دو كورته چیڕۆك
بژیان سه‌بری مه‌سیحه
رێیا دویێ
درەوەكا جوان بوو، تا وی ڕادەی نەشیام هزرێ تێدا بكەم.. تو دزانی هژمارا وان لاپەڕا هند دزۆرن، كەس نزانیت كانێ كەنگی دێ بداوی هێن.
ب درێژاهییا هژمارا ڤان لاپەڕا ئەز یا چاڤەرێی هاتنا تە بووم.. من گەلەك هیڤی و خوەزی بۆ خوە چێكرن، نینوكێن خوە من بویاغ كرن و من هزر كر ڤان رۆژا دێ گوستیرا خوە نیشا هەڤالێن خوە دەم و دێ بێژمێ فێرسێ ئەشقا من هات، بەلێ چ هاتن؟!
بەری بگەهیت، ئەز ل نیڤا رێكێ هێلام و ئەو هەناسا ئەز پێ دژیام ژی.. ژ من دزی، راستە یا بهێزم، لێ ئێدی ئەز ژی هەست ب لاوازییێ دكەم ل بەرامبەر ڤان دلێن ڕەق؛ یێن كو حەز ژ من كری.. بەلێ بۆ جارەكا ب تنێ ژی، ل من ئاشق نە بوو.
ئەز ب ساناهی دەستان ناداهێلم.. بەلێ ب مخابنی ڤە، تە ئەز ب جەگەرا دایكا خوە تاقیكرم.. بلا دایكا تە.!! بەس ئەز ژی خوشتڤییا تە بووم و چ جار خوشتڤییێ خوە بۆ وەلاتەكێ سار و شەڤی ناهێلم. بەس تە گۆتبا من تو یا منی.. دا هەمی تاجێن ئەلماسی و هەمی یاسا و وەلاتان هێلم، دا كو ڤان لاپەڕا بگەهینمە بنەجهـ و ب تنێ لاپەڕەكی بكەمە راست، بەلێ ئەڤ شەڤە تە هەمی لاپەڕ د ناڤ درەوەكا خوە دا ب ئێكجاری ب ئاگرێ دو دلیێ سۆتن.
یێ نەدیتی، نەدزانی..!!
حەزژێكرنێ چاڤێن وێ تاری كرن.. هەمی كەس هێلان.
هەتا ئەوا ژیانا خو دایە وێ و مەزن كری..!! دیناتییا عەشقێ وەل وێ كر، هەمی تشتا گوری وی بكەت، بێ هزر كرن رازی بوو و چوو بۆ باوەشا وی..
كەتە د خانیكێ وی یێ ئاخێ ڤە.. رۆژانە بان دگێرا، ببوو حەزژێكەرا پۆستال و تزبییێن وی یێن نەخشێ وان ل سەر دێمێ وێ دهاتە چێكرن و هەر دەمێ تە گۆتبایێ ژیانا هەڤژینییێ یا چاوایە، دا بێژیت یێ نەدیتی نزانیت، كەس د ڕامانا پەیڤێن وێ نەدگەهشت، رۆژەكا ب تنێ ژی، ژبلی وێ پەیڤێ تشتەكێ دی نەگۆت.
