ب هەلكەفتا رۆژا جیهانی یا ساخلەمیا دەروونی چەندین چالاكی ل دهۆكێ هاتنە كرن
دهوك، لەزگین جوقی:
ب چاڤدێریا د. سامان بەرزنجی، وەزیرێ ساخلەمیێ ل حكومەتا هەرێما كوردستانێ و د. ئەفراسیاب موسا، رێڤەبەرێ گشتیێ ساخلەمیا پارێزگەها دهۆكێ و ماجد سەید سالح، نوونەرێ پارێزگارێ دهۆكێ و د. نەوزاد عەبدوللا، بەرپرسێ لقێ ئێك یێ پارتی، ب هەلكەفتا رۆژا جیهانی یا ساخلەمیا دەروونی چەندین چالاكی ل دهۆكێ هاتنە ئەنجامدان.
د. ئەفراسیاب موسا، رێڤەبەرێ گشتیێ ساخلەمیا پارێزگەها دهۆكێ راگەهاند، ل دهۆكێ هزار و 450 نەخۆشێن ئوتیزمێ هەنە، ژ وانا: 313 مێ نە و یێن دیتر هەمی رەگەزێ نێرن و گۆت: «ل پارێزگەها دهۆكێ شەش سەنتەرێن تایبەت یێن چارەسەریا نەخۆشێن ئوتیزمێ هەنە، ئەڤ سەنتەرە خزمەتا پێشكێشی نەخۆشان دكەن».
ماجد سەید سالح، جێگرێ پارێزگارێ دهۆكێ دیار كر، نەخۆشیا ئوتیزمێ بەرەڤ زێدەبوونێ یە ل هەمی جیهانی، د كابینەیا نەهێ دا حكومەتا هەرێما كوردستانێ پتری 30 پڕۆژەیێن كەرتێ ساخلەمیێ ب گوژمێ 100 ملیار دیناران نەخۆشخانە و بنگەهێن ساخلەمیێ ل پارێزگەها دهۆكێ هاتینە چێكرن و ئامێرە و پێدڤێن نۆشداری هاتینە دابینكرن و گۆت: «كێماسی هەنە، لێ بزاڤ دهێنە كرن بۆ نەهێلانا كێماسیان د كەرتێ ساخلەمیێ دا، داكو باشتر خزمەتا خەلكی بهێتە كرن و باشترین جۆرێن چارەسەریان وەربگرن».
