گولان.. نیشانا گه‌له‌كێ زیندی
سه‌رنڤیسه‌ر
پشتی هه‌لنگفتنا شۆڕشا ئیلۆنێ ل سالا 1975ێ، وه‌كو ئه‌نجامه‌كێ پیلانا جه‌زایرێ ل ناڤبه‌را ئیراق و ئیرانێ و ب چاڤدێریا جه‌زایرێ، وه‌سا هاته پێشبینكرن كو شۆڕشا خه‌لكێ كوردستانێ ب رابه‌ریا بارزانیێ نه‌مر، ب دوماهی هات و ده‌گمه‌نه رێبه‌ره‌كێ ل ئاستێ وی چیایێ سه‌ربلند و خوه‌راگر په‌یدا ببت، لێ ل نیسانا هه‌مان سالێ، سه‌ركردایه‌تیا پارتی، كۆمبوونه‌كا نهێنی به‌ست و تێدا نه‌خشه‌ڕێ یا پاشه‌ڕۆژێ هاته دانان و هێدی هێدی و ب نهێنی، بناغه‌یێ شۆڕشا شۆڕشا نوو ب چاڤدێریا بارزانیێ نه‌مر هاته دانان، نه‌دووره گرنگترین بڕیارێن هینگێ، دامه‌زراندنا سه‌ركردایه‌تیا به‌روه‌خت بت، ب ئه‌ندامه‌تیا هه‌رئێك ژ؛ مه‌سعود بارزانی، ئیدریس بارزانى، جه‌وهه‌ر نامیق، كه‌ریم شنگالی، عارف ته‌یفور، حه‌مه ڕه‌زا و ئازاد به‌رواری.. و ڤه‌گه‌ڕان بت بۆ مه‌یدانا خه‌باتێ ل وه‌لاتی.
چونكی نیشانێن نه‌ساخیێ ل بابێ رۆحیێ كوردان دیار ببوون، ئه‌ڤێ جارێ سه‌رۆك بارزانی دگه‌ل كاك ئدریسێ جوانه‌مه‌رگ سه‌ركردایه‌تیا به‌روه‌خت، سه‌ركێشیا شۆڕشێ كر و ل 16 گولانا 1976ێ، بۆ هه‌می جیهانێ دیاركر كو كورد و پارتی ئێكن و هه‌ردو زیندی و ره‌نجینه‌ناسن و قه‌ت خوه‌چه‌ماندن بۆ دوژمنان د فه‌رهه‌نگا وان دا نینه.
هه‌ر زوو، پێشمه‌رگه‌یان به‌رپێك گرێدان و تفه‌نگ كرنه دۆست و یار، دۆل و چیایێن كوردستانێ كرنه مال و خێزان، و نه‌هێلان دوژمن خوه‌شیێ ب سه‌ركه‌فتنا خوه یا به‌روه‌خت ببه‌ت.
ب دیتنا من، گرنگیا شۆڕشا گولانێ ژ هنده‌ك ساخله‌تێن گرنگ دهێت: ئێك، هه‌ر شۆڕشه‌كا پشتی شكه‌ستنا 1975ێ وه‌كی ڤه‌ژیانا فینیكسێ بوو ژ خوه‌له‌په‌لێ، چونكی د خه‌ونێ ژی دا نه‌دهاته پێشبینكرن كو د ئه‌وی ده‌مێ كورت دا، كورد دێ شێن خوه بۆ شۆڕشه‌كا دی به‌رهه‌ڤ بكه‌ن. دو، شۆڕشا ئیلۆنێ، په‌نجه‌ره‌یه‌ك هه‌بوو، ب جۆره‌ك هاریكاریا ئیرانێ دشێیا ب سانه‌هیتر كاروبارێن خوه بڕێڤه ببه‌ت، ب كێماتی سینۆر بۆ شۆڕشێ و شۆڕشگێڕان ڤه‌كری بوو، پشتی پێكهاتنا جه‌زایرێ، ئێك ژ مه‌رجێن پێكهاتنێ، گرتنا سینۆری بوو لبه‌ر هه‌ر بزاڤه‌كا ئازادیخواز، ئانكو ل پراكتیكێ و ژیواری، ئیران ژی ببوو دوژمنه‌كا شۆڕشێ. ب ئه‌ڤێ ره‌وشێ، شۆڕشگێڕ دێ د ناڤبه‌را چار ده‌وله‌تێن دوژمن دا خه‌باتێ كه‌ن. سێ، شۆڕشا گولانێ، تاكو راده‌یه‌كا مه‌زن، شۆڕشه‌كا خوه‌ژی بوو، ئانكو پشته‌ڤانه‌كێ ئاشكرا بۆ نه‌بوو، له‌و هه‌می شۆڕشگێڕێن هینگێ، مه‌رگێ وان دگه‌ل وان دگه‌ڕا. چار، شۆڕشێ ب ته‌رزه‌كێ دی و نووژه‌ن ده‌ست پێ كر، سه‌ركردایه‌تیا به‌روه‌خت شه‌ڕێ پارتیزانی دگه‌ل رژێمێ و كرێگرتی یێن وێ كر و د ده‌مه‌كێ كورت دا، بۆ ناڤخوه ئاشكرا بوو كو خه‌ونا كوردستانیان زیندیه. پێنج، تاكو 1975ێ، شه‌ڕێ شۆڕشێ دگه‌ك حوكمه‌تێ و كرێگرتیان بوو، لێ پشتی شكه‌ستنا شۆڕشا ئیلۆنێ، دوژمنه‌كێ خه‌ته‌رتر سه‌رهلدا، ئه‌و ژی هه‌ڤڕكیێن ناڤخوه یێن هێزێن سیاسیێن كوردستانی كو پشتی شكه‌ستنا 1975ێ هێدی هێدی په‌یدا ببوون. ب ئه‌ڤی ئاوایی، ژبلی دوژمنێن به‌رنیاس، دوژمنیا ناڤخوه‌یی ژی ل شۆڕشێ زێده بوو.
ل سالڤه‌گه‌ڕا شۆڕشا گولانێ فه‌ره پێشمه‌رگه‌یێن ئه‌و رۆژێن دژوار و سه‌خت كرینه ئاشتی و ئاڤه‌دانی ژبیر نه‌كه‌ین، و سه‌رێ خوه بۆ شه‌هیدێن شۆڕشێ و سه‌ركاروانێ وان، بارزانیێ نه‌مر و كاك ئدریسێ جوانه‌مه‌رگ دچه‌مینین. هه‌روه‌سا وه‌كو وه‌فاداری بۆ خوونا شه‌هیدان و ره‌نجا پێشمه‌رگه‌یان، فه‌ره وه‌كو پێشمه‌رگه‌یان پشتا حوكمه‌تا هه‌رێمێ بگرین و دگه‌لێك پیلانێن برسیكرنا خه‌لكێ هه‌رێمێ و لاوازكرنا خه‌ونا شه‌هیدان پووچ بكه‌ین.
