“بەس بهێلە ماچەكێ ل بابێ خۆ بدەم”
ئەلند مزووری
باب ما هەمبێزا تە چەند یا گەرم بوو، دلێ تە چەندێ مەزن بوو … سینگێ تە هێلین و مێرگا داخوازیان بوو.. چ جاران تە دەرگەهێن هیڤیا لمن نە دائێخستینە، هەمی جاران بێ دەستویری لێڤێن من یێن وەكی پەلاتینكا لسەر گۆلزارا رویكێن تە دا د دا و هەتا شێلاڤا عەشقا لێڤێن من وەك تەڤیە بارانەكا خەریب رویكێن تە تژی خۆناڤ نەكربا ژێ تێر نەدبووم، هەمی دەمان من راستەوخۆ و بێ دەستویری رۆیكێ تە ددانە بەر پێلێن ماچان، بابوووو.. رویكێن تە بۆ من وەكی مەزارگەهەكی بوو.. هەتا حەفت جارا لدۆر نەزڤریبام و هەر حەفت جاران ماچ نەكربان..ئەو دیدار یا ڤالابوو، ب هەر ماچەكێ هیڤیەك تە ددلێ من دا دچاند ئۆمێدەك بەرەڤ كاروانێ پاشەرۆژێ دگەهاند، لێ بۆ ئێكەم جار من دەستویریا ماچەكێ ژ رویكێ تە خواستی، ئەو ماچ بوو یا برینەكا بێ سارێژ ددلێ من دا ڤەكری و رێكا من هێلا بێ چراك و رۆناهی لێ ڤەمری، بتنێ ئێدی كارێ من بۆ رۆندك و گری.. دلێ من ژی كرە گۆرستانا خەون و هیڤیێن سێویكری، وەك وێ پەلاتینكا رێكا باخچێ خۆ بەرزەكری، ئێدی لێڤێن من ب ئێكجاری ژماچكرنێ تۆبەكری.. تۆبەكری.
“دیدار”
هزار ژانا
بگرنژینەكا تە
ئەز دێ بهوژینم
خوزیێن كۆ
تو دخەونان ژی دا
نەبینی
ئەز دێ وەكی
تاڤیە بارانەكا كویڤی
لتە بارینم
پایزا تە
یا هزار هیڤی
دگەل خۆدا وەراندین
دێ كەم بوهار..
هەمی رەنگێن
جوان كۆلیلكان
كەمە هیڤی
بۆ ژینا تە…
لێ خەملینم،
بۆ ئێك دیدارا بەژنا تە
قۆناغ .. قۆناغ
چیا بڕم
دەشتان بڕم
دا وان كەنی و..
گرنژینێن
ژلێڤێ تە مشەخت و
ئەوارە و ڤەقەتیای
ڤەگەرینم،
دلكێ خۆ
بۆ عەشقا تە
یا پاك و پیرۆز
كەم گولستان
كەمە پایتەخت
كەم هیڤستان
تە تێدا بكەم
شاهـ و سولتان.
