كچ ب رێیا ده‌لیڤه‌یێن كاری دهێنه خاپاندن
هه‌رهین محه‌مه‌د:
دزینا تورێن جڤاكی بوویه دیارده و هه‌ر كه‌سه‌ك ب رێیه‌كێ د دزیت و ئه‌ڤێ چه‌ندێ ژی ترسه‌ك ل دەف خه‌لكی په‌یدا كریه، ب تایبه‌تی ره‌گه‌زێ مێ ژلایه‌كێ دیڤه موقه‌دمه‌كی ژی گۆت: دزینا تورێن جڤاكی دیارده‌كا به‌ربه‌لاڤه، به‌لێ نابیت كه‌س باوه‌ریا خو ب په‌یچا بینیت و بتنێ بچیته چاڤپێكه‌فتێ.
موقه‌دم هێمن سلێمان، به‌رپرسێ راگه‌هاندنا پولیسێن پارێزگه‌ها دهۆكێ دیار كر كو گه‌له‌ك حاله‌ت هه‌بووینه و بووینه سكالا و خودانێت په‌یچا ژی هاتینه ده‌سته‌سه‌ر كرن، به‌لێ یا دروست ئه‌وه خه‌لك باروه‌ریا خو ب ئه‌وان په‌یچا نه‌ئینت یێن كو ده‌لیڤا كاری به‌لاڤ دكه‌ن و هه‌تا هه‌كه په‌یچ یێ باوه‌ری پێكری بیت یان نه دڤێت ئوفیسه‌كا دیار كری هه‌بیت و ده‌مێ دچیته ئوفیسێ ژی سه‌ره‌دانا وان دكه‌ت دڤێت بتنێ نه‌چیت و كه‌سه‌كێ ل گه‌ل خوه ببه‌ت.
موقه‌دمی گۆت: چونكه گه‌له‌ك ئاریشه ژ ئه‌ڤێ چه‌ندێ په‌یدا بووینه و حاله‌ت هه‌بووینه گوتیه دیدار د ترومبێلێ دایه و د بنیات دا چو دیدار د ترومبێلێ دا نین، هه‌روه‌سا نابیت ب چو ره‌نگان وێنێت خۆ بۆ فرێكه‌ت، چونكو گه‌له‌ك جارا ئه‌و په‌یچه سه‌خته ده‌ردكه‌ڤن و هنده‌ك كه‌سان كارێ خۆ كریه سه‌ردابرنا كچان و گه‌فكرن ب رێیا ده‌لیڤه‌یێن كاری.
لدور هه‌مان بابه‌ت، كچه‌كێ ب ناڤێ (ش، ع) گۆت: ئه‌ڤه سێ ساله من زانكو ب دووماهیك ئینای، من دڤیا ببمه خۆدان كار، رۆژه‌كێ هه‌ڤاله‌كێ من ب رێیا فێسبووكی لینكه‌ك بۆ من هنارت گوت ئه‌ڤه كومپانیه‌كه ده‌لیڤا كاری بۆ ده‌رچوویان ڤه‌كریه، پشتی من ئه‌و لینكه ڤه‌كری و پێزانێن خۆ كرینه تێدا ئێكسه‌ر فێسبوكێ من هاته گرتن، پشتی فێسبوكێ من هاتیه دزین گه‌له‌ك ترسیام و من گه‌له‌ك بزاڤكرن نه‌زڤری نه‌چاربوم كومپانیا فێسبوكی هایدار بكه‌م كو ئه‌وی فێسبووكی ژناڤ ببه‌ن داكو چو ئاریشه بۆ من ژێ چێنه‌بن.
موقه‌دم هێمن د به‌رده‌وامیا ئاخفتێن خۆدا گۆت: ئه‌و په‌یچێن ب ئه‌ڤان كاران رادبن و ڤان تاوانان ئه‌نجام بده‌ن قانوون لدووڤ ماددێ دوو ژماره شه‌ش یا سالا 2008 دێ سه‌ره‌ده‌ریێ ل گه‌ل دكه‌ت، سزا ژ شه‌ش هه‌یڤان ده‌ستپێدكه‌ت هه‌تا پێنچ سالان، هه‌روه‌سا غرامه ژی یا هه‌ی ژ ملیونه‌كێ هه‌تا پێنچ ملیونان و گه‌له‌ك جاران تاوانبار سه‌را ئه‌ڤێ دیاردێ هاتینه گرتن و سزادان ب زیندانكرنێ و كوژمێ پاره‌ی ژی، به‌لێ یا گرنگ ئه‌وه خه‌لك ژ ئه‌ڤان دیاردان بخوه وانان وه‌رگرن داكو نه‌كه‌ڤنه ئه‌ڤێ خه‌له‌تیێ.
