و ده‌ستوور ژى هاریكارن كو ببنه به‌ره‌ڤانیكرن ژ پێگه‌هێ ژنا سیاسى كو رێكێ بده‌نێ بشێن رۆلێ خوه د پێگه‌هێ سیاسى دا ببینن و ب هێز بكه‌ڤن.
