ئیراق ئاهێن خوارنێ یێن نەساخلەم ل سەر ئاوارەیان بەلاڤ دكەت
لەزگین جوقی
ئەندامەكا پەرلەمانێ ئیراقێ دیار كر، دێ راپۆرتەكێ ل سەر ئاهێن خوارنێ یێن نەساخلەم و گازا پیس یا ژ لایێ وەزارەتا كۆچ و كۆچبەرێن ئیراقێ ل سەر ئاواران ڤە هاتیە بلاڤكرن دەینە مەحەمەد شیاع سوودانی و پێدڤیە لێپرسین دگەل وەزارەتا كۆچ و كۆچبەرێن ئیراقێ بهێتە كرن».
ڤیان دەخیل، ئەنداما جڤاتا نوونەرێن ئیراقێ راگەهاند، ئەڤە 10 سالە خەلكێ شنگال ئاوارە و گەلەك ئاوارێن مووسل و ئەنبار هێشتا ماینە نەشیاینە ڤەگەرن، ئەڤە 10 سالن گەلەك جاران ئاهێن خوارنێ یێن دەم ب سەر ڤەچوویێ و گەندەلی هەیە، ئەڤە 10 سالە وەزارەتا كۆچ و كۆچبەرێن ئیراقێ هێشتا خیڤەتێن ئاوارەیان نە گۆهارتینە و ئەڤە ناهێتە قەبوولكرن، ئەو پارەیێ بۆ وەزارەتێ دهێتە تەرخانكرن وەكو پێدڤی هەڤكاریا ئاواران پێ ناهێتە كرن».
تەكەز كر، ل سالا 2022ێ وەزارەتا كۆچ و كۆچبەران ل ئیراقێ دوو جاران ئاهێن خوارنێ ل سەر ئاواران بەلاڤ كرینە و گەندەلی تێدا هەیە و بەلگە هەنە ئاهێن خوارنێ یێن نەساخلەم هاتینە بەلاڤكرن، دێ وەزێرا كۆچ و كۆچبەران بۆ پەرلەمانی داخوازكەین و دان و ستاندن دگەلدا هێتە كرن، چونكو گەندەلیەكا مەزن تێدا هەیە».
پیر دەیان، رێڤەبەرێ كۆچ و كۆچبەران و بەرسڤدانا قەیرانا ل پارێزگەها دهۆكێ دیار كر، هەتا نوكە پتر ژ 300 هزار ئاواران ل پارێزگەها دهۆكێ ماینە، نوكە سێكتەرێ ئاڤێ و كارەبێ و راكرنا گلێشی و ساخلەمی و پەروەردێ برێڤەدبەت، ئەڤ هەر پێنج سێكتەرێن گرنگ بەری نوكە ژلایێ رێكخراوان ڤە هاتنە برێڤەبرن، پشتی رێكخراوان خۆ ڤەكێشای هەر پێنج سێكتەرێن سەرەكی ژلایێ حوكمەتا هەرێما كوردستانێ ڤە دهێنە برێڤەبرن».
ئاشكرا كر، هەتا نوكە پتر ژ 300 هزار ئاوارە ل پارێزگەها دهۆكێ ماینە و نەشیاینە ڤەگەرنە سەر جهـ و مالێن خۆ و حوكمەتا ئیراقێ ژی وەكو پێدڤی هەڤكاریا ئاواران ناكەت».
