جۆكەكا ئاڤێ خەلكێ تاخێ گەلی بێزار كریە
سندس سالح سلێڤانەیی:
جۆكەكا ئاڤێ دكەڤیتە پشت مزگەفتا تاخێ گەلی و قوتابخانەیا خەبات، خەلكێ وی تاخی گەلەك بێزاركرینە، ب تایبەت د وەرزێ زڤستانێ دا و خەلكێ تاخی دبێژن ئەڤە پازدە سالن مە ئەڤ ئاریشەیە هەی و هەتا نوكە نەهاتیە چارەكرن و رێڤەبەریا ئاڤ و سولینان ژی دبێژیت: مە ئاگەه ژوێ چەندێ هەیە و ڤەدیتن بۆ وی جهی هاتیە كرن، لێ هەتا نوكە پارێ پێدڤی بۆ نەهاتیە تەرخانكرن كو چێكەین، لێ دێ بزاڤێ كەین ل سەر بەخشینا خوە یا هەیڤانە چارەكێ بۆ بینین.
خەلیل عیسا، كو ئێك ژ ئاكنجیێن وی تاخی یە بۆ رۆژنامەیا ئەڤرۆ دبێژیت: ئەڤە جارەكا دی وەرزێ زڤستانێ هات و ئێدی قوتابیێن تاخی دێ ب زەحمەت چنە قوتابحانێ، ب تایبەت ل دەمێ باران بارینێ، چونكو ژۆردانیە و گەلەك ئاڤ ژووردا دهێتە خار و دچیتە سەر جادەیا سەرەكی كو رێكا گەلیێ دهۆكێ یە، زێدەباری كو دیمەنەكێ كرێت ددەتە جادێ مەترسیێ ل سەر ژیانا قوتابیان ژی پەیدا دكەت هەتا بشێن بچنە قوتابخانا خوە، بۆ زانین ئەڤ ئاڤە ژۆردا دچیتە خار هەتا دگەهیتە بازاڕێ پارە گوهۆڕان.
مەجید یاسین، ژی خەلكێ هەمان تاخە، دبێژیت: هەتا نوكە ب دەهان جاران مە سەرەدانا باژێرڤانیێ كریە یا بێ مفایە و چو چارەیێن دروست بۆ نەكرینە، بەلكو ب تنێ هندەك جاران تیمێن وان هاتینە پاقژكرینە و ئەڤە ژی چارەیەكا بەر وەخت بوویە و ئەم دخوازین ڤی جهی بكەنە سندوق و ئاڤ بن عەرد بیت.
ئەندازیار یونس جانۆ رێڤەبەرێ ئاڤ و سولینان ل دهۆكێ، د بەرسڤا داخوازێن خەلكێ وی تاخی دا دبێژیت: مە ئاگەه ژوان هەیە و ڤەدیتنەك بۆ وی جهی هاتیە كرن و ب نڤیسارەكا فەرمی مە دایە قائیمقامیێ، لێ ژبەركو هەتا نوكە پارێ پێدڤی بۆ نەهاتیە تەرخانكرن ئەم نەشیاینە دەستپێبكەین، لێ دێ جارەكا دی ل گەل قائیمقامێ دهۆكێ ئاخڤین و دێ بزاڤێ كەین ل سەر پێشینەیا خوە یا هەیڤانە بۆ چێكەین، لێ ڤێ ژی دەم پێ دڤێت.
